Բրյուսելում նախատեսված հանդիպումն ուղղված չէ որևէ 3-րդ կողմի դեմ․ ՀՀ ԱԳՆ խոսնակ
22:33 27.03.2024 (Թարմացված է: 22:42 27.03.2024)
© Sputnik / Andranik Ghazaryan
Բաժանորդագրվել
Անի Բադալյանը շեշտել է, որ այն պնդումները, թե իբր ապրիլի 5-ին նախատեսված եռակողմ հանդիպումը կարող է որևէ մեկի դեմ ուղղված լինել, անտեղին, անհիմն և արհեստածին են։
ԵՐԵՎԱՆ, 27 մարտի – Sputnik. Բրյուսելում ապրիլի 5-ին նախատեսված բարձր մակարդակի հանդիպումը ՀՀ վարչապետ Նիկոլ Փաշինյանի, Եվրոպական հանձնաժողովի նախագահ Ուրսուլա Ֆոն դեր Լյայենի և ԱՄՆ պետքարտուղար Էնթոնի Բլինկենի միջև նվիրված է լինելու Հայաստան-ԵՄ-ԱՄՆ համագործակցության ամրապնդմանը և որևէ երրորդ կողմի դեմ ուղղված չէ և չէր էլ կարող լինել: «Արմենպրեսին» տված հարցազրույցում այս մասին ասել է ՀՀ ԱԳՆ մամուլի խոսնակ Անի Բադալյանը՝ անդրադառնալով ադրբեջանական կողմի այն դիտարկմանը, թե այն ներառական չէ, ինչպես նաև կարող է դրդել Հայաստանին ապակայունացնել իրավիճակը տարածաշրջանում։
«Ինչ վերաբերում է տարածաշրջանում իրավիճակն ապակայունացնելու, բանակցային գործընթացում հայկական կողմի կառուցողական չլինելու մասին Ադրբեջանի մեղադրանքներին, թույլ տվեք ևս մեկ անգամ վերահաստատել, որ Հայաստանը պատրաստ է Ադրբեջանի հետ արդեն իսկ համաձայնեցված սկզբունքների հիման վրա գնալ խաղաղության պայմանագրի անհապաղ ստորագրմանը, սահմանների սահմանազատման, տարածաշրջանային կոմունիկացիաների բացման»,- նշել է Բադալյանը:
Նա ևս մեկ անգամ հիշեցրել է այդ սկզբունքնեը.
1.
Հայաստանը և Ադրբեջանը միմյանց ինքնիշխանությունը և տարածքային ամբողջականությանը փոխադարձաբար ճանաչում են 1991 թ. Ալմա Աթայի հռչակագրի հիման վրա:2.
Երկու երկրների միջև սահմանազատման և սահմանագծման աշխատանքներն իրականացում են Ալմա Աթայի հռչակագրի հենքի վրա: Սա նշանակում է, որ Հայաստանի և Ադրբեջանի միջև ոչ թե նոր սահման պիտի ստեղծվի, այլ պետք է գետնի վրա վերարտադրվեն այն սահմանները, որոնք ԽՍՀՄ շրջանակներում դե յուրե գոյություն են ունեցել 1991 թ․ Ալմա Աթայի հռչակագիրն ընդունելու պահին: Սահմանագծի վերարտադրությունից հետո դե յուրե յուրաքանչյուր երկրին պատկանող տարածքները պետք է լինեն այդ երկրի վերահսկողության ներքո:3.
Տարածաշրջանային կոմունիկացիաների ապաշրջափակում՝ դրանց անցման երկրների ինքնիշխանության և իրավազորության հարգմամբ՝ հավասարության և փոխադարձության սկզբունքի հիման վրա:Բադալյանը նշել է, որ ադրբեջանական կողմը տարբեր արհեստածին պատրվակներով ձգձգում և խաթարում է խաղաղության գործընթացը, այդ թվում շարունակաբար մերժելով ԵՄ–ի և ԱՄՆ–ի կողմից արվող միջնորդական առաջարկները։
«Ներառականության վերաբերյալ դժգոհելու փոխարեն Ադրբեջանը կարող է ի վերջո ընդունել ԱԳ նախարարների մակարդակով Վաշինգտոնում, իսկ երկրների ղեկավարների մակարդակով` Բրյուսելում հանդիպելու առաջարկները։ Տեղին է թերևս նաև հիշատակել Ադրբեջանի կողմից շարունակվող գործողությունները, տարածաշրջանային նախագծերից Հայաստանին դուրս թողնելու, ներառականության սկզբունքն ամեն կերպ խաթարելու ջանքերը, ինչի վառ օրինակ է Սևծովյան ստորջրյա էլեկտրական մալուխ ծրագրին Հայաստանի մասնակցության խոչընդոտումը»,- ասել է ՀՀ ԱԳՆ խոսնակը։
Նա ընդգծել է, որ հայկական կողմն ապրիլի 5-ին նախատեսված եռակողմ այդ հանդիպումից ակնկալում է բովանդակային քննարկումներ ունենալ առկա քաղաքական երկխոսության, տնտեսական, էներգետիկ ոլորտներում ՀՀ կարողությունների զարգացման, ՀՀ-ի առջև ծառացած հումանիտար խնդիրների հասցեագրման շուրջ։
Հարցին, որ ադրբեջանական կողմն իր դժգոհությունն է կրկին արտահայտել ՀՀ-ում ԵՄ մշտադիտարկման առաքելության վերաբերյալ, Բադալյանը հիշեցրել է, որ 2022 թ. հոկտեմբերի 6-ին Պրահայում տեղի ունեցած քառակողմ հանդիպմանն Ադրբեջանն ինքը ողջունել է ոչ միայն ՀՀ-ում, այլև Ադրբեջանում ԵՄ մշտադիտարկման առաքելություն տեղակայելու ԵՄ խորհրդի նախագահի և Ֆրանսիայի նախագահի կողմից արված առաջարկը: Ավելի ուշ Ադրբեջանը հրաժարվել է այդ դիրքորոշումից:
