Եկեղեցու ծրագրավորված թիրախավորումը և հալածանքները հատել են բոլոր կարմիր գծերը. ՀՅԴ բյուրո
11:11 07.08.2026 (Թարմացված է: 11:22 07.08.2026)
© Sputnik / Andranik Ghazaryan
Բաժանորդագրվել
ՀՅԴ բյուրոն դատաիրավապահ համակարգին կոչ է անում Հայ առաքելական եկեղեցու դեմ ծավալված գործընթացում մնալ սահմանադրականության և ՀՀ օրենքների շրջանակներում և չտրվել քաղաքական խարդավանքների պարտադրանքին։
ԵՐԵՎԱՆ, 7 օգոստոսի - Sputnik. ՀՀ իշխանությունների կողմից Հայ առաքելական եկեղեցու ծրագրավորված թիրախավորումն ու հալածանքները հատել են բոլոր կարմիր գծերը։ Այս մասին հայտարարել է ՀՅԴ բյուրոն` անդրադառնալով Ամենայն Հայոց կաթողիկոս Գարեգին Երկրորդի և մի շարք բարձրաստիճան հոգևորականների դեմ հարուցված քրեական գործին։
«Եկեղեցու հեղինակության և նրա հոգևոր առաքելության դեմ ուղղված ՀՀ իշխանությունների գործողությունները հակասահմանադրական են և հակազգային: Այսպիսով հիմնովին խարխլվում է պետություն-եկեղեցի հարաբերությունների տարանջատման սահմանադրական սկզբունքը, ոտնահարվում հազարավոր հավատացյալների խղճի ազատության իրավունքն ու հոգևոր արժանապատվությունը, խորանում հանրային պառակտվածությունը, թուլանում մեր ինքնության հիմքերն ու նոր ցնցումների ենթարկվում պետական ու հասարակական կյանքը»,–նշված է հայտարարության մեջ։
ՀՅԴ բյուրոն դատապարտում է իշխանությունների որդեգրած հակաօրինական գործողությունները և իր լիակատար աջակցությունը հայտնում եկեղեցուն և Հայոց հայրապետին։
Բյուրոն դատաիրավապահ համակարգին կոչ է անում մնալ սահմանադրականության և ՀՀ օրենքների շրջանակներում և չտրվել քաղաքական խարդավանքների պարտադրանքին։ Ընդգծվում է, որ թեմերի կառավարման և առհասարակ կանոնական իրավունքի ու ներքին ընթացակարգերի հետ կապված հարցերը գտնվում են բացառապես Եկեղեցու իրավասության տիրույթում, և ցանկացած միջամտություն անթույլատրելի է։
«Կոչ ենք ուղղում մեր հայրենակիցներին՝ ազգային գիտակցությամբ ու համերաշխության սկզբունքներով առաջնորդվելով, պահպանել ազգային միասնությունը, համախմբվել Հայ առաքելական սուրբ եկեղեցու, նրա հոգևոր առաքելության և Ամենայն հայոց վեհափառ հայրապետի շուրջ»,–նշված է հայտարարության մեջ:
Հիշեցնենք` փետրվարի 14-ին հայտնի դարձավ, որ Ամենայն հայոց կաթողիկոսի նկատմամբ քրեական հետապնդում է հարուցվել Մասյացոտնի թեմի նախկին առաջնորդ, կարգալույծ արված Արման Սարոյանի հետ կապված դատական ակտի կատարումը խոչընդոտելու մեղադրանքով, արգելվել է նրա ելքը Հայաստանից:
Օգոստոսի 7-ին՝ ժամը 16։00-ին, Արմավիրի մարզի առաջին ատյանի ընդհանուր իրավասության դատարանում տեղի կունենա Ամենայն հայոց կաթողիկոսի և Գերագույն հոգևոր խորհրդի անդամ 6 եպիսկոպոսների քրեական գործի նախնական դատալսումների առաջին նիստը։ Գործը քննելու է դատավոր Հակոբ Մանուկյանը:
Օգոստոսի 7-ին՝ ժամը 16։00-ին, Արմավիրի մարզի առաջին ատյանի ընդհանուր իրավասության դատարանում տեղի կունենա Ամենայն հայոց կաթողիկոսի և Գերագույն հոգևոր խորհրդի անդամ 6 եպիսկոպոսների քրեական գործի նախնական դատալսումների առաջին նիստը։ Գործը քննելու է դատավոր Հակոբ Մանուկյանը:
