Թեհրանը հայտարարել է, որ ԱՄՆ-ն և Իսրայելը կարող են փորձել ապակայունացնել իրավիճակը ներսից
© Photo : IRNA
Բաժանորդագրվել
Երկրի ներսում վարձկանները կհամարվեն իսրայելցի զինվորներ, հայտարարել են Իրանի իշխանությունները։
ԵՐԵՎԱՆ, 3 մարտի – Sputnik. ԱՄՆ-ն և Իսրայելը կարող են փորձել ապակայունացնել իրավիճակն Իրանում ներսից։ Այս մասին, ՌԻԱ Նովոստիի փոխանցմամբ, հայտարարել է Իրանի հետախուզության նախարարությունը։
«Ամերիկա-սիոնիստական թշնամին նախատեսում է որոշակի թվով վարձկաններ ներգրավել՝ խաթարելու համար իսլամական հայրենիքի անվտանգությունը։ Երկրի ներսում վարձկանները իսրայելցի զինվորներ կհամարվեն և նրանց հետ վճռական կվարվեն», – ասվում է նախարարության հայտարարության մեջ, որը ներկայացրել է Իրանի պետական հեռուստառադիոընկերությունը։
Հիշեցնենք` չնայած Ժնևում Օմանի միջնորդությամբ Վաշինգտոնի և Թեհրանի միջև իրանական «միջուկային դոսյեի» շուրջ բանակցություններին, ԱՄՆ-ն և Իսրայելը փետրվարի 28-ի առավոտյան հարվածներ են հասցրել Իրանին։ Սպանվել են երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և Պաշտպանության խորհրդի քարտուղար Ալի Շամխանին: Հորմոզգան նահանգի Մինաբ քաղաքում աղջիկների համար նախատեսված «Շաջարե Թայեբե» տարրական դպրոցի ռմբակոծությունից զոհվել է 170 երեխա ու աշխատակից։ Երկրում 40-օրյա սուգ է հայտարարվել:
Իրանը պատասխան հրթիռային հարվածներ է հասցրել Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:
