ՀՀ–ն ու Իրանը խորացնում են մշակութային համագործակցությունը. փաստաթուղթ է ստորագրվել
16:08 03.05.2024 (Թարմացված է: 16:09 03.05.2024)
© Photo : press office of MESCS of RAԺաննա Անդրեասյաննընդունել է Իրանի մշակույթի և իսլամական հաղորդակցության կազմակերպության նախագահ Մոհամմադ Մեհդի Իմանիփուրի գլխավորած պատվիրակությանը
Ժաննա Անդրեասյաննընդունել է Իրանի մշակույթի և իսլամական հաղորդակցության կազմակերպության նախագահ Մոհամմադ Մեհդի Իմանիփուրի գլխավորած պատվիրակությանը
© Photo : press office of MESCS of RA
Բաժանորդագրվել
Իրանի մշակույթի և իսլամական հաղորդակցության կազմակերպության նախագահը համոզված է, որ տարբեր ուղղություններով երկկողմ համագործակցության մեծ ներուժ կա։
ԵՐԵՎԱՆ, 3 մայիսի – Sputnik. Հայաստանն ու Իրանը խորացնում են մշակութային համագործակցությունը. այդ նպատակով այսօր ՀՀ կրթության, գիտության, մշակույթի և սպորտի նախարարությունում «Հայաստանի Հանրապետության և Իրանի Իսլամական Հանրապետության միջև 2024-2027 թթ. մշակութային համագործակցության մասին» ծրագիր է ստորագրվել։ Տեղեկությունը հայտնում է գերատեսչության մամուլի ծառայությունը։
Նշվում է, որ ԿԳՄՍ նախարարն ընդունել է Իրանի մշակույթի և իսլամական հաղորդակցության կազմակերպության նախագահ Մոհամմադ Մեհդի Իմանիփուրի գլխավորած պատվիրակությանը: Ծրագիրը ստորագրվել է իրանցի պաշտոնյայի այցի շրջանակում։
Անդրեասյանը կարևորել է տարբեր ուղղություններով Հայաստանի և Իրանի միջև առկա համագործակցությունը և այն խորացնելու պատրաստակամություն հայտնել:
«Համոզված եմ՝ այս ծրագրի ստորագրումն առաջիկա տարիներին հնարավորություն կտա առավել ընդլայնելու հարաբերություններն ու խթանելու տարբեր կառույցների, անհատ ստեղծագործողների և ստեղծագործական խմբերի միջև համագործակցությունը, երկու երկրներում անցկացվող միջազգային մշակութային միջոցառումներին մասնակցությունը, անմիջական կապերի հաստատումն ու փորձի փոխանակումը»,- ասել է նախարարը՝ հարաբերությունների զարգացման գործում կարևորելով նաև երկու երկրների դեսպանությունների դերակատարումը:
Մոհամմադ Մեհդի Իմանիփուրին էլ համոզմունք է հայտնել, որ տարբեր ուղղություններով երկկողմ համագործակցության շատ ավելի մեծ ներուժ կա։ Նա առանձնահատուկ կարևորել է ՀՀ կառավարության՝ կրթության տարբեր մակարդակներում տարածաշրջանային լեզուների ուսուցում իրականացնելու ծրագիրը:
Հանդիպման ընթացքում քննարկվել են նաև Հայաստանի և Իրանի միջև կրթության ու գիտության ոլորտներում հարաբերությունների առավել ամրապնդմանը, տարբեր բնագավառներում համագործակցության օրակարգի ընդլայնմանն ու զարգացմանը վերաբերող մի շարք այլ հարցեր: