Նոր Նորքի թաղապետը հրաժարական տվեց
09:47 19.05.2025 (Թարմացված է: 09:59 19.05.2025)
Երևանի Նոր Նորք վարչական շրջանի թաղապետ Տիգրան Տեր–Մարգարյանը . Արխիվային լուսանկար
© Photo : press office of the Yerevan Municipality
Բաժանորդագրվել
Ավինյանը շնորհակալություն հայտնեց, ասաց, որ գնահատում է Տեր–Մարգարյանի որոշումը և կրկին զսպվածության կոչ արեց։
ԵՐԵՎԱՆ, մայիսի 19 – Sputnik. Երևանի Նոր Նորք վարչական շրջանի թաղապետ Տիգրան Տեր–Մարգարյանը սկանդալից` թաղապետարանում ակտիվիստին ծեծելուց 20 օր անց հրաժարական ներկայացրեց։ Նա այդ մասին ասաց քաղաքապետարանի գործակարգավարականի ժամանակ։
«Հանուն մանդատի ճամբարից ճամբար թռած անձիք ԱԺ ամբիոնից սկսեցին քննարկել իմ վարքագիծը։ Համոզված եմ, որ շահարկման առարկա է դառնալու նաև այն, որ ես, լինելով Նոր Նորքի վարչական ղեկավարը, խոչընդոտում են դատավարական ընթացքին։ Խոսքս ուզում են ուղղել ԱԺ–ում ծվարած որոշ մադադագողերի` 2026–ին մենք հանդիպելու ենք, և ես մասնակիցն եմ լինելու ձեր քաղաքական վախճանին»,–իր հրաժեշտի խոսքում ասաց նա` շնորհակալություն հայտնելով «Հանրապետություն» կուսակցության ղեկավար Արամ Սարգսյանին (այդ կուսակցության անդամ է Տեր–Մարգարյանը) և քաղաքապետ Տիգրան Ավինյանին։
Ավինյանը շնորհակալություն հայտնեց, ասաց, որ գնահատում է Տեր–Մարգարյանի որոշումը և կրկին զսպվածության կոչ արեց` նշելով, թե իրենց գործում սադրանքներ անընդհատ լինելու են։
Հիշեցնենք՝ ապրիլի 30-ին Նոր Նորքի թաղապետ Տիգրան Տեր–Մարգարյանն ու թաղապետարանի աշխատակիցները ծեծեցին ակտիվիստ Արթուր Չախոյանին։ Վնասվածքներ ստացած Չախոյանը ձերբակալվեց, ապա ոստիկանության բաժանմունքից տեղափոխվեց հիվանդանոց։ Ավելի ուշ նա ազատ արձակվեց։ Միջադեպը տեղի ունեցավ այն բանից հետո, երբ Չախոյանը հայտարարեց, որ կոռուպցիոն սխեմա է բացահայտել՝ կապված մանկապարտեզի կառուցման հետ:
Նոր Նորքի թաղապետարանում ծեծկռտուքից հետո քրեական վարույթ նախաձեռնվեց, որով թաղապետն ու ևս 3 աշխատակիցներ անցնում են ֆիզիկական բռնության հոդվածով, իսկ Արթուր Չախոյանն ու Երևանի ավագանու անդամ Մեսրոպ Մանուկյանը՝ խուլիգանության։
Մայիսի 5–ին քաղաքապետ Տիգրան Ավինյանը թաղապետարանում տեղի ունեցած ծեծկռտուքը որակեց սադրանքի հետևանք, Նոր Նորքի թաղապետը ներողություն խնդրեց քաղաքապետից ու հանրությունից։ Մայիսի 7-ին ԱԺ-ում վարչապետ Նիկոլ Փաշինյանն էլ հայտարարեց՝ կատարվածից պետք է բխեն հետևանքներ։
Մայիսի 15–ին լուրեր տարածվեցին, թե Տիգրան Տեր–Մարգարյանը հրաժարական է տվել։ Sputnik Արմենիայի հետ զրույցում նա ոչ հերքեց, ոչ հաստատեց այդ լուրը։
