https://arm.sputniknews.ru/20241127/operajin-ashkharhi-nvou-haun-labirintn-arajin-angam-henc-hajastanjan-bemum-kcucadrvi-83401941.html

Օպերային աշխարհի նոու-հաուն․ «Լաբիրինթն» առաջին անգամ հենց հայաստանյան բեմում կցուցադրվի

Օպերային աշխարհի նոու-հաուն․ «Լաբիրինթն» առաջին անգամ հենց հայաստանյան բեմում կցուցադրվի

Sputnik Արմենիա

Ներկայացման ստեղծագործական թիմը հույս ունի, որ այն Հայաստանում մեծ հաջողություն կունենա։ 27.11.2024, Sputnik Արմենիա

2024-11-27T08:55+0400

2024-11-27T08:55+0400

2024-11-27T18:20+0400

օպերա

օպերայի և բալետի ազգային ակադեմիական թատրոն

երևան

հայաստան

պրեմիերա

https://cdn.am.sputniknews.ru/img/07e8/0b/1a/83396423_0:0:1600:901_1920x0_80_0_0_fecf405a14f182629e731a478261c32c.jpg

Վերջին 300-400 տարիներին գրված օպերային գլուխգործոցները միավորվել են մեկ ներկայացման մեջ. Ալեքսանդր Սպենդիարյանի անվան օպերայի և բալետի ազգային ակադեմիական թատրոնի բեմում պրեմիերա է՝ «Լաբիրինթ» ներկայացումն առաջինը հենց հայկական բեմում է ցուցադրվում։ Նախագծի պրոդյուսեր, գաղափարի ու սցենարի հեղինակ, ռուսաստանաբնակ Օլեգ Թումանովն ասում է՝ սա օպերային աշխարհում յուրօրինակ նոու-հաու է։«Սա օպերա է, որն աշխարհում նմանը չունի։ Ես բազմիցս ասել եմ, որ լավագույն ստեղծագործությունները հարյուրամյակներ առաջ են գրվել։ Աշխարհում չկան այնպիսի օպերային գլուխգործոցներ, որոնք գոնե վերջին 50 տարում գրված լինեն։ Նման բան երևի որևէ մեկը չի արել, այստեղ հավաքված են օպերային արվեստի լավագույն ստեղծագործությունները՝ իրենց գլխավոր հերոսներով։ Այս հայտնի գործերով այլ պատմություն է ձևավորվում»,- ներկայացնում է Թումանովը։Ասում է՝ մարդիկ այսօր օպերային թատրոն են գնում ու անընդհատ նույնն են դիտում, աշխարհի տարբեր բեմերում գրեթե նույն ներկայացումներն են՝ ռեժիսորական տարբեր մոտեցումներով։ Դրա համար էլ Թումանովի մոտ մտահղացում ծնվեց՝ լրիվ նոր մի բան ստեղծել։Իսկ ինչպե՞ս ստացվեց, որ պաստիչչո ժանրի ներկայցման պրեմիերան հենց հայկական բեմում է։ Պատմությունը որքան ռոմանտիկ, այնքան էլ իրական է․ Օլեգ Թումանովն այս տարվա գարնանն առաջին անգամ Հայաստան եկավ՝ Ազգային արխիվում նախնիների մասին տեղեկություններ որոնելու։«Սա երևի տարիքի հետ է գալիս, երբ երիտասարդ ես, ճամփորդում ես, աշխատում, հասուն տարիքում արդեն այլ մտքեր են գալիս։ Հայրս Ստեփանակերտում է ծնվել, իսկ պապիկս Լոռուց է՝ Դսեղից։ Մեր ազգանունը Թումանով է, պարզ է, որ այն ժամանակ Թումանյան ենք եղել։ Ինչ իմանամ՝ միգուցե մեծ բանաստեղծի հետ ազգակցական կապ էլ կա»,- ասում է Օլեգ Թումանովը։Երկրորդ հայրենիքը գտնելուց բացի Թումանովը նաև հանդիպում ունեցավ Օպերային թատրոնի