ԵՐԵՎԱՆ, 16 փետրվարի — Sputnik. Ռուսական իշխանությունները մտադիր են մինչև տարեվերջ փոփոխություններ մշակել դաշնային օրենսդրությունում` Ռուսաստանում կոնյակի և շամպայնի տեսքով կեղծ խմիչք վաճառելու հնարավորությունը բացառելու համար։ Հայաստանում կարծում են, որ այդ փոփոխությունները տեղի արտադրողներին չեն առնչվի։
«Ինձ վախեցնում է, երբ կոնյակի փոխարեն խանութներում հայտնվում է մաքուր սպիրտ, որի մեջ ավելացնում են գունանյութ և վաճառում «կոնյակ» անվան տակ։ Մենք հիմա աստիճանաբար 171 դաշնային օրենքի շրջանակում, որն ընդհանուր առմամբ կարգավորում է ալկոհոլային արտադրանքի արտադրության ոլորտը, կամաց-կամաց մոտենում ենք որոշման», — ՌԻԱ Նովոստիին ասել է ոլորտը կարգավորող փոխվարչապետ Ալեքսանդր Խլոպոնինը։
Ներկա պահին օրենսդրությունում չկան դրույթներ, որոնք կարգելեին կեղծ կոնյակի և շամպայնի վաճառքը, քանի որ ԳՕՍՏ-ին անհամապատասխանությունը հիմք չի հանդիսանում, որ դրանք դուրս բերեն խանութներից։
«Մեզ մոտ շատ բան չի համապատասխանում ԳՕՍՏ-ին։ Երբ ասում ենք, որ կոնյակը պետք է արտադրվի խաղողի որոշակի տեսակից, որն ընդհանրապես չի աճում ՌԴ տարածքում, իսկ այն շարունակում է կոչվել կոնյակ», — ասել է փոխվարչապետը։
Նրա խոսքով` պետք է մշակել կարգավորում, լիցենզավորում և արտադրանքի որակը որոշել այդ օրենքի շրջանակում։
«Այս տարի ցանկանում ենք ամեն ինչ վերջացնել և ուրախանալ, որ մարդիկ որակյալ խմիչք են խմում», — նշել է Խլոպոնինը։
Հայաստանի գինեգործների միության նախագահ Ավագ Հարությունյանը Sputnik Արմենիային ասաց, որ հարցը Հայաստանի հետ կապված չէ։
«Այստեղ կլուծվեն Ռուսաստանի ներքին խնդիրները, քանի որ մենք ՌԴ և ԱՊՀ շուկա ենք արտահանում կոնյակ, որն անցնում է մեր չափանիշներով», — ասաց Հարությունյանը։
Նրա խոսքով` Ռուսաստանում իրավական դաշտը, որը կարգավորում է կոնյակի արտադրությունը, ավելի լիբերալ է, քան Հայաստանում։
Այնտեղ գոյություն ունեն տարբեր կատեգորիաներ, որոնց անվանման մեջ օգտագործվում է կոնյակ բառը, օրինակ` «կոնյակի խմիչք»։ Սպառողը շփոթում է կոնյակի հետ։
Նա նշեց, որ նոր տարում ուժի մեջ կմտնի տեխնիկական կանոնակարգ, որի դեպքում անկախ Ռուսաստանի բարձրացրած հարցերից, բոլոր պահանջները կխստացվեն։