«Մեղքը ձեր վիզը». Արտակ Բեգլարյանն արձագանքել է Ալեն Սիմոնյանին
10:49 18.03.2025 (Թարմացված է: 11:03 18.03.2025)
Արցախի նախկին պետնախարար Արտակ Բեգլարյանը. Արխիվային լուսանկար
© Sputnik / Aram Nersesyan
Բաժանորդագրվել
Արցախի նախկին պետնախարարը նշել է, որ իր մտադրությունն ու դրդապատճառը շատ պարզ են՝ հերթական անգամ ապացուցել, որ պետության գործառույթը իր քաղաքացիների իրավունքների պաշտպանությունն է, ոչ թե խախտումը, այն էլ՝ նման մեծ մասշտաբով:
ԵՐԵՎԱՆ, 18 մարտի – Sputnik. Արցախի նախկին պետնախարար Արտակ Բեգլարյանը չի հրաժարվել ՀՀ–ին դատի տալու իր որոշումից և կարծում է, որ դատական ակտերը ուղղված են լինելու որոշումները կայացնող անձանց դեմ: Այդ մասին նա գրել է «Ֆեյսբուքի» իր էջում։
Նա այդպես անդրադարձել է ՀՀ ԱԺ նախագահ Ալեն Սիմոնյանի այն հայտարարությանը, թե եթե այդպես ուժեղ են արցախցիները, թող գնան պայքարեն այն մարդկանց դեմ, ովքեր որ իրենց դեմ իրական քայլեր են արել, ոչ թե սեփական երկրի ընտրված իշխանության դեմ։ Սիմոնյանի այս և մյուս հայտարարությունները Բեգլարյանը որակել է որպես կիսատ–պռատ մանիպուլյացիաներ՝ իր հայտարարության վերաբերյալ։
«Այո՛, շատ լուրջ, դատի եմ տալու այն անձանց, ովքեր որոշում կկայացնեն միջազգային ատյաններից հետ վերցնելու մի ողջ ժողովրդի (այդ թվում՝ իմ) իրավունքների պաշտպանության համար ներկայացված գանգատները: Հաշվի առեք, որ ես ստիպված եմ ՀՀ-ին դատի տալու, քանի որ դուք թաքնվում եք պետական մարմինների քողի տակ՝ ձեր բացարձակ սխալ ու հանցավոր որոշումները կայացնելիս: Ամեն դեպքում, վերջին հաշվով այդ դատական ակտերը ուղղված են լինելու այդ որոշումները կայացնող անձանց դեմ»,– գրել է Բեգլարյանը:
Նա նշել է, որ վաղուց օգնել ու օգնում է բազմաթիվ մարդկանց՝ դատի տալու իրենց վրա կրակած ադրբեջանական պետությանն ու հանցագործներին:
«Եթե կոկորդ չեմ պատռում ու կուրծք չեմ ծեծում, դա դեռ չի նշանակում, թե պարապ նստած եմ: Ի դեպ, ասեմ, որ ես ժամանակին մեծապես օգնել եմ նաև ՀՀ լիազոր մարմիններին հավաքագրելու ծանրակշիռ ապացույցներ միջազգային ատյաններում Ադրբեջանի դեմ ներկայացված ՀՀ միջպետական գանգատների համար, որոնցից դուք ապօրինի ու թեթևսոլիկ կերպով հրաժարվում եք»,– ընդգծել է Բեգլարյանը:
Արցախի նախկին պետնախարարը նշել է, որ իր մտադրությունն ու դրդապատճառը շատ պարզ են՝ հերթական անգամ ապացուցել, որ պետության գործառույթը իր քաղաքացիների իրավունքների պաշտպանությունն է, ոչ թե խախտումը, այն էլ՝ նման մեծ մասշտաբով:
«Սեփական քաղաքացիների ու հարկատուների դեմ հոխորտալու և թշնամու հրահանգներն իրականացնելու փոխարեն ուղղակի կատարե՛ք ձեր ստանձնած պարտավորությունները և ապահովե՛ք մեր իրավունքների պաշտպանությունը, այդ թվում՝ միջազգային ամենաքաղաքակիրթ մեխանիզմներով»,– գրել է Բեգլարյանը:
Ըստ նրա` եթե իշխանություններն ուզում են իրական ու կայուն խաղաղություն լինի, ուրեմն պետք է ձգտեն արդար ու արժանապատիվ լուծումների, այդ թվում՝ տեղի ունեցած մարդու իրավունքների խախտումների քննման ու հետևանքների վերացման տեսքով:
«Երբ արդար, արդյունավետ ու համարժեք լուծումներ տաք գանգատներում ներկայացված հիմնախնդիրներին ու խախտումներին, միայն այդ ժամանակ կարող եք հրաժարվել այդ գանգատներից: Մնացած դեպքերում՝ մեղքը ձեր վիզը»,– ընդգծել է Արցախի նախկին պետնախարարը:
Հիշեցնենք` մարտի 13-ին հայտնի դարձավ, որ Երևանն ու Բաքուն ավարտել են խաղաղության պայմանագրի տեքստի շուրջ բանակցությունները՝ համաձայնեցնելով վերջին երկու կետերը, որոնք վերաբերում էին սահմանային հատվածներից երրորդ ուժերի (տվյալ դեպքում՝ Հայաստանում ԵՄ առաքելության. խմբ.) դուրսբերմանը և միջազգային դատական ատյաններ ներկայացված հայցերից հրաժարվելուն։
