Նիկոլը ճիշտ էր՝ ես չկարողացա բացատրել, իսկ նա կարողացավ խաբել ժողովրդին. Սերժ Սարգսյան
10:31 23.04.2026 (Թարմացված է: 11:42 23.04.2026)
© Sputnik / Asatur Yesayants
Բաժանորդագրվել
ՀՀ երրորդ նախագահը համոզված է, որ այս իրավիճակում ընդդիմության հաղթանակն ապահովելու համար անհրաժեշտ է խոշոր միավորում, որպեսզի կանխվի ձայների փոշիացումը, ինչը ծառայելու է այսօրվա վարչախմբի շահերին։
ԵՐԵՎԱՆ, 23 ապրիլի – Sputnik. ՀՀ երրորդ նախագահ Սերժ Սարգսյանն իր հրաժարականի ութամյակի կապակցությամբ հայտարարել է, որ իր կյանքի ամենաճիշտ և դժվար որոշումը «իր իսկ խոստումը դրժելն» ու 2018թվականին վարչապետի պաշտոնում առաջադրվելն էր։
Սարգսյանի խոսքով` 2018-ի գարնանը, երբ ինքն ու իր թիմը հեռացան, դա արեցին՝ կատարելով ժողովրդի կամքը։
«Ցավոք, դա նաև իմ ամենամեծ սխալն էր, որովհետև չստացվեց բացատրել մեր ժողովրդին, որ իմ առաջադրման նպատակը բնավ իշխանությունը պահելը չէր, այլ Ղարաբաղի և Հայաստանի անվտանգությունն ապահովելն էր։ Այո՛, Նիկոլը ճիշտ էր՝ նա պատրաստ էր գնալ մինչև վերջ և չուներ ոչ մի կարմիր գիծ, ես չպետք է առաջադրվեի։ Իսկ ես սխալվեցի՝ կարծելով, թե կարողանալու ենք մեր ժողովրդին բացատրել, որ բանակցային բարդ իրավիճակում իմ հեռանալը հանգեցնելու է աղետի։ Ինձ համար ակնհայտ էր, որ բանակցային այդ փուլում բանակցողի փոփոխությունը, բանակցությունների պատմության զրոյացումը ողբերգական հետևանք է ունենալու. մի բան, որը տեղի ունեցավ»,–նշել է ՀՀ երրորդ նախագահը։
Նա ընդգծել է, որ այս ամենը տեղի ունեցավ ոչ թե որ ինքն ամենալավ բանակցողն էր, այլ որ խորությամբ ճանաչում էր բանակցություններին մասնակցող բոլոր կողմերին, ուներ ինստիտուցիոնալ հիշողություն ու գիտեր Ղարաբաղի ու հաղթանակի արժեքը՝ որպես այդ հաղթանակը կերտած, այնուհետև այն պահած թիմի անդամ։
«Այո՛, Նիկոլը ճիշտ էր՝ ես չկարողացա բացատրել, իսկ նա կարողացավ խաբել մեր ժողովրդին։ 2018թ. վարչապետ առաջադրվելու արդյունքում ես կորցրեցի շատ բան՝ հասկացված չլինելուց մինչև դրա հետևանքով իմ ժողովրդի կողմից մերժում, բայց տարիների հեռավորությունից կարող եմ վստաh ասել՝ նորից կանցնեի այդ քավարանի միջով, որովհետև ես վստահ էի, որ այդպես կկանխենք որևէ աղետ: Ես չկարողացա ժողովրդին բացատրել, որովհետև ժողովուրդը չէր ցանկանում լսել։ Ես «սխալ» էի՝ լինելով ճիշտ»,– նշել է Սարգսյանը։
Նրա խոսքով` 2018 թվականին ինքն առաջադրվել է, որպեսզի երաշխավորի Հայաստանի ու Արցախի անվտանգությունը, որպեսզի սահմաններին չլինի արյունահեղություն, ապա հրաժարական է տվել, որպեսզի սահմանների ներսում թույլ չտա արյունահեղություն։
«Իսկ այսօր՝ իմ հրաժարականից ութ տարի անց, ժողովրդի մի ստվար մաս համարում է, որ Նիկոլի իշխանությունը կա այնքան ժամանակ, քանի դեռ նրա դեմ քաղաքական պայքարի առաջին շարքում «նախկիններն» են։ Ես ենթարկվում եմ ժողովրդի նաև այս պահանջին. եթե իմ և Հանրապետականի մասնակցությունն անգամ մեկ տոկոսով նպաստելու է այսօրվա վարչակազմի վերարտադրությանը, մենք հետքայլ ենք անում, որպեսզի մարդկանց հնարավորություն տանք սթափ, առանց էմոցիաների արտահայտել իրենց կամքը, իսկ մյուս ընդդիմադիր ուժերին՝ անխոչընդոտ իրականություն դարձնել ընտրություններով իշխանափոխության իրենց խոստումը»,–շեշտել է ՀՀ երրորդ նախագահը։
Անդրադառնալով 2021 թվականի ընտրություններին` Սարգսյանը նշել է, որ իրենք մասնակցել են այդ ընտրություններին, որպեսզի փորձեն կանխել Արցախի վերջնական դավաճանումն ու հանձնումը։ Ըստ Սարգսյանի` իր և իր թիմի համար ակնհայտ էր, որ 44 օր «հաղթելու ենք» ստով խաբողն իրականում ժողովրդի թիկունքում հանձնելու էր Արցախը և թշնամու դեմ մենակ էր թողնելու արցախահայությանը՝ որպես հետևանք թշնամու առջև բացելով Հայաստանի դարպասները։
Նա հիշեցրել է, որ ամիսներ առաջ Հանրապետականն առաջարկեց իմպիչմենտի նախագիծը՝ որպես այս իշխանություններից ազատվելու միակ իրատեսական ճանապարհ։ Սարգսյանը վստահ է, որ այս պայմաններում արդար ու մրցակցային ընտրություններն անհնարին էին, սակայն ստեղծված իրավիճակում խորհրդարանական ընդդիմությունը ընտրել է այլ ուղի՝ սպասել ընտրություններին։
ՀՀ երրորդ նախագահը համոզված է, որ այս իրավիճակում ընդդիմության հաղթանակն ապահովելու համար անհրաժեշտ է խոշոր միավորում, որպեսզի կանխվի ձայների փոշիացումը, ինչը ծառայելու է այսօրվա վարչախմբի շահերին։
Հիշեցնենք` ՀՀ–ում հերթական խորհրդարանական ընտրությունները կկայանան 2026 թվականի հունիսի 7-ին։
