ԵՐԵՎԱՆ, 9 հունվարի — Sputnik, Աստղիկ Սուքիասյան. Հետտոնական օրերին խիստ սննդակարգը ցանկալի չէ. այն կարող է սթրեսային լինել օրգանիզմի համար։ Այս կարծիքին է ճանաչված սննդաբան Գայանե Շահխաթունին, որը Sputnik Արմենիայի հետ զրույցում ներկայացրել է Ամանորից հետո օրգանիզմը «սթափեցնելու» նրբությունները։
«Տոնական օրերին մարդիկ ակտիվ սնվել են, և այժմ ստամոքսը լայնացած է։ Իրավիճակը շտկելու համար կարելի է օգտագործել կենդանական սպիտակուցներ, մասնավորապես` հավի կամ հնդկահավի կրծքամիս, յուղազրկված կաթնաշոռ, կեֆիր, մածուն։ Օրգանիզմը շատ լավ է յուրացնում միատեսակ սնունդը, ինչի շնորհիվ յուրացվում են նաև ճարպերը։ Չենք մոռանում խմել 1.5-2 լիտր ջուր»,–ասաց նա։
Սննդաբանը խորհուրդ է տալիս այդ ընթացքում աղ և շաքար չօգտագործել, քանի որ դրանք խանգարում են նյութափոխանակությանը և պասիվացնում մարսողությունը։
Առաջին և 2-րդ երեխայի համար ծնողը 300 հազար դրամ նպաստ կստանա. խնամքի նպաստն էլ կավելանա
Սակայն բեռնաթափման օրերով տարվել չի կարելի։ Մասնագետն առաջարկում է շաբաթական 1-2 անգամ հայտարարել բեռնաթափման օրեր և սնվել հաճույքով, սիրել այդ օրերը։
Շահխաթունին բեռնաթափման օրերի համար 2 տարբեր սննդակարգ է առաջարկում։
Տարբերակ 1
Հարկավոր է 4 ձու, որը կարող եք խաշել կամ ձվաձեղ անել (չկպչող թավայում, առանց բուսայուղի կամ կարագի), 4 նարինջ, 300 գրամ կեֆիր կամ մածուն և մոտ 30 գրամ դառը շոկոլադ` սուրճի համար։ Այս ամենը պետք է չափաբաժիններով օգտագործել 2.5-3 ժամը մեկ։ Ցանկալի է կեֆիրը կամ մածունն ուտել երեկոյան ժամերին։ Օրվա ընթացքում հաճախ սուրճ և ջուր խմեք։
Տարբերակ 2
Հարկավոր է հավի խաշած կրծքամիս (մոտ 250 գրամ), 10 հատ կանաչ պղպեղ, մեկ կապ հազարաթերթ։ Սննդաբանը մսի փոխարեն առաջարկում է օգտագործել լոբազգիներ։ Այս ամենը բաժանում եք չափաբաժինների և կարող եք օգտագործել 2.5-3 ժամը մեկ (առանց աղի)։ Շատ ջուր խմելու մասին չմոռանաք։
Սննդաբանի խոսքով` եթե մարդը տոնի գլխավոր մասը համարում է սնունդը, ապա դա անկրթություն է։
«Սնունդը օրգանիզմի շարժիչի համար նախատեսված բենզինն է, որը պետք է լինի որակյալ, որպեսզի շարժիչը չվնասի։ Սնունդը չպետք է դառնա մարդուն հաճույք պատճառելու տարբերակ։ Ամանորյա սեղանի մոդայիկ ուտեստները` խոզի ազդրը, նրբաբլիթները, «Մայրաքաղաքային» աղցանը երկրորդ օրն արդեն տոքսիններ են արտադրում և այնքան վնասներ են պատճառում օրգանիզմին, որ եթե մարդիկ դա սեփական աչքով տեսնեին, հավանաբար մեկընդմիշտ կհրաժարվեին այդ անառողջ սննդից։ Չի կարելի մսային ուտեստները 10 օր պահել սառնարանում և օգտագործել»,– ասաց Շահխաթունին։
Նա համոզված է, որ անսահմանափակ ուտելու խնդիրը հոգեբանական է։ Մարդը, որը 10 օր անգիտակցաբար սնվել է և գիրացել է 5-6 կիլոգրամ, մինչ Ամանորն արդեն իրեն ծրագրել է, որ պետք է անսահմանափակ ուտի և ավելորդ քաշի մասին չմտածի։
«Ամանորից հետո ինձ զանգահարում են հաճախորդներս և ասում, որ 5-6 կիլոգրամ գիրացել են։ Երբ մենք միասին պլան ենք մշակում այդ ավելորդ քաշից ազատվելու համար, զգում եմ, որ նրանք 4-5 օր մեծ հաճույքով են կատարում նախատեսված բեռնաթափման ծրագիրը։ Նշանակում է, որ նրանք օրգանիզմին հոգեբանորեն պատրաստել են քաշի նվազեցման»,–ասաց նա։
Ի տարբերություն Շահխաթունու` սննդաբան Լիլիթ Բասյանը կարծում է, որ Ամանորից հետո կուտակված ավելորդ 5-6 կիլոգրամները դիետաների միջոցով կորցնելու պարագայում կրկին «կվերադառնան» տիրոջ մոտ, եթե մոռացության մատնվի առողջ և ճիշտ սննդի օգտագործումը։
«Չպետք է դիետաներ պահել։ Առողջ սննդակարգի առաջին քայլը պետք է սկսել հագեցած նախաճաշից, որպեսզի քաղցած չմնաք և մինչև ճաշը բավարարվեք մեկ մրգով։ Ճաշին կարելի է ուտել մսեղեն կամ ձկնեղեն, ինչպես նաև ծովամթերք, որը պետք է համադրել բանջարեղենի հետ։ Այնուհետև կարելի է ուտել բանջարեղենային աղցան կամ բանջարեղենային ապուր»,– ասաց նա։
Լիլիթ Բասյանի խոսքով` մինչև մարդն իր ցանկությամբ չորոշի առողջ ապրել և օգտագործել բացառապես առողջ սնունդ, ոչ մի սննդաբան նրան չի կարող օգնել։ Որովհետև դա «փակ շրջան է», ու սխալ սննդակարգի դեպքում ավելորդ կիլոգրամներն անխուսափելի են լինելու։
Ովքեր և ինչպես ամուսնացան 2019 թվականին. աղմկահարույց հարսանիքների 5–յակ