Մանվել Գրիգորյանի ժառանգներից և փոխկապակցված անձանցից 1,2 մլրդ դրամի գույք կբռնագանձվի
10:44 21.10.2025 (Թարմացված է: 11:05 21.10.2025)
© Sputnik / Asatur Yesayants
Բաժանորդագրվել
Հակակոռուպցիոն դատարանը դատախազության հայցապահանջը մասնակի է բավարարել։
ԵՐԵՎԱՆ, 21 հոկտեմբերի – Sputnik. ՀՀ ԱԺ նախկին պատգամավոր, ԵԿՄ նախկին նախագահ Մանվել Գրիգորյանի ժառանգներից և նրան փոխկապակցված անձանցից հօգուտ ՀՀ-ի կբռնագանձվի ավելի քան 1,2 միլիարդ դրամի գույք ու դրամական միջոց։ Տեղեկությունը հայտնում է ՀՀ գլխավոր դատախազությունը։
Նշվում է, որ 2022 թվականի հունիսի 28-ին գլխավոր դատախազության կողմից դատարան էր ներկայացվել ապօրինի ծագում ունեցող գույքի բռնագանձման վերաբերյալ հայցադիմում, Հակակոռուպցիոն դատարանը դատախազության հայցապահանջը բավարարել է մասնակի։
Ըստ որոշման` վճիռն օրինական ուժի մեջ մտնելուց հետո հօգուտ ՀՀ-ի կբռնագանձվի հետևյալ գույքը.
1.
Արմավիրի մարզի Վաղարշապատ համայնքի Մաշտոցի փողոցում գտնվող տարածքը.2.
Վաղարշապատ համայնքի Ալավերդյան փողոցում գտնվող բնակելի տունը.3.
Արմավիրի մարզի Արշալույս համայնքում գտնվող կիսակառույց բնակելի տունը.4.
Վաղարշապատ համայնքի Սպարապետ Վազգեն Սարգսյան փողոցում գտնվող բնակելի տունը.5.
Վաղարշապատ համայնքի Անդրանիկ թաղամասում գտնվող բնակելի տունը.6.
Վաղարշապատ համայնքի Չարենց 1-ին թաղամասում գտնվող բնակելի տունը.7.
Վաղարշապատ համայնքի Ա.Մանուկյան թաղամասում գտնվող կիսակառույց բնակելի տունը.8.
Արմավիրի մարզի Արշալույս բնակավայրի 17 փողոցում գտնվող հողամասը.9.
Կոտայքի մարզի Հրազդան համայնքի Միկրոշրջան թաղամասի Զ.Անդրանիկի պողոտայում գտնվող հասարակական կառուցապատման հողամասը.10.
MAYBACH մակնիշի ավտոմեքենան.11.
TOYOTA LC 200 4.0 մակնիշի ավտոմեքենան, GAZ 22 մակնիշի ավտոմեքենան, GAZ 24 մակնիշի ավտոմեքենան, GAZ 24-02 մակնիշի ավտոմեքենան և MOSKVICH 407 մակնիշի ավտոմեքենան.12.
Գինու, կոնյակի գործարանին տրված 254 միլիոն դրամի փոխառության պահանջի իրավունքը.13.
Բաց բաժնետիրական ընկերությանը տրված 33 միլիոն դրամի փոխառության պահանջի իրավունքը.14.
Երկու բանկերում առկա շուրջ 9 հազար ԱՄՆ դոլարի ավանդը.15.
Բաց բաժնետիրական ընկերությանը տրված 14 միլիոն 592 հազար դրամի փոխառության պահանջի իրավունքը.16.
Էջմիածնի «Գրիգոր Լուսավորիչ» համալսարանին տրված 4 միլիոն 777 հազար դրամի փոխառության պահանջի իրավունքը.17.
Սահմանափակ պատասխանատվությամբ ընկերության 15,9456% բաժնեմասը.18.
Բանկում առկա 14 միլիոն 715 հազար դրամի և 300 ԱՄՆ դոլարի ավանդները.19.
224 հազար դրամ՝ որպես օրինական եկամուտներով չհիմնավորվող ծախս.20.
14 միլիոն 654 հազար դրամ՝ որպես ապօրինի դրամական միջոցների մնացորդ:Նշվում է, որ հայցադիմումի մերժված մասով գլխավոր դատախազությունը կներկայացնի վերաքննիչ բողոք:
Հիշեցնենք՝ Մանվել Գրիգորյանը ձերբակալվել էր 2018 թվականի հունիսի 16-ին, իսկ հունիսի 19-ին նրան մեղադրանք էր առաջադրվել։
Նա մեղադրվում էր ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակություն կազմակերպելու մեջ:
2020 թվականի հունվարի 15-ին առողջական վիճակի պատճառով Գրիգորյանը կալանքից ազատ էր արձակվել։ Նրա նկատմամբ որպես խափանման միջոց էր ընտրվել չհեռանալու մասին ստորագրությունը:
Գեներալ–լեյտենանտը մահացավ 2020 թվականի նոյեմբերի 19-ին:
