Չեմ կարծում, որ ԱՄՆ–ն ուզում է ԼՂ–ում Բաքվի կողմից էթնիկ զտումների մաս լինել. Միրզոյան
13:48 22.08.2023 (Թարմացված է: 15:24 22.08.2023)
© Sputnik / Asatur Yesayants
Բաժանորդագրվել
Արարատ Միրզոյանը շեշտեց, որ ՄԱԿ ԱԽ–ի հնարավոր բանաձևի շնորհիվ հնարավոր կլիներ կողմերին վերադարձնել բանակցությունների օրակարգ։
ԵՐԵՎԱՆ, 22 օգոստոսի – Sputnik. ՀՀ արտգործնախարար Արարատ Միրզոյանի կարծիքով`ԱՄՆ–ն չի ցանկանում Լեռնային Ղարաբաղում Ադրբեջանի կողմից իրականացվող էթնիկ զտումների մաս կազմել։ Այս մասին Միրզոյանն ասաց Բելգիայի Թագավորության ԱԳ նախարար Հաջա Լահբիբի հետ համատեղ մամուլի ասուլիսում` անդրադառնալով այն դիտարկմանը, թե ԱՄՆ–ն խափանում է ՄԱԿ Անվտանգության խորհրդի կողմից բանաձևի ընդունման գործընթացը։
Արցախի շրջափակումը
2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցինԱրցախը ՀՀ–ին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեցԼաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև ՀՀ–ից մատակարարվող գազից և էլեկտրաէներգիայից։
Հուլիսի 26-ին առաջին անհրաժեշտության շուրջ 400 տոննա ապրանքով բեռնված 19 բեռնատար Երևանից ուղևորվեց շրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։
«Աշխարհը տեսնում է ԼՂ ժողովրդի նկատմամբ Ադրբեջանի կողմից իրականացվող էթնիկ զտումների քաղաքականությունը։ Չեմ կարծում, թե ԱՄՆ–ն որևէ կերպ պատրաստվում է կամ ցանկանում է մաս կազմել, նպաստել էթնիկ զտումների այդ քաղաքականությանը։ Ինձ համար դժվար կլինի դա պատկերացնելը։ Կարծում եմ և հուսով եմ, որ ԱՄՆ–ում շատ լավ հասկանում են Լեռնային Ղարաբաղում հումանիտար ճգնաժամի չափերն ու ահագնացող տեմպերը»,– ասաց ՀՀ ԱԳ նախարարը։
Նրա կարծիքով` ԱՄՆ–ում գիտակցում են, որ ՄԱԿ ԱԽ–ի հնարավոր բանաձևը կօգներ հանգուցալուծել այս իրավիճակը, որով վերջ կտրվեր ