ԵՐԵՎԱՆ, մայիսի – Sputnik. Ուկրաինայում «Ազով» գնդի ստորաբաժանումների հետ (որի գրոհայինների դեմ ՌԴ-ում քրեական գործ է հարուցվել) իսրայելցի վարձկաններ են կռվում։ Այս հայտարարությունն արել է Ռուսաստանի ԱԳՆ պաշտոնական ներկայացուցիչ Մարիա Զախարովան:
«Ես կասեմ այն, ինչը հազիվ թե կցանկանան լսել Իսրայելի այն քաղաքական գործիչները, որոնք հիմա տեղեկատվական արշավ են սկսել։ Գուցե նրանց հետաքրքրի։ Ուկրաինայում հիմա փաստացի «Ազովի» գրոհայինների հետ ուս ուսի կռվում են նաև իսրայելցի վարձկանները»,- ասել է Զախարովան Sputnik ռադիոկայանի եթերում։
ԱԳՆ ներկայացուցիչն ավելացրել է, որ Իսրայելում չեն կարող չիմանալ այդ մասին։
«Ես տեսել եմ տեսանյութը»,- հստակեցրել է Զախարովան։
Ավելի վաղ Իսրայելի արտաքին գործերի նախարար Յաիր Լապիդը հայտարարել էր, որ սպասում է ռուսական կողմի ներողությանը իր ռուս գործընկեր Սերգեյ Լավրովի արտահայտության համար, իսկ Իսրայելում Ռուսաստանի դեսպան Անատոլի Վիկտորովին ԱԳՆ էին կանչել բացատրական զրույցի համար:
Մայիսի 1-ին Լավրովը իտալական «Մեդիասետ» հեռուստաընկերությանը տված հարցազրույցում ասել է, որ գերի ընկած ազգայնական գումարտակների գրոհայինները նեոնացիստական խորհրդանիշներով դաջվածքներ ունեն: Միաժամանակ, Լավրովն անդրադարձել է Վլադիմիր Զելենսկու այն հայտարարությանը, թե իր երկրում ազգայնականացում չկա, քանի որ ինքը ազգությամբ հրեա է։ ՌԴ ԱԳ նախարարը հայտարարել է, որ դա բացարձակապես ոչինչ չի նշանակում, քանի որ իմաստուն հրեա ժողովուրդն ասում է` ամենաբուռն հակասեմիտները, որպես կանոն, հրեաներն են:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 70-րդ օրը։