ղեկավարության հետ, կիսվեց իր գաղափարով։ Այն սիրով ընդունվեց․ ամիսներ անց Թումանովը վերադարձավ Հայաստան՝ նաև աշխարհի տարբեր բեմերում հանդես եկող օպերային երգիչների, ստեղծագործական ու տեխնիկական անձնակազմի հետ։«Որոշվեց, որ հայկական կողմն էլ անպայման ներգրավված լինի ներկայացման մեջ, որովհետև գաղափարի հեղինակը հայ է, և իր համար շատ կարևոր էր հայկական մասնակցությունը։ Երգչախումբն ու նվագախումբը Հայաստանից են։ Արտիստներն աշխարհի տարբեր երկրներից են, որոնք հանդես են գալիս Լա Սկալայում, Մարիինյան թատրոնում, Մեծ թատրոնում․․․ Օլեգ Թումանովն արտիստների ընտրությունը կատարելիս մի սկզբունք է հաշվի առել, որ նա հենց տվյալ արիայի լավագույն կատարողը լինի»,- ասում է նախագծի ղեկավար Անի Եփրիկյանը։Հավելում է՝ սա կարևոր իրադարձություն է մեր երկրի համար՝ աշխարհի հզորագույն ստեղծագործությունները հայաստանյան բեմում տեսնել։ Հպարտությամբ է խոսում նաև արտիստների՝ հայաստանյան տպավորությունների մասին։ Բոլորն են ոչ միայն տպավորված ջերմ ընդունելությամբ, այլև հիացած են մեր երկրով։Դիրիժոր Դմիտրի Վոլոսնիկովը Երևանը համեմատում է Փարիզի հետ։«Մենք ապրում ենք Սարյան փողոցում, երբ դուրս եմ գալիս զբոսնելու, ինձ Մոնմարտրում եմ զգում»,- նշում է Վոլոսնիկովը։Խոսելով ներկայացման մասին՝ ընդգծում է՝ իր համար սա շատ հետաքրքիր աշխատանք է, սիրում է ամեն նոր բան ու էքսպերիմենտներ։«Մենք ներկայացնելու ենք այնպիսի ստեղծագործություններ, որոնք Հայաստանում չեն կատարվում։ Բավականին դժվար գործեր են։ Նվագախմբի հետ աշխատանքը շատ լավ է ստացվում, լեզվական խոչընդոտներ չկան, երաժշտության լեզուն բոլորիս հասկանալի է, ի վերջո, ներկայացումն էլ հավերժական թեմայի՝ սիրո մասին է»,- ասում է դիրիժորը։ՌԴ վաստակավոր արտիստ, բարիտոն Վասիլի Լադյուկը ևս առաջարկը սիրով ընդունեց։ Ասում է՝ անհնար է օպերային բոլոր հիթերը հավաքել մեկ տեղում, բայց «Լաբիրինթում» դրանցից շատերն են․ սա յուրահատուկ գործ է։«Օրինակ իմ կերպարը շատ հետաքրքիր է՝ ես կարծես թե չկամ, բայց միաժամանակ միշտ ներկա եմ, իմ առաջին մուտքը՝ լավագույն պարտիան է բարիտոնների համար՝ «Սևիլյան սափրիչի» Ֆիգարոն, ես հայտնվում եմ սափրիչի կերպարով, բայց այդ ամենը ճիշտ չէ, ես իրականում սրտակեր հերոս եմ։ Ի վերջո, նաև դիվական կերպարով եմ ներկայանում, կատարում եմ Քամիլ Սեն-Սանսի «Մահվան պարը»՝ օրիգինալ տարբերակով»,- պատմում է Լադյուկը։«Լաբիրինթի» թիմը հույս ունի, որ հայաստանցի հանդիսատեսի սպասումները կարդարացնեն։ Իսկ հետո՝ կմեկնեն համաշխարհային շրջագայության։Ի դեպ, «Լաբրինթը» կցուցադրվի 3 օր՝ նոյեմբերի 28-ից 30-ը։

երևան

2024

Լուրեր

am_HY

օպերա, օպերայի և բալետի ազգային ակադեմիական թատրոն, երևան, հայաստան, պրեմիերա