Սա սահմանադրական կարգի տապալման հայտարարություն է․ Մինասյանը` «4–րդ հանրապետության» մասին
12:34 02.10.2025 (Թարմացված է: 12:35 02.10.2025)
Բաժանորդագրվել
Պատգամավորի խոսքով՝ անհրաժեշտ է, որ դատախազությունն ու քննչական մարմիններն իրավական գնահատական տան այս հայտարարություններին։
ԵՐԵՎԱՆ, 2 հոկտեմբերի – Sputnik․ «Երրորդ հանրապետությունից» «Չորրորդ հանրապետությանն» անցնելու հայտարարությունների հետևում սահմանադրական կարգի տապալման հատկանիշներ կան։ Այսօր ԱԺ-ում այս մասին հայտարարեց «Հայաստան» խմբակցության քարտուղար Արծվիկ Մինասյանը։
«Հպարտորեն հայտարարում եք «4–րդ հանրապետության» մասին, կարո՞ղ եք նկարագրել 3–րդ հանրապետությունը, որ դուք «հերոսաբար» տապալում եք և ստեղծում եք չորրորդը, կամ եթե չեք տապալում, դադարեցնում եք դրա գոյությունը։ Եթե դուք Երրորդ Հանրապետությունը՝ որպես պետություն, ասում եք` չկա այլևս, չորրորդն ենք ստեղծում, սա սահմանադրական կարգի տապալման ուղիղ հայտարարություն է։ Դուք հասկանու՞մ եք, որ եթե որևէ հանրապետության գոյություն դադարեցնում եք՝ ստեղծելով նորը, նշանակում է՝ դուք գործել եք էն հանրապետության դեմ, որի Սահմանադրության շրջանակներում եկել եք իշխանության»,- հայտարարեց Մինասյանը։
Ընդգծեց՝ ՔՊ-ականների հայտարարություններն առերևույթ պարունակում են ծանր և առանձնապես ծանր հանցագործության հատկանիշներ՝ ուղղված ՀՀ սահմանադրական կարգի դեմ։
Հավելեց՝ կարիք կա, որ դատախազությունն ու քննչական մարմիններն այս և այլ հարցերով լրջորեն զբաղվեն, քանի որ իրավական գնահատականի կարիք կա։
Նշենք, որ սեպտեմբերի 20-ին՝ Անկախությանն տոնի նախօրեին, Նիկոլ Փաշինյանը ՔՊ կուսակցական համագումարում հայտարարեց Հայաստանի 4–րդ հանրապետություն ստեղծելու ցանկության մասին։
