Լիլիթ Գալստյանը հայ ռազմագերիների պաշտպանության հարցով բաց նամակ է հղել Անահիտ Մանասյանին
14:33 12.09.2026 (Թարմացված է: 14:47 12.09.2026)
© Sputnik / Asatur Yesayants
Բաժանորդագրվել
Լիլիթ Գալստյանը ՄԻՊ–ին խնդրել է ներկայացնել, թե հայ ռազմագերիների պաշտպանության ուղղությամբ առաջիկայում ինչ քայլեր են նախատեսում։
ԵՐԵՎԱՆ, 12 սեպտեմբերի – Sputnik. ՀՀ ազգային ժողովի «Հայաստան դաշինք» խմբակցության պատգամավոր, Մարդու իրավունքների և հանրային հարցերի հանձնաժողովի նախագահ Լիլիթ Գալստյանը հայ ռազմագերիների պաշտպանության հարցերով բաց նամակ է հղել ՀՀ մարդու իրավունքների պաշտպան Անահիտ Մանասյանին։
Նշենք, որ մինչ այս, ՀՀ մարդու իրավունքերի պաշտպանին և ՀՀ իշխանություններին՝ մարդասիրական և մյուս իրավունքների հարցերով, Բաքվից դիմել են բարերար Ռուբեն Վարդանյանն ու Արցախի Հանրապետության ԱԺ նախկին նախագահ Դավիթ Իշխանյանը։ Ռուբեն Վարդանյանը ՀՀ ՄԻՊ–ին ուղղված ապրիլի 21-ի ուղերձում խնդրել էր դիտարկել իր կնոջ՝ Վերոնիկա Զոնաբենդի և մյուս հայ ռազմագերիների հարազատների՝ Բաքու այցելելու հնարավորությունը։ Սեպտեմբերի 9–ին Մանասյանին ուղղված իր ուղերձում էլ Դավիթ Իշխանյանը հայտնել էր, որ չի ստացել Բաքվի ռազմական դատարանի վճիռները, նույնիսկ ադրբեջաներեն տարբերակը, և որևէ կայքէջում դրանք չեն հրապարակվել։
Ադրբեջանում ընթացող ապօրինի դատավարությունների վերաբերյալ իր մտահոգությունն է հայտնել նաև Դավիթ Բաբայանը օգոստոսի 19-ին։
Ադրբեջանում ընթացող ապօրինի դատավարությունների վերաբերյալ իր մտահոգությունն է հայտնել նաև Դավիթ Բաբայանը օգոստոսի 19-ին։
«Ելնելով այն իրողությունից, որ երբ պետությունների միջև համագործակցության մյուս ուղիները փակված են, Մարդու իրավունքների մոնիտորինգի իրականացման համար կարևոր և վճռորոշ գործիք է հանդիսանում Մարդու իրավունքների ազգային հաստատությունների եվրոպական ցանցի (ENNHRI) միջև համագործակցությունը։ Սա հնարավորություն է տալիս Մարդու իրավունքների ազգային հաստատություններին (ՄԻԱՀ)`բարձրացնելու մարդու իրավունքների ստանդարտների պահպանման վերաբերյալ մտահոգությունները մեկ այլ պետության գործողությունների մասին՝ ուղղակիորեն դիմելով այդ պետության իր գործընկերոջը»,–գրել է Գալստյանը։
Հաշվի առնելով խոշտանգումների վերաբերյալ բացահայտ փաստերը`Բաքվում պահվող հայերի ահազանգերը, ինչպես նաև հանրային իշխանության պարտականությունը քաղաքացու հիմնական իրավունքների և ազատությունների հարգումն ու պաշտպանությունը ապահովելու տեսանկյունը, Գալստյանը մի քանի հարցեր է ուղղել Մանասյանին։
Գալստյանը հետաքրքրվել է.
1.
Մարդասիրական իրավունքի շրջանակներում ՄԻՊ լիազորությունների տիրույթում ի՞նչ գործողություններ է իրականացվել Բաքվում գտնվող հայրենակիցների իրավունքների պաշտպանության ուղղությամբ։2.
Ադրբեջանի Մարդու իրավունքների պաշտպանին ուղղված ՄԻՊ գրության մեջ ի՞նչ խնդիրներ է բարձրաձայնվել և ի՞նչ արձագանք է ստացվել։
3.
Բաքվում գտնվող հայրենակիցների դատական ակտերը նրանց տրամադրելու և նրանց հիմնարար իրավունքները երաշխավորելու ուղղությամբ վերաբերելի քայլեր ձեռնարկելու նպատակով նախատեսու՞մ է ՀՀ ՄԻՊ–ը դիմել Ադրբեջանի Մարդու իրավունքների պաշտպանին։
4.
Ադրբեջանում ապօրինի պահվող հայրենակիցների խախտված իրավունքների վերականգնման ուղղությամբ ի՞նչ քայլեր է ձեռնարկել ՄԻՊ–ը միջազգային համագործակցության շրջանակներում և ի՞նչ արդյունք է արձանագրել։
Լիլիթ Գալստյանը ՄԻՊ Անահիտ Մանասյանին խնդրել է ներկայացնել այս ուղղությամբ կատարված ու նախատեսված քայլերը։
Հիշեցնենք, որ պաշտոնական տվյալներով` Ադրբեջանում 19 հայ գերի կա։ Արցախի նախկին ռազմաքաղաքական առաջնորդների գործով «դատավարությունը», որը Բաքվում սկսվել էր 2025 թվականի հունվարին, ավարտվեց այս տարվա փետրվարի 5–ին, և հրապարակվեցին դատավճիռները` ցմահ ազատազրկման դատապարտվեցին Արցախի Հանրապետության նախկին նախագահ Արայիկ Հարությունյանը, ԱԺ նախկին նախագահ Դավիթ Իշխանյանը, ՊԲ նախկին հրամանատար Լևոն Մնացականյանը և ՊԲ հրամանատարի նախկին տեղակալ Դավիթ Մանուկյանը։ Արցախի նախկին նախագահներ Արկադի Ղուկասյանն ու Բակո Սահակյանը դատապարտվեցին 20 տարվա ազատազրկման։
Քաղաքացիական գերիներ Մադաթ Բաբայանը և Մելքիսեթ Փաշայանը դատապարտվեցին 19 տարվա ազատազրկման, Գարիկ Մարտիրոսյանը՝ 18, Դավիթ Ալահվերդյանը և Լևոն Բալայանը՝ 16, Էրիկ Ղազարյանը, Գուրգեն Ստեփանյանը, Վասիլ Բեգլարյանը՝ 15 տարվա ազատազրկման։
Արցախի նախկին պետնախարար Ռուբեն Վարդանյանի «գործը» քննվում էր առանձնացված վարույթով։ Փետրվարի 17-ին հայտնի դարձավ, որ Բաքվի դատարանը Ռուբեն Վարդանյանին 20 տարվա ազատազրկման է դատապարտել: Ապրիլի 28-ին հայտնի դարձավ, որ նրան այլ հայ գերիների հետ տեղափոխել են Բաքվի Ղարադաղի շրջանի Ումբակի բանտային համալիր:
