Արարատ Միրզոյանը Եգիպտոսում շփվել է Ադրբեջանի իր պաշտոնակցի` Բայրամովի հետ
20:51 13.10.2025 (Թարմացված է: 20:54 13.10.2025)
Բաժանորդագրվել
Հայաստանի և Ադրբեջանի ԱԳ նախարարները վերջին անգամ կարճ հանդիպում են ունեցել սեպտեմբերի 25–ին Նյու Յորքում։
ԵՐԵՎԱՆ, 13 հոկտեմբերի – Sputnik․ ՀՀ արտաքին գործերի նախարար Արարատ Միրզոյանը Շարմ Էլ Շեյխում շփվել է Ադրբեջանի իր պաշտոնակցի` Ջեյհուն Բայրամովի հետ։ Տեղեկությունը հայտնում է ՀՀ ԱԳՆ մամուլի ծառայությունը։
Նշվում է, որ Միրզոյանը Շարմ Էլ Շեյխում է` ՀՀ վարչապետի պատվիրակության կազմում մասնակցու Մերձավոր Արևելքի խաղաղության գագաթնաժողովին։
«Միջոցառման շրջանակում նախարարը շփումներ է ունեցել մի շարք երկրների, այդ թվում՝ Սաուդյան Արաբիայի, Ադրբեջանի, Իսպանիայի, Օմանի, Ֆրանսիայի, Հորդանանի, Եգիպտոսի, Թուրքիայի, Նորվեգիայի, Հնդկաստանի ԱԳ նախարարների և այլ պաշտոնյաների հետ»,– ասված է արտաքին գերատեսչության հաղորդագրության մեջ:
Նշենք, որ Հայաստանի և Ադրբեջանի ԱԳ նախարարները վերջին անգամ «ոտքի վրա» կարճ հանդիպում են ունեցել սեպտեմբերի 25–ին Նյու Յորքում` ԱՄՆ պետքարտուղար Մարկո Ռուբիոյի կազմակերպած տրանսատլանտյան ընթրիքից առաջ։
Հիշեցնենք, որ այսօր ՀՀ վարչապետ Նիկոլ Փաշինյանն աշխատանքային այցով ժամանել է Եգիպտոսի Արաբական Հանրապետություն։ Փաշինյանը ԱՄՆ նախագահ Դոնալդ Թրամփի և Եգիպտոսի նախագահ Աբդել Ֆաթթահ աս-Սիսիի հրավերով այսօր կմասնակցի Մերձավոր Արևելքի Խաղաղության գագաթնաժողովին։ Մինչ գագաթնաժողովը նաև Նիկոլ Փաշինյանն էր շփում ունեցել Իլհամ Ալիևի հետ։
