Փաշինյանը Էռնեկյանի հետ ներդրումային հարցեր է քննարկել
15:12 28.09.2026 (Թարմացված է: 15:15 28.09.2026)
Բաժանորդագրվել
Մարտին Էռնեկյանը Նիկոլ Փաշինյանին է ներկայացրել «Կորպորասիոն Ամերիկա օդանավակայաններ» ընկերության կողմից իրականացվող ծրագրերի ընթացքը և ընդլայնման հեռանկարները:
ԵՐԵՎԱՆ, 28 սեպտեմբերի – Sputnik. ՀՀ վարչապետ Նիկոլ Փաշինյանը «Կորպորասիոն Ամերիկա օդանավակայաններ» ընկերության գործադիր տնօրեն Մարտին Էռնեկյանի հետ Երևանի «Զվարթնոց», Գյումրիի «Շիրակ» օդանավակայանների զարգացման, ենթակառուցվածքների բարելավմանն ուղղված հարցեր է քննարկել։ Տեղեկությունը հայտնում է ՀՀ վարչապետի մամուլի ծառայությունը։
Վարչապետը կարևորել է «Կորպորասիոն Ամերիկա օդանավակայաններ» ընկերության ընկերության գործունեությունը Հայաստանում և նշել, որ կառավարությունը շահագրգիռ է փոխշահավետ գործընկերության զարգացմամբ և ընդլայնմամբ։
Մարտին Էռնեկյանը վարչապետին է ներկայացրել ընկերության կողմից իրականացվող ծրագրերի ընթացքը և ընդլայնման հեռանկարները:
«Անդրադարձ է կատարվել ընկերությանը կոնցեսիոն կառավարման տրված Երևանի «Զվարթնոց», Գյումրիի «Շիրակ» օդանավակայանների զարգացմանը, ենթակառուցվածքների բարելավմանը, ինչպես նաև այլ ներդրումային նախագծերի։ Քննարկվել են նախագծերի իրականացմանը վերաբերող մի շարք հարցեր, որոնք կնպաստեն ավիացիոն շուկայի զարգացմանը, զբոսաշրջության ոլորտի զարգացմանը զուգահեռ ուղևորահոսքերի, օդանավակայանների թողունակության ավելացմանը, որակյալ ծառայությունների մատուցմանը»,–նշված է հաղորդագրության մեջ։
Կողմերը պայմանավորվել են շարունակել քննարկումները՝ հետագա քայլերի շուրջ:
Հիշեցնենք, որ Փաշինյանն Էռնեկյանի հետ նմանատիպ հարցեր էր քննարկել նաև 2022-ի ապրիլին։
