ՀՀ վարչական դատարանն այսօր կքննի «Բարգավաճ Հայաստանի» հայցերն ընդդեմ ԿԸՀ որոշումների
18:04 13.06.2026 (Թարմացված է: 00:59 14.06.2026)
© Sputnik / Andranik Ghazaryan
Բաժանորդագրվել
Հունիսի 7–ի ԱԺ ընտրություններից հետո կուսակցությունը ստացել է քվեների 3,996%–ը։
ԵՐԵՎԱՆ, 13 հունիսի – Sputnik. ՀՀ վարչական դատարանն այսօր կքննի «Բարգավաճ Հայաստան» կուսակցության կողմից ներկայացված հայցերը ՀՀ կենտրոնական ընտրական հանձնաժողովի որոշումների դեմ։ Այդ մասին «Ֆեյսբուքի» իր էջում գրառում է արել ԲՀԿ խոսնակ, պատգամավորի թեկնածու Իվետա Տոնոյանը։
Ինչպես հայտնի է, հունիսի 11-ի ուշ երեկոյան ԿԸՀ–ն որոշեց անվավեր ճանաչել թիվ 10/51 և 35/65 ընտրատեղամասերի քվեարկության արդյունքները, ինչը նշանակում է, որ ԲՀԿ–ն ընդհանուր առմամբ կորցրեց 213 ձայն, ու խորհրդարանի անցողիկ 4 տոկոսը հաղթահարելու շանսերն ավելի նվազեցին։ Հունիսի 12–ին ՀՀ կենտրոնական ընտրական հանձնաժողովն անվավեր ճանաչեց նաև թիվ 12/13 ընտրական տեղամասի քվեարկության արդյունքները։
«ՀՀ վարչական դատարանն այսօր կքննի «Բարգավաճ Հայաստան» կուսակցության կողմից ներկայացված հայցերը՝ ԿԸՀ–ի 254 և 255 Ա որոշումների դեմ, որոնցով երկու ընտրատեղամասերում անվավեր են ճանաչվել քվեարկության արդյունքները»,– գրել է նա։
Հիշեցնենք` հունիսի 7-ին Հայաստանում ԱԺ ընտրություններ անցկացվեցին, որոնց մասնակցեց 16 կուսակցություն և 2 դաշինք։ Նախնական հաշվարկների համաձայն` «Քաղաքացիական պայմանագիր» կուսակցությանը կողմ է քվեարկել ընտրողների 49,82%–ը, «Ուժեղ Հայաստան» դաշինքին` 23,28%–ը, «Հայաստան» դաշինքին` 9,93%–ը։ «Բարգավաճ Հայաստան» կուսակցությունը ստացել է քվեների 3,996%–ը, ինչը նրան թույլ չի տալիս մտնել ԱԺ, սակայն Կենտրոնական ընտրական հանձնաժողովի նախագահ Վահագն Հովակիմյանը հունիսի 8–ին հայտարարել է, որ վերահաշվարկից հետո իրավիճակը կարող է փոխվել։
