«Ուժեղ Հայաստանի» թեկնածուն ընտրվեց ԱԺ եվրաինտեգրման հարցերի մշտական հանձնաժողովի նախագահ
12:03 26.08.2026 (Թարմացված է: 14:29 26.08.2026)
© Sputnik
Բաժանորդագրվել
Ըստ Դոնթի բանաձևի` 12 մշտական հանձնաժողովից 8-ի նախագահը ՔՊ–ից պետք է լինի, 1-ը` «Հայաստան» խմբակցությունից, իսկ մնացած 3-ինը` «Ուժեղ Հայաստան» խմբակցությունից։
ԵՐԵՎԱՆ, 26 օգոստոսի – Sputnik. ՀՀ Ազգային ժողովն այսօր 56 կողմ, 48 դեմ ձայներով ԱԺ եվրաինտեգրման հարցերի մշտական հանձնաժողովի նախագահ ընտրեց «Ուժեղ Հայաստան» խմբակցության պատգամավոր Հարություն Հարությունյանին։
Ինչպես հայտնեց ԱԺ հաշվիչ հանձնաժողովի նախագահ Լիլիթ Մինասյանը, փակ գաղտնի քվեարկությանը մասնակցել է 104 պատգամավոր։
Ինչպես հայտնեց ԱԺ հաշվիչ հանձնաժողովի նախագահ Լիլիթ Մինասյանը, փակ գաղտնի քվեարկությանը մասնակցել է 104 պատգամավոր։
Նշենք, որ «Ուժեղ Հայաստան» խմբակցությունը նախորդ անգամ առաջադրել էր Արեգա Հովսեփյանի թեկնածությունը, որին իշխող մեծամություն կազմող «Քաղաքացիական պայմանագիրը» դեմ էր քվեարկել։ Հարությունյանի թեկնածության վերաբերյալ ՔՊ պատգամավորների մեծամասնությունն իր ելույթներում դրական էր արտահայտվել։
ԱԺ տարածքային կառավարման և շրջակա միջավայրի պահպանության հարցերի մշտական հանձնաժողովը դեռ նախագահ չունի։ «Ուժեղ Հայաստան» խմբակցությունն այս պաշտոնի համար առաջադրել էր Դավիթ Ղազինյանի թեկնածությունը, որը չէր ընտրվել։
Խմբակցությունն այսօր առաջադրեց Իրինա Յոլյանի թեկնածությունը։
Հիշեցնենք, որ ըստ Դոնթի բանաձևի` 12 մշտական հանձնաժողովից 8-ի նախագահը ՔՊ–ից պետք է լինի, 1-ը` «Հայաստան» խմբակցությունից, իսկ մնացած 3-ինը` «Ուժեղ Հայաստան» խմբակցությունից։ Մշտական հանձնաժողովների կազմն այս պահին ունի հետևյալ պատկերը.
Աշխատանքի և բարեկեցության հարցերի մշտական հանձնաժողովի նախագահ` Նազելի Բաղդասարյան («Քաղաքացիական պայմանագիր»)
Առողջապահության հարցերի մշտական հանձնաժողովի նախագահ` Լուսինե Բադալյան («Քաղաքացիական պայմանագիր»)
Արտաքին հարաբերությունների մշտական հանձնաժողովի նախագահ` Սարգիս Խանդանյան («Քաղաքացիական պայմանագիր»)
Կրթության, գիտության, մշակույթի, սպորտի և սփյուռքի հարցերի մշտական հանձնաժողովի նախագահ` Սիսակ Գաբրիելյան («Քաղաքացիական պայմանագիր»)
Մարդու իրավունքների պաշտպանության և հանրային հարցերի մշտական հանձնաժողովի նախագահ` Լիլիթ Գալստյան («Հայաստան»)
Պաշտպանության և անվտանգության հարցերի մշտական հանձնաժողովի նախագահ` Վիլեն Գաբրիելյան («Քաղաքացիական պայմանագիր»)
Պետական-իրավական հարցերի մշտական հանձնաժողովի նախագահ` Արուսյակ Ջուլհակյան («Քաղաքացիական պայմանագիր»)
Տարածաշրջանային և եվրասիական ինտեգրման հարցերի մշտական հանձնաժողովի նախագահ ընտրվեց Տրդատ Սարգսյան («Քաղաքացիական պայմանագիր»)
Տնտեսական հարցերի մշտական հանձնաժողովի նախագահ` Բաբկեն Թունյան («Քաղաքացիական պայմանագիր»)
Ֆինանսավարկային և բյուջետային հարցերի մշտական հանձնաժողովի նախագահ` Լիանա Մանուկյանը («Ուժեղ Հայաստան»)։
Հիշեցնենք, որ նոր խորհրդարանում ՔՊ–ն ունի 64 մանդատ, «Ուժեղ Հայաստանը»՝ 29, իսկ «Հայաստան» դաշինքը՝ 12:
