Ե՞րբ կհանդիպեն Հայաստանի և Ադրբեջանի արտգործնախարարները Ղազախստանում. ՀՀ ԱԳՆ–ի պատասխանը
10:31 26.04.2024 (Թարմացված է: 10:33 26.04.2024)
© Sputnik / Andranik Ghazaryan
Բաժանորդագրվել
Ավելի վաղ Ղազախստանի նախագահը Երևանում հայտարարել էր, որ պատրաստ են առավելագույնս աջակցել երկու երկրների խաղաղության համաձայնագրի հարցում և հարթակ տրամադրել բանակցելու համար։
ԵՐԵՎԱՆ, 26 ապրիլի – Sputnik. Ղազախական կողմի առաջարկով Հայաստանի և Ադրբեջանի ԱԳ նախարարների հնարավոր հանդիպման ամսաթվի մասին հայտնի կդառնա, երբ դրա շուրջ պայմանավորվածություն ձեռք բերվի։ Sputnik Արմենիային հայտնեցին ՀՀ արտաքին գործերի նախարարությունից։
«ՀՀ-ն դիտարկում է և կողմ է այն միջնորդական ջանքերին կամ բանակցությունների անցկացման հարթակներին, որոնք իրապես միտված են Հարավային Կովկասում հարատև խաղաղության հասնելու նպատակին, աջակցում են հիմնարար սկզբունքների ու փոխհամաձայնեցված փաստաթղթերի, այդ թվում՝ 1991թ. Ալմա Աթայի հռչակագրի հիման վրա Հայաստանի և Ադրբեջանի կողմից միմյանց տարածքային ամբողջականության ճանաչման ու սահմանազատման գործընթացին»,- շեշտում են ԱԳՆ-ում։
Ավելի վաղ Ադրբեջանի նախագահ Իլհամ Ալիևը հայտարարել էր, որ Ղազախստանը դիմել է իրենց` Ադրբեջանի և Հայաստանի արտգործնախարարների հանդիպում անցկացնելու առաջարկով, և Ադրբեջանը համաձայնել է։ Ալիևի խոսքով՝ եթե Հայաստանը ևս համաձայնի, հանդիպումը կկայանա Ղազախստանում։
Ապրիլի 15-ին էլ Ղազախստանի նախագահ Կասիմ–Ժոմարտ Տոկաևը Երևան կատարած պաշտոնական այցի ժամանակ հայտարարեց, որ Ղազախստանը պատրաստ է առավելագույն աջակցություն ցուցաբերել ՀՀ և Ադրբեջանի միջև խաղաղության համաձայնագրի հարցում և հարթակ տրամադրել երկու երկրների միջև բանակցությունների համար։
Հիշեցնենք` Միրզոյան–Բայրամով վերջին հանդիպումը կայացել է փետրվարի 28-29–ը Գերմանիայի մայրաքաղաք Բեռլինում։ Ըստ պաշտոնական հաղորդագրության` կողմերը պայմանավորվել են շարունակել խաղաղության պայմանագրի շուրջ բանակցությունները։
