Որքա՞ն մթերք է արտահանվել. Փաշինյանի կարծիքով` ՀՀ–ն բարեկեցության ամենաբարձր կետում է
12:04 28.08.2025 (Թարմացված է: 12:05 28.08.2025)
Նիկոլ Փաշինյանը ասուլիսին. Արխիվային լուսանկար
© Sputnik / Aram Nersesyan
Բաժանորդագրվել
ՀՀ էկոնոմիկայի նախարարի խոսքով` 2025 թ. առաջին կիսամյակում գյուղատնտեսության ծավալն աճել է 7,3 %–ով, այդ թվում՝ բուսաբուծությունը՝ 13,4 %–ով, անասնապահությունը՝ 3 %–ով։
ԵՐԵՎԱՆ, 28 օգոստոսի – Sputnik. 2025 թ. հունվար–հուլիսին Հայաստանից թարմ պտուղ–բանջարեղեն արտահանվել է 103 260 տոննա, որը 11.2 տոննայով գերազանցել է նախորդ տարի նույն ժամանակահատվածի` 92 838 տոննա ցուցանիշը։ Այդ մասին ՀՀ կառավարության նիստի ժամանակ հայտարարեց ՀՀ էկոնոմիկայի նախարար Գևորգ Պապոյանը։
Անդրադառնալով մյուս ապրանքների արտահանմանը` նախարարը նշեց, որ տոննաներով ծաղիկի արտահանումն այս տարի կազմել է 1 245 տոննա, որն ավելի քան 110 տոկոով ավելի է նախորդ տարվա ցուցանիշից` 2024 թվականին` 533 տոննա։
Ծաղիկի` հատով արտահանումն այս տարի կազմել է 53.5 մլն հատ, որը 10 տոկոսով ավելի է նախորդ տարվա ցուցանիշից` 2024 թվականին` 49,1 մլն հատ։
Ծիրանն այս տարի արտահանվել է 44 208 տոննա` մոտ 25 տոկոսով ավելի նախորդ տարվա ցուցանիշից` 2024 թվականին արտահանվել է 33 400 տոննա։
Այս տարի կեռաս արտահանվել է 4 317 տոննա, ավելի քան 90 տոկոսով ավելի անցած տարվա ցուցանիշից` 2024 թվականին` 2 270 տոննա։
Դեղձի արտահանումն այս տարի կազմել է 6 295 տոննա` արձանագրելով ավելի քան 60 տոկոս աճ նախորդ տարվա նույն ժամանակահատվածի համեմատ` 2024 թվականին արտահանվել է 3 941 տոննա։
Նախարարն ավելացրեց, որ 2025 թ. առաջին կիսամյակում գյուղատնտեսության ծավալն աճել է 7,3 %–ով, այդ թվում՝ բուսաբուծությունը՝ 13,4 %–ով, անասնապահությունը՝ 3 %–ով։
ՀՀ վարչապետ Նիկոլ Փաշինյանը հայտարարեց, որ այս ցուցանիշներն ուրախալի են, քանի որ տարիներ շարունակ գյուղատնտեսության ոլորտում կամ ցածր ցուցանիշներ էին արձանագրվում, կամ անկում էր լինում։
«Պետք է ընդգծեմ, որ հենց այսօր` օգոստոսի 28–ի դրությամբ, ՀՀ–ն գտնվում է բարեկեցության պատմականորեն ամենաբարձր կետում։ Սա ես չեմ ասում որպես արտառոց մի բան»,– ընդգծեց նա։
Որպես իր խոսքի հիմնավորում` Փաշինյանը նշեց, որ ՀՀ քաղաքացիները 2018 թվականի համեմատ 50 տոկոսով ավելի լավ են ապրում։
