Սյունիքի մարզը ունի տնտեսական զարգացման մեծ ներուժ։ Sputnik Արմենիայի հետ զրույցում ասել է տնտեսագետ Թադևոս Ավետիսյանը։
«Ներդրումների համար ամենակարևորն այն է, թե ինչ պայմաններ ենք մենք առաջադրում ներդրողների համար»,-ասել է Ավետիսյանը։
Այս իմաստով, ըստ տնտեսագետի, նախորդ տարվա քաղաքական փոփոխությունից հետո շարունակվում է անորոշությունը ներդրումային միջավայրում։ Օրինակ, վերջին օրերին դատական համակարգի նկատմամբ կտրուկ գործողությունները տնտեսական իմաստով ռիսկեր և անորոշություն են պարունակում ներդրողների համար։
Տնտեսագետը կարծում է, որ Սյունիքի մարզի աշխարհագրական դիրքը, հարևանությամբ մեծ պահանջարկներ ունեցող երկրի՝ Իրանի գոյությունը և գյուղատնտեսական, կլիմայական բարենպաստ պայմաները օգտագործելով՝ հարկավոր է տնտեսական ակտիվություն բերել Սյունիքի մարզում։
Ըստ Ավետիսյանի՝ տնտեսական հեղափոխությունը հնարավոր է համակարգված մոտեցման և իրակական քայլերի արդյունքում։
Հիշեցնենք, որ Սյունիքում անցկացվեց «Իմ քայլը հանուն Սյունիքի մարզի» ներդրումային համաժողովը, որին մասնակցում էր վարչապետը Նիկոլ Փաշինյանը։ Համաժողովի նպատակն է Սյունիքի մարզի տնտեսության և համայնքների զարգացման գործընթացներում ներգրավել Հայաստանում և արտերկրում ձեռնարկատիրություն ծավալող և բիզնես շահեր հետապնդող գործարարների։