Բանակցությունները շարունակվում են. ՀՀ ՍԱՏՄ–ն արձագանքել է Ռոսսելխոզնադզորի հայտարարությանը
© Sputnik / Aram Nersesyan
Բաժանորդագրվել
Ռոսսելխոզնադզորն ավելի վաղ հայտնել էր, որ Հայաստանից ակնկալում են գյուղատնտեսական մատակարարման շղթաներում խախտումների վերաբերյալ հետաքննության արդյունքներ և գործողությունների հստակ ծրագիր։
ԵՐԵՎԱՆ, 20 օգոստոսի – Sputnik. ՀՀ սննդամթերքի անվտանգության տեսչական մարմինը շարունակում է բանակցությունները Ռուսաստանի անասնաբուժական և բուսասանիտարական վերահսկողության դաշնային ծառայությունների հետ։ Sputnik Արմենիային այս մասին հայտնեց տեսչական մարմնի իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը։
Ռոսսելխոզնադզորն ավելի վաղ հայտնել էր` ռուսական կողմն ակնկալում է, որ Հայաստանը կներկայացնիգյուղատնտեսական մատակարարման շղթաներում խախտումների վերաբերյալ հետաքննության արդյունքները, ինչպես նաև ԵԱՏՄ-ի անասնաբուժական և բուսասանիտարական չափորոշիչների պահպանման ապահովման հստակ գործողությունների ծրագիր։
«Ռոսսելխոզնադզորի հետ անընդհատ ընթանում է շատ կառուցողական երկխոսություն, հստակեցվում է համատեղ ձեռնարկվող քայլերի հաջորդականությունը, գործողությունների ալգորիթմը, համաձայնեցվում են ԵԱՏՄ անասնաբուժական և բուսաստանիտարական չափանիշների պահպանմանն ուղղված միջոցառումների և գործողությունների ժամանակացույցը։ Բայց այս պահին, նկատի ունենալով, որ բանակցությունները դեռ շարունակվում են, և ընդհանրապես այդ գործընթացը շարունակական է, մենք նախնական կամ ընթացիկ մանրամասների հրապարակումը այս փուլում վաղաժամ ենք համարում»,– արձագանքելով ռուսական կողմի հայտարարությանը` ասաց Հարությունյանը։
Նա նաև վստահեցրեց, որ գործընթացների ավարտից տեսչական մարմինը հանդես կգա հավելյալ հայտարարությամբ և կներկայացնի ձեռք բերված պայմանավորվածությունների ամբողջական փաթեթը։
Գործընթացները, ըստ Հարությունյանի, չեն սահմանափակվում միայն ռուսաստանցի գործընկերների հետ բանակցություններով ու կոնկրետ միջոցառումների քննարկումներով; Տեսչական մարմնի ներկայացուցիչները տեղում վերահսկողական միջոցառումներ են իրականացնում նաև տեղական արտադրողների մոտ։
«Սա անընդհատ գործընթաց է, որն իրականացվում է թե՛ բուսասանիտարական, թե՛ անասնաբուժական վերահսկողության շրջանակում»,– ընդգծեց Հարությունյանը։
Հետաքրքրվեցինք` արդյոք կան որոշակի ապրանքներ, որոնք այս պահին Ռուսաստան արտահանվելու թույլտվություն են ստացել։
«Եթե թույլտվություններ լինեն, բնականաբար, կհրապարակվեն։ Հիմա քննարկվում են բոլոր այդ հարցերը ընդհանուր փաթեթի շրջանակներում»,– պատասխանեց նա։
Հարությունյանի խոսքով` բանակցությունների վերջնաժամկետ ևս նախանշված չէ։
Հիշեցնենք` Ռոսսելխոզնադզորը մայիսից սկսեց սահմանափակել Հայաստանից ՌԴ ներմուծվող ապրանքները, սկզբում` ձուկն ու ծաղիկները, ապա` միրգ–բանջարեղենի որոշ տեսակները։ Հունիսի 2-ից Ռոսսելխոզնադզորը սահմանափակեց կորիզավոր մրգերի՝ բալի, կեռասի, ծիրանի, սալորի, դեղձի, նեկտարինի և խաղողի ներմուծումը Հայաստանից։
Գերատեսչությունն այս որոշումները բացատրում է հայտնաբերված խախտումներով և բուսասանիտարական անվտանգության ապահովման անհրաժեշտությամբ։ Նշենք, որ Ռուսաստանը հայկական գյուղմթերքի իրացման հիմնական շուկան է. ՌԴ–ին է բաժին ընկում Հայաստանի արտահանման ավելի քան 90 տոկոսը։
Գերատեսչությունն այս որոշումները բացատրում է հայտնաբերված խախտումներով և բուսասանիտարական անվտանգության ապահովման անհրաժեշտությամբ։ Նշենք, որ Ռուսաստանը հայկական գյուղմթերքի իրացման հիմնական շուկան է. ՌԴ–ին է բաժին ընկում Հայաստանի արտահանման ավելի քան 90 տոկոսը։
