Փաստաբանների պալատը մտահոգ է պետության ներկայիս գործելաոճի առնչությամբ
21:40 22.10.2025 (Թարմացված է: 22:23 22.10.2025)
Բաժանորդագրվել
Փաստաբանի նկատմամբ խափանման միջոց կիրառելիս պետք է հաշվի առնել նաև նրա վստահորդների պաշտպանվածության հարցը։
ԵՐԵՎԱՆ, 22 հոկտեմբերի – Sputnik. Փաստաբանների իրավունքների պաշտպանության հանձնաժողովը իր խիստ մտահոգությունն է հայտնում պետության ներկայիս շարունակվող գործելաոճի առնչությամբ և շեշտում, որ այն չի բխում ժողովրդավարական հասարակության շահերից։ Այս մասին նշված է պալատի տարածած հայտարարության մեջ։
Ավելի վաղ հայտնի դարձավ, որ Քննչական կոմիտեն կալանքի միջնորդություն է ներկայացրել հոկտեմբերի 20-ին Գյումրիում ձերբակալված փաստաբան Ռուբեն Մխիթարյանի վերաբերյալ։ Օրեր առաջ էլ դատարանը կալանավորման որոշում կայացրեց փաստաբան Ալեքսանդր Կոչուբաևի վերաբերյալ։
Հանձնաժողովը․
• ԽՍՏԱԳՈՒՅՆՍ ԴԱՏԱՊԱՐՏՈՒՄ Է իր օրինական մասնագիտական գործունեության կապակցությամբ փաստաբանի նկատմամբ իրականացվող ցանկացած հետապնդում, առավել ևս՝ իրավունքների սահմանափակման այնպիսի բացառիկ միջոցի կիրառումը, ինչպիսին կարող է լինել կալանավորումը.
• ՊԱՀԱՆՋՈՒՄ Է իրավասու մարմիններին մանրամասն քննության ենթարկել Ռուբեն Մխիթարյանի և նրա պաշտպանների հաղորդումները փաստաբանի մասնագիտական գործունեության և իրավաբանական օգնություն տրամադրելու շրջանակներում ձերբակալվելու մասին.
• ՀՈՐԴՈՐՈՒՄ Է համապատասխան պետական մարմիններին և պաշտոնատար անձանց ձեռնպահ մնալ փաստաբանական գործունեության անկախությունը, մասնագիտական գործունեության ազատությունը վտանգող և փաստաբանի մասնագիտության հեղինակությունն խաթարող հետագա գործողություններից:
Փաստաբանների պալատը հիշեցնում է, որ փաստաբանի անկախությունը նրա մասնագիտական գործունեության առանցքային հիմքերից է: Ընդգծում են՝ փաստաբանի նկատմամբ խափանման միջոց կիրառելու հարցը քննարկելիս պետք է ուշադրության կենտրոնում ունենալ նաև նրա վստահորդների իրավունքների պաշտպանության հարցերը: Պետք է շատ ծանրակշիռ հիմքեր լինեն, որոնք կհիմնավորեն՝ քրեական վարույթը չի կարող իրականացվել առանց փաստաբանի մեկուսացման և փաստաբանի նկատմամբ անհարեժշտ է կիրառել ամենածանր խափանման միջոցը՝ կալանքը:
Հիշեցնենք՝ հոկտեմբերի 20-ին ուժայինները ներխուժեցին Գյումրու քաղաքապետարան, որպեսզի բերման ենթարկեն համայնքապետ Վարդան Ղուկասյանին։ Հակակոռուպցիոն կոմիտեն հայտարարեց, որ 8 անձ է ձերբակալվել մի խումբ պաշտոնատար անձանց կողմից խոշոր չափերով կաշառք ստանալու, վերջիններիս կաշառք տալու մեղադրանքներով։ Ժամեր անց Ղուկասյանն ինքը դուրս եկավ համայնքապետարանի շենքից և մոտեցավ իրավապահների ավտոմեքենային։ Այդ ընթացքում քաշքշուկ սկսվեց համայնքապետարանի շենքը շրջապատած ոստիկանների ու համայնքապետի կողմնակիցների միջև։ Ուժայինները 23 մարդու ձերբակալեցին, այդ թվում` իր մասնագիտական գործունեությունն իրականացնող փաստաբան Ռուբեն Մխիթարյանի նկատմամբ։ «Մեր ձևով» ժողովրդական շարժման անդամ, իրավաբան, փաստաբան Ռուբեն Մխիթարյանին մեղադրանք է առաջադրվել ՀՀ քրեական օրենսգրքի երկու հոդվածներով։ Նրա կալանքի միջնորդությունը քննվելու է այսօր` ժամը 20.30-ին, Շիրակի մարզի առաջին ատյանի ընդհանուր իրավասության դատարանում` դատավոր Վարսենիկ Մելքոնյանի նախագահությամբ:
