Մայրը՝ հայ, հայրը՝ հնդիկ․ ո՞վ է Համահայկական ձմեռային 2-րդ խաղերի ամենափոքրիկ մասնակիցը
08:55 04.02.2025 (Թարմացված է: 15:18 04.02.2025)
© Sputnik / Aram NersesyanՆիկիտա Կումար Նազարյանը

Նիկիտա Կումար Նազարյանը
© Sputnik / Aram Nersesyan
Բաժանորդագրվել
Համահայկական խաղերի պատմության մեջ առաջին անգամ ամենամեծ թվով մասնակիցները սպորտային պարահանդեսային պարեր մարզաձևի ներկայացուցիչներն են։
ԵՐԵՎԱՆ, 4 փետրվարի – Sputnik. Համահայկական ձմեռային 2-րդ խաղերի ամենափոքրիկ մասնակիցը Հնդկաստանի միակ ներկայացուցիչ 5-ամյա Նիկիտա Կումար Նազարյանն է, որը հանդես է գալիս սպորտային պարահանդեսային պարեր մարզաձևում։
© Sputnik / Aram NersesyanՆիկիտա Կումար Նազարյան

Նիկիտա Կումար Նազարյան
© Sputnik / Aram Nersesyan
Նիկիտայի մայրիկը հայուհի է, հայրիկը՝ հնդիկ, ծանոթացել են Հայաստանում, ամուսնացել ու տեղափոխվել Դելի։ Թեպետ «տեղափոխվել» բառն այս դեպքում այնքան էլ տեղին չէ. տարվա մի մասը Հնդկաստանում են, մյուս մասը՝ Հայաստանում, Նիկիտան մանկապարտեզ է հաճախում միաժամանակ Հայաստանում և Հնդկաստանում։ Մայրիկը՝ Մերին, հոգ է տանում, որ դուստրը հինդիին զուգահեռ նաև հայերեն խոսի։
© Sputnik / Aram NersesyanՆիկիտա Կումար Նազարյանը մոր և մարզչի հետ

Նիկիտա Կումար Նազարյանը մոր և մարզչի հետ
© Sputnik / Aram Nersesyan
Մեկ տարի առաջ Նիկիտան սկսեց սպորտային պարեր սովորել, ու նոր խնդրի բախվեցին. սպորտային պարերի մասնագետ Միլենա Բարսեղյանը Հայաստանում է, ու երբ աղջնակն այստեղ է, պարապմունքները ստուդիայում են անցկացվում, իսկ երբ Հնդկաստանում է, օնլայն են պարապում շաբաթական 2 կամ երեք անգամ։
© Sputnik / Aram NersesyanՆիկիտա Կումար Նազարյան

Նիկիտա Կումար Նազարյան
© Sputnik / Aram Nersesyan
«Նիկիտան իր տարիքի համար բավականին հասուն է, արագ է սովորում և կարող է մեծ հաջողություններ ունենալ»,– Sputnik Արմենիային ասաց Միլենան։
© Sputnik / Aram NersesyanՄիլենա Բարսեղյան

Միլենա Բարսեղյան
© Sputnik / Aram Nersesyan
Այս անգամ փոքրիկ Նիկիտան հաղթահարեց 2 կիաաեզրափակիչները, երրորդում փոքրիկ սխալ թույլ տվեց ու չանցավ եզրափակիչ։
Նշենք, որ այս տարի սպորտային պարահանդեսային պարեր մարզաձևի մոտ 250 մասնակիցներն 8 երկրի (Հայաստան, Ռուսաստան, Վրաստան, Ղազախստան, Ֆրանսիա, Հնդկաստան, Լիբանան, ԱՄՆ) 29 քաղաքներից են։ Պարի և սպորտային պարերի համահայկական խորհրդի նախագահ, միջազգային կարգի մրցավար Մարիաննա Մամյանը նշում է՝ այսքան մեծաթիվ մասնակցություն չէին սպասում։
«Այսքան մեծ թվով մասնակիցներ անգամ ամառային խաղերին չեն եղել։ Սա նշանակում է, որ տարեցտարի ավելի է մեծանում հետաքրքրությունը խաղերի նկատմամբ, մասնակիցներն այսպես ասած գովազդում են, թե ինչքան լավ է անցնում, հաջորդ խաղերին ավելի շատ մարդ է գալիս, և հայկական ծագումով մարդիկ միավորվում են մի գաղափարի շուրջ»,- Sputnik Արմենիային ասաց Մամյանը։
Կազմակերպիչները կարծում են՝ սփյուռքում ապրող շատերի համար խաղերին մասնակցելը նաև հայրենադարձության ճամփա է դառնում։
Հիշեցնենք` Համահայկական ձմեռային 2–րդ խաղերը մեկնարկել են փետրվարի 1-ին Ջերմուկում։ Ներկայացված է 7 մարզաձև՝ ձնամարտ, դահուկավազք, սնոուբորդ, լեռնադահուկ, հոկեյ, սպորտային պարեր։Նշված մարզաձևերից երեքի մրցումներն այլ վայրում են անցկացվում, հոկեյը՝ Երևանում, իսկ սնոուբորդի ու լեռնադահուկասպորտի մրցումները՝ փետրվարի 5-ին և 6-ին Եղիպատրուշում՝ «Մայլեռ» լեռնադահուկային հանգստի գոտում։