Բաքուն նոր զիջումով չի բավարարվի. Սաղաթելյանը մարտահրավերը միասին հաղթահարելու կոչ է անում
15:40 13.09.2026 (Թարմացված է: 15:46 13.09.2026)
© Sputnik
Բաժանորդագրվել
Իշխան Սաղաթելյանի խոսքով` Երևանը, եթե բոլոր պահանջները կատարի, ապա Բաքուն հաջորդ քայլով կհայտարարի, որ Հայաստանը ագրեսոր պետություն է ու չպետք է բանակ ունենա։
ԵՐԵՎԱՆ, 13 սեպտեմբերի – Sputnik. Հայաստանի կողմից նոր զիջումները, այդ թվում՝ Տիգրանաշենի հանձնումն Ադրբեջանին, չեն կանգնեցնի Իլհամ Ալիևին։ Ավելին, նա ավելի հեռուն կգնա` ընդհուպ Հայաստանն ագրեսոր պետություն կհայտարարի։ Այս մասին «Ֆեյսբուքում» տեսանյութով ասել է ՀՀ ԱԺ «Հայաստան» խմբակցության պատգամավոր Իշխան Սաղաթելյանը` անդրադառնալով 4 տարի առաջ այս օրը Հայաստանի նկատմամբ Ադրբեջանի սանձազերծած հարձակմանը և զիջումներին։
Նշենք, որ 4 տարի առաջ այս օրը Ադրբեջանը ագրեսիա իրականացրեց ՀՀ տարածքային ամբողջականության և ինքնիշխանության դեմ, օկուպացրեց շուրջ 200 ք/կմ տարածք, հայկական կողմը 224 զոհ ունեցավ։
«Հիմա Իլհամ Ալիևը և Նիկոլ Փաշինյանը հայ ժողովրդին կանգնեցրել են երկընտրանքի առաջ՝ կա՛մ Հայաստանից կզիջվեն նոր տարածքներ` խոսքը շատ կոնկրետ Տիգրանաշենի և Տավուշի հատվածում ռազմավարական նշանակություն ունեցող տարածքների մասին է, կա՛մ տեղի կունենա պատերազմ։ Ասում են` կա՛մ կգնաք և կփոխեք Հայաստանի Սահմանադրությունը և կունենաք Ադրբեջանի պահանջած Սահմանադրությունը, կա՛մ տեղի կունենա պատերազմ»,– հայտարարեց պատգամավորը։
Ընդդիմադիր գործչի խոսքով` Երևանի կողմից այդ ամենն իրականացնելու դեպքում, Բաքուն հաջորդ քայլով Հայաստանը կհայտարարի արգեսոր պետություն։
Նա նշեց, որ Փաշինյանն իր քայլերով ու գործողություններով ամեն ինչ արել է Ալիևի արյունոտ ձեռքերը «լվանալու», Արցախի և հայ ժողովրդի նկատմամբ նրա քայլերն ու գործողությունները լեգիտիմացնելու համար՝ զոհին վերածելով ագրեսորի: Սաղաթելյանը չբացառեց, որ բոլոր պայմանների բավարարման դեպքում Ադրբեջանը կհայտարարի, որ լինելով ագրեսոր պետություն ՝ Հայաստանն այլևս չպետք է բանակ ունենա:
«Բոլոր նրանք, ովքեր այս օրերին հայտարարում են, որ չպետք է Հայաստանից նոր տարածքներ զիջվեն Ադրբեջանին այս սպառնալիքների և շանտաժի տակ, և, որ Հայաստանը չպետք է Սահմանադրություն ունենա Ադրբեջանի պահանջով, նրանց Նիկոլ Փաշինյանն ասում է` դուք պատերազմ եք ուզում»,– նշեց պատգամավորը։
Այս ամենի հետ կապված Սաղաթելյանը կոչ արեց թույլ չտալ նոր զիջումներ և տեր կանգնել Հայաստանի տարածքային ամբողջականությանն ու ինքնիշխանությանը։ Հորդորեց` հերթական ծանր մարտահրավերը հաղթահարելու համար միասնաբար պայքարել` կտրելով զիջումների շղթան։
Սաղաթելյանը հիշեցրեց նաև, որ առանց կրակոցի Նիկոլ Փաշինյանը Ադրբեջանին էր հանձնել Քարվաճառի շրջանը, Քաշաթաղի շրջանը, Ակնայի շրջանը, դրանից հետո Գորիս-Կապան ճանապարհը, օպերատիվ հրամանով հետ կանչելով հայկական զորքերը զբաղեցրած դիրքերից, Շուռնուխի մի հատվածը, Սև լճից հատվածներ։
«Բոլոր հանձնումները Նիկոլ Փաշինյանն իրականացրել է հետևյալ տրամաբանությամբ՝ մի մասը զիջենք, մնացածը պահելու երաշխավորությամբ, զիջենք, որպեսզի պատերազմ տեղի չունենա։ Այդ բոլոր զիջումներից հետո տեղի ունեցավ սեպտեմբերյան աղետալի մեկօրյա պատերազմը, և ունեցանք նման կորուստներ։ Հայաստանից 200 քառակուսի կիլոմետր օկուպացվելուց հետո, բնականաբար, Ադրբեջանը չբավարարվեց, և տեղի ունեցավ Արցախի էթնիկ զտումը»,– ասաց Սաղաթելյանը։
Սեպտեմբերի 11-ին, կառավարության նիստից հետո, պատասխանելով լրագրողների հարցին, Փաշինյանն ասել էր, որ Տիգրանաշենը, որն ինքն ադրբեջանական տեղանունով կոչում է «Քյարքի», Հայաստանի մաս չէ, ու մյուս անկլավների հետ միասին չի մտնում 29 743 կմ2 տարածքի մեջ։ Նշել էր, թե իբր ովքեր ասում են, որ թույլ չեն տալու Տիգրանաշենը հանձնել Ադրբեջանին, նրանք պատերազմ են հրահրում։
Նիկոլ Փաշինյանը բազմիցս պնդել է՝ Տիգրանաշենը հայկական տարածք չէ ու յուրաքանչյուր անգամ այդ բնակավայրի ոչ հայկական անվանումն է օգտագործում։
Ի դեպ, Տիգրանաշենը համարվում է ռազմավարական ճանապարհ, քանի որ այդ հատվածով է անցնում Հայաստանի հյուսիսը, Երևանը Սյունիքին ու Վայոց Ձորին կապող ճանապարհը։ Այս ճանապարհով մի շարք բեռներ են անցնում տարեկան՝ Իրանից դեպի ՀՀ տարբեր մարզեր ապրանք փոխադրելու համար։
Ի դեպ, Տիգրանաշենը համարվում է ռազմավարական ճանապարհ, քանի որ այդ հատվածով է անցնում Հայաստանի հյուսիսը, Երևանը Սյունիքին ու Վայոց Ձորին կապող ճանապարհը։ Այս ճանապարհով մի շարք բեռներ են անցնում տարեկան՝ Իրանից դեպի ՀՀ տարբեր մարզեր ապրանք փոխադրելու համար։
