Նախաքննությունը թափանցիկ չի արվել. իրավապաշտպանը` Բաքվում պահվող գերիների մասին
Բաժանորդագրվել
Իրավապաշտպանի պնդում է` հայ ռազմագերիների պաշտպանության տեսանկյունից նշանակություն ունեցող փաստաթղթերը գաղտնի են պահվել, ինչն ազդեցություն է ունենում արդյունավետ պաշտպանության իրավունքի վրա։
ԵՐԵՎԱՆ, 4 հուլիսի – Sputnik. Արցախի ռազմաքաղաքական ղեկավարության և Ադրբեջանում պահվող մյուս հայերի նկատմամբ հարուցված քրեական գործերի նախաքննությունը թափանցիկ չի եղել։ Այս մասին Sputnik Արմենիայի հետ զրույցում ասաց իրավապաշտպան Սիրանուշ Սահակյանը։
Հունիսի 24-ին Ադրբեջանի գլխավոր դատախազ Քյամրան Ալիևը հայտարարել է, որ Արցախի ռազմաքաղաքական ղեկավարության և Բաքվում պահվող մյուս հայերի նկատմամբ հարուցված քրեական գործերի նախաքննությունն ավարտվել է, մեղադրական եզրակացությունն էլ ուղարկվել դատարան, 15 մեղադրյալի վերաբերյալ գործերը տրվել են մեղադրյալներին ու նրանց փաստաբաններին` ծանոթանալու համար։
Ըստ Սիրանուշ Սահակյանի` Ադրբեջանում բացակայում է արդար դատավարությունը, պետական մակարդակով էլ հայատյաց քաղաքականություն է տարվում։ Նրա խոսքով` իրականացվող դատավարությունների ելքը նախապես կանխորոշված է, հատկապես որ Ադրբեջանի օրենսդրությունը թույլ չի տալիս դրսից այլ փաստաբան ներգրավել։ Ըստ իրավապաշտպանի` Ադրբեջանի վարած քաղաքականությունը հիմքեր է տալիս մտածելու, որ այս գործերը շինծու են, նրանց փաստական և իրավական հիմքերը բացակայում են, ինչպես նաև քաղաքական ենթատեքստ ունեցող քաղաքական պատվեր է իրականացվում։
«Նախաքննությունը ոչ թափանցիկ ձևով է իրականացվել։ Իհարկե, նախաքննության փուլում մինչդատավարական վարույթի գաղտնիություն գոյություն ունի, բայց հատկապես հանրային հնչեղություն ունեցող գործերով հիմնական տեղեկատվությունը պետք է հասանելի լինի։ Այս պարագայում շատ ընտրողաբար և քարոզի նպատակներով է տեղեկություն տրամադրվել։ Այս անձանց պաշտպանության տեսանկյունից նշանակություն ունեցող փաստաթղթերը գաղտնի են պահվել, ինչն ազդեցություն է ունենում արդյունավետ պաշտպանության իրավունքի վրա։ Այս հաղորդագրությունն ազդարարում է նախաքննության ավարտը, պետք է սպասենք, որ այս գործերը վարույթ ընդունվեն դատարանների կողմից, նիստեր նշանակվեն»,– ասաց Սահակյանը։
Նրա խոսքով` ՀՀ–ն չի կարող արդարադատության սպասումներ ունենալ, քանի որ ադրբեջանական դատական համակարգը բավականին կախյալ է, փաստաբաններն էլ` խոցելի։
Հարցին, թե երբ գործերը դատարաններում կլինեն, իրավապաշտպանը դժվարացավ ճշգրիտ ժամկետներ ասել` նշելով, որ մոտակա շաբաթների ընթացքում դատավարություն դժվար թե լինի։
Սահակյանն ընդգծեց, որ Ադրբեջանում պահվող բոլոր հայերն են անմարդկային վերաբերմունքի և խոշտանգումների ենթարկվում, և Արցախի նախկին ղեկավարությունն էլ բացառություն չէ։
«Հարցը գերզգայուն է, ու նրանց վերաբերյալ ցանկացած հայտարարություն և հրապարակում կարող է բացասաբար ազդել հայրենադարձման գործընթացի վրա, հատկապես այս անձանց (Արցախի ղեկավարների. խմբ.) մասով։ Բոլորի ընտանիքներն առանձնահատուկ զգոնություն և զգուշավորություն են դրսևորում։ Առանձին վարք ենք տեսնում Ռուբեն Վարդանյանի և իր ընտանիքի կողմից, կարծում եմ` նրանք էլ նախընտրում են բարձրաձայնել այդ հարցերը, քան լռել»,– ասաց իրավապաշտպանը։
Ըստ նրա` ռազմագերիների վերադարձի մարդասիրական հարցն օգտագործվում է որպես ճնշման գործիք և հավելյալ ազդեցություն է թողնում ՀՀ իշխանությունների վրա։
Սիրանուշ Սահակյանը նշեց, որ Ադրբեջանում այս պահին 23 հայ գերի կա` ներառյալ ռազմաքաղաքական ղեկավարությունը։
Հիշեցնենք` «Free Armenian prisoners» շարժումը հուլիսի 3-ին «Ֆեյսբուքի» իր էջում գրել է, որ ԱՄՆ Ատլանտյան խորհրդում անցած շաբաթ անցկացված քննարկման ժամանակ Ադրբեջանը ներկայացնող Էսմիրա Ջաֆարովան Բաքվում ապօրինի կալանավորված քաղբանտարկյալ, Արցախի նախկին պետնախարար Ռուբեն Վարդանյանի մասին սուտ տեղեկություն է հաղորդել` ասելով, թե ԿԽՄԿ–ն այցից հետո եզրահանգել է այն մտքին, որ Վարդանյանի կալանքի պայմանները միջազգային չափանիշներին համապատասխանում են։
Ռուբեն Վարդանյանի փաստաբանական թիմը վերջերս հրատապ դիմում էր ներկայացրել ՄԱԿ-ի Խոշտանգումների հարցերով հատուկ զեկուցողին և մանրամասն ներկայացրել Վարդանյանի նկատմամբ իրականացված խոշտանգումների և միջազգային բազմաթիվ չափանիշներ ոտնահարող կալանքի պայմանների մասին։
