Ժողովրդի 51%-ը մերժել է այս իշխանությանը. Բագրատ սրբազանը` ընտրությունների մասին
16:27 11.06.2026 (Թարմացված է: 16:28 11.06.2026)
© Sputnik
Բաժանորդագրվել
Բագրատ սրբազանի խոսքով` նախընտրական քարոզարշավից մինչև ընտրություններ աննախադեպ պատմական զեղծարարության ընթացք էր։
ԵՐԵՎԱՆ, 11 հունիսի – Sputnik. Հայաստանում խորհրդարանական ընտրությունների արդյունքներով ժողովրդի 51% -ը փաստացի մերժել է այս իշխանություններին։ Լրագրողների հետ զրույցում այս մասին ասաց «Սրբազան պայքար» շարժման առաջնորդ Բագրատ սրբազանը՝ անդրադառնալով հունիսի 7-ի խորհրդարանական ընտրություններին:
Նա ընդգծեց` հունիսի 7–ին բոլորի աչքի առաջ տեղի են ունեցել բռնաճնշումներ, ձերբակալություններ, արտաքին ուժերի ներկայություններ:
«Աննախադեպ պատմական զեղծարարության ընթացք էր։ Մարդիկ իշխանություն կորցնելու ու դրանով պայմանավորված շատ բան կորցնելու առաջ են կանգնած, հատկապես պատասխանատվության, որից անընդհատ խուսափում են: Այդուհանդերձ ես համարում եմ, որ սա ևս մեկ քայլ առաջ էր այս չարիքի իշխանությանը հեռացնելու համար: Մի նայեք, թե 49 տոկոսն ինչ եղավ, դա ինչպես է ձեռք բերվել, հետո կպարզվի, թեև արդեն պարզվում է ընթացքում: Տարբեր քաղաքական ուժեր վեր են հանում, բայց որ փաստացի մեր ժողովրդի 51%-ը մերժել է այս մարդկանց, իրենց տարբեր ծրագրեր, փաստ է: Գլուխ էին գովում ժամանակին, որ 65% պետք է հավաքեն, ձախողեցին»,-ասաց Բագրատ սրբազանը։
Հիշեցնենք` հունիսի 7-ին Հայաստանում ԱԺ ընտրություններ անցկացվեցին, որոնց մասնակցեց 16 կուսակցություն և 2 դաշինք։ Նախնական հաշվարկների համաձայն` «Քաղաքացիական պայմանագիր» կուսակցությանը կողմ է քվեարկել ընտրողների 49,82%–ը, «Ուժեղ Հայաստան» դաշինքին` 23,28%–ը, «Հայաստան» դաշինքին` 9,93%–ը։ «Բարգավաճ Հայաստան» կուսակցությունը ստացել է քվեների 3,9%–ը, ինչը նրան թույլ չի տալիս մտնել ԱԺ, սակայն Կենտրոնական ընտրական հանձնաժողովի նախագահ Վահագն Հովակիմյանը հունիսի 8–ին հայտարարել է, որ վերահաշվարկից հետո իրավիճակը կարող է փոխվել։
