3 ամիս առաջ դրված մեր ստորագրությունները փոխանցում եմ «Պատիվ ունեմ»–ին. Սաղաթելյան
13:59 26.09.2025 (Թարմացված է: 14:42 26.09.2025)
© Sputnik
Բաժանորդագրվել
«Հայաստան» խմբակցության պատգամավորը հայտարարեց` ակնկալում է, որ ողջամիտ ժամանակահատվածում հնարավոր կլինի լրացնել պակասող ստորագրությունները և իմպիչմենտի իրական մեկնարկը տալ ԱԺ դահլիճում։
ԵՐԵՎԱՆ, 26 սեպտեմբերի – Sputnik. «Հայաստան» խմբակցությունն իր 28 պատգամավորի ստորագրությունը փոխանցում է «Պատիվ ունեմ» խմբակցությանը` ՀՀ վարչապետ Նիկոլ Փաշինյանի իմպիչմենտի գործըթնաց սկսելու համար։ Այդ մասին այսօր Ազգային ժողովում «Պատիվ ունեմ» խմբակցության նախաձեռնած «Ազգային ճգնաժամի և կառավարման ձախողման մասին» հայտարարության նախագծի շուրջ խորհրդարանական լսումների ժամանակ հայտարարեց «Հայաստան» խմբակցության պատգամավոր Իշխան Սաղաթելյանը։
Նա հայտարարեց, որ «Հայաստան» խմբակցությունն ամբողջովին համամիտ է «Պատիվ ունեմ»–ի հայտարարությամբ ներկայացված փաստերի ու հիմնավորումների հետ։
«Վերահաստատում ենք մեր դիրքորոշումները, որ Փաշինյանի կառավարման շրջանում բազմաթիվ անգամ խախտվել է մեր սահմանադրական կարգը, նա գործել է պետական դավաճանության հատկանիշներով և նրան պաշտոնազրկելու իրավաքաղաքական հիմքերն անհերքելի են։ Մենք կողմ ենք այս հայտարարությանը և կողմ ենք քվեարկելու»,– հայտարարեց պատգամավորը։
Իշխանյանն ընդգծեց, որ իրենք միանում են իմպիչմենտի գործընթացին և այդ մասին իրենք հայտարարել են դեռ երեք ամիս առաջ։
Ишхан Сагателян во время парламентских слушаний по инициативе фракции "Честь имею" (26 сентября 2025). Еревaн
© Sputnik
Նշեց, որ հիմա այն պահն է, որ բոլոր ուժերը պետք է կենտրոնացնել իշխանական պատգամավորների վրա, որպեսզի կարողանան ունենալ պակասող անհրաժեշտ ստորագրությունները և սկսել գործընթաց։
«Հաշվի առնելով նոր իրողությունը և մեր գործընկերների վստահեցումները, ես մեր խմբակցության գործընկերների կողմից երեք ամիս առաջ դրված ստորագրությունները հիմա կփոխանցեմ «Պատիվ ունեմ» խմբակցությանը` կցելու իմպիչմենտի գործընթացին և ֆիքսելու, որ մեր ստորագրությունները կային ինչպես երեք ամիս առաջ, այնպես էլ հիմա։ Հիմա ուշադրություն` խուսափելու համար թյուրիմացություններից` եթե դա չբավարարի ու ֆիքսվի, որ տեխնիկական խնդիր կա, այս ստորագրությունները կտեղափոխվեն նաև այն ձևաթղթի տակ, որը ներկայացնում է «Պատիվ ունեմ» խմբակցությունը»,– հայտարարեց Սաղաթելյանը։
Նա ընդգծեց` ակնկալում է, որ ողջամիտ ժամանակահատվածում հնարավոր կլինի լրացնել պակասող ստորագրությունները և իմպիչմենտի իրական մեկնարկը տալ ԱԺ դահլիճում։
Սաղաթելյանի այս ելույթին հետևեցին ծափահարություններ։
Հիշեցնենք` ընդդիմադիր ակտիվիստ, քաղաքական գործիչ Էդգար Ղազարյանն ու «Վետօ» շարժման անդամ Նարեկ Մալյանը ապրիլի 28-ին 107 նամակներ ուղարկեցին ԱԺ 107 պատգամավորներին՝ առաջարկելով խելամիտ ժամկետում վարչապետի իմպիչմենտ նախաձեռնելու գործընթաց սկսել։
Депутаты во время парламентских слушаний по инициативе фракции "Честь имею" (26 сентября 2025). Еревaн
© Sputnik
Մայիսի 2-ին «Հայաստան» խմբակցությունը հայտարարեց, որ պատրաստ է միանալ ՀՀ վարչապետ Նիկոլ Փաշինյանի նկատմամբ իմպիչմենտ նախաձեռնելու գործընթացին, եթե նման գործընթաց նախաձեռնողները կարողանան ապահովել պակասող 8 պատգամավորի ստորագրությունը։
«Պատիվ ունեմ» խմբակցությունը մայիսի 6-ին պատասխանեց առաջարկին` հայտարարելով, որ դեռ չունեն վարչապետի թեկնածու, և որ իրենց պատրաստակամությունն են հայտնում առանց որևէ նախապայմանի քննարկելու թեկնածուի հարցը։
Հունիսի 7–ին «Պատիվ ունեմ» խմբակցությունը հայտարարեց, որ որոշել է անվստահություն հայտնել ՀՀ վարչապետ Նիկոլ Փաշինյանին և վարչապետի թեկնածու առաջադրել Մասիս համայնքի ղեկավար Դավիթ Համբարձումյանին։
