Բագրատ սրբազանը նոր ժամանակ տվեց Նիկոլ Փաշինյանին՝ հրաժարական տալու
19:49 09.05.2024 (Թարմացված է: 19:58 09.05.2024)
Բագրատ սրբազանը Հանրապետության հրապարակում
© Sputnik / Marianna Paytyan
Բաժանորդագրվել
Հանրապետության հրապարակում շարունակվում է «Տավուշը հանուն հայրենիքի» շարժման կողմնակիցների հանրահավաքը։
ԵՐԵՎԱՆ, 9 մայիսի - Spsutnik. Մեկ ժամն անցավ, ՀՀ վարչապետը հրաժարական չտվեց. Բագրատ սրբազանը Հանրապետության հրապարակում հանրահավաքի մասնակիցներին ուղղված խոսքում նոր ժամանակ տվեց Նիկոլ Փաշինյանին հրաժարական տալու համար` մինչև 20։00–ն։
«Ժողովուրդ ջան, զգում եք, չէ՞, ով է կառավարում այս երկիրը։ Ստախոսությունների շարքը մինչև այս ժամն էլ չի ընդհատվում։ Ասել էր, չէ՞, որևէ խնդիր լինի, կհավաքվեք հրապարակում, ես ձեզ կներկայացնեմ մանրամասն և դուք կասեք «այո» կամ «ոչ»։ Երևի մարդ չկա հրապարակում, հա՞։ Կամ էլ նա մեզ մարդ չի համարում։ Մենք շատ խաղաղ, շատ հանգիստ, համբերությամբ կսպասենք մինչև ժամը 20.00–ն, մինչև զանգերի խփելը»,–ասաց Բագրատ սրբազանը։
Հանրապետության հրապարակում շարունակվում է «Տավուշը հանուն հայրենիքի» շարժման կողմնակիցների հանրահավաքը։ Ավելի վաղ Բագրատ սրբազանը դիմելով Նիկոլ Փաշինյանին՝ պահանջել էր նրա հրաժարականը՝ վերջնաժամկետ տալով մինչ ժամը 19.40-ը։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ էին անում Հայաստան-Վրաստան միջպետական ճանապարհին` դեմ արտահայտվելով սահմանազատման այն տարբերակին, որը համաձայնեցրել են Երևանն ու Բաքուն։
Չնայած այդ ամենին` հայ–ադրբեջանական սահմանին արդեն 40 սահմանային սյուն է տեղադրվել։
Սահմանազատման դեմ պայքարողները Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ Կիրանցից քայլերթով շարժվել են Երևան` միակողմանի սահմանազատման գործընթացը կասեցնելու նպատակով։
