Հանձնաժողովի անդամը մարդ է բերում ընտրատեղամաս. ինչ հաղորդումներ է ստացել ոստիկանությունը
13:03 17.09.2023 (Թարմացված է: 21:56 17.09.2023)
Արմեն Մկրտչյան
© Sputnik / Aram Nersesyan
Բաժանորդագրվել
ՆԳՆ ոստիկանությունից հայտնեցին, որ ահազանգերով կատարվում են ստուգողական աշխատանքներ։
ԵՐԵՎԱՆ, 17 սեպտեմբերի – Sputnik. ՀՀ ՆԳՆ ոստիկանությունը ժամը 08։00–ից ստացել է երեք հաղորդում։ Տեղեկությունը հայտնեց ՀՀ ՆԳՆ ոստիկանության շտաբի պետ Արմեն Մկրտչյանը` ներկայացնելով Երևանի ավագանու ընտրությունների ընթացքում ստացված հաղորդումները։
«Ստացվել և քննարկվել է ստուգման ենթակա 2 տեղեկություն, որոնցից մեկը` երկու մեքենաներով ճանապարհը փակելու, մյուսը` մտավոր խնդիրներ ունեցող որդու տվյալները ընտրացուցակում հայտնվելու մասին։ Իսկ երրորդը անհայտ քաղաքացուց է այն մասին, որ հանձնաժողովի անդամը մարդ է բերում ընտրատեղամաս»,–ասաց շտաբի պետը։
Մկրտչյանը հավելեց, որ նշված բոլոր ահազանգերով կատարվում են ստուգողական աշխատանքներ։
ՀՀ ՆԳՆ ոստիկանության շտաբի պետը ներկայացրեց նաև նախընտրական ժամանակաշրջանում, քարոզարշավի ընթացքում (օգոստոսի 23-ից սեպտեմբերի 16–ը) ոստիկանություն ստացված հաղորդումները։ Նշված ժամանակահատվածում ՆԳՆ ոստիկանությունը ստացել է 26 հաղորդում, որոնցից 8–ը` առերևույթ հանցագործության հատկանիշներ պարունակող, իսկ 18–ը` ստուգման ենթակա այլ տեղեկություններ։
«Հանցագործության մասին ստացված բոլոր 8 հաղորդումները ուղարկվել են ՀՀ քննչական կոմիտե, որոնցից 7–ով նախաձեռնվել են քրեական վարույթներ»,– նշեց նա։
Հանցագործության հատկանիշներ պարունակող հաղորդումներից 4–ը վերաբերել են քարոզչությունը խոչընդոտելու դեպքերին, 2–ը` գույքը ոչնչացնելուն կամ վնասելուն, 1–ը` հավաք անցկացնելուն կամ դրան մասնակցելուն խոչընդոտելուն կամ հարկադրելուն, և 1–ը` ընտրական իրավունքի խոչընդոտման դեպք է։
Հիշեցնենք` Երևանում այսօր ավագանու ընտրություններ են անցկացվում, որին մասնակցում են 13 կուսակցություն և 1 դաշինք.
«Հայաստանի եվրոպական» կուսակցություն (թեկնածուն` Տիգրան Խզմալյան),
«Ժողովրդավարական համախմբում» կուսակցություն (Սուրեն Պետրոսյան),
«Քաղաքացիական պայմանագիր» կուսակցություն (Տիգրան Ավինյան),
«Հանուն սոցիալական արդարության» կուսակցություն (Արման Ղուկասյան),
«Ուժը հայրենյաց» կուսակցություն (Նելլի Հարությունյան),
«Հանրային ձայն» կուսակցություն (Արտակ Գալստյան),
«Ազգային առաջընթաց» կուսակցություն (Հայկ Մարության),
«Հաղթանակ» կուսակցություն (Վիկտոր Մնացականյան),
«Ապրելու երկիր» կուսակցություն (Մանե Թանդիլյան),
«Հանրապետություն» կուսակցություն (Արտակ Զեյնալյան),
«Միացյալ Հայաստան» կուսակցություն (Երվանդ Թարվերդյան),
«Արդար Հայաստան» կուսակցություն (Նորիկ Նորիկյան),
«Լուսավոր Հայաստան» կուսակցություն (Դավիթ Խաժակյան),
«Մայր Հայաստան» դաշինք («Երկիր Ծիրանի» և «Ինտելեկտուալ Հայաստան կուսակցություններ) (Անդրանիկ Թևանյան)։
Նշենք, որ ժամը 08։00–ին Երևանի 12 վարչական շրջաններում բացվել են 475 ընտրական տեղամասերի դռները։
Երևանի քաղաքի գրանցում ունեցող քաղաքացիները կարող են մինչև երեկոյան 20։00–ն մասնակցել ավագանու ընտրություններին և իրենց քվեն տալ նախընտրած ուժին։
Սեպտեմբերի 7-ի դրությամբ Երևանում ընտրողների թիվը կազմում է 824 հազար 250։ Ըստ վարչական շրջանների` ամենաշատ ընտրողները Շենգավիթ համայնքում են` 110780, իսկ ամենաքիչը Նուբարաշենում` 8065։
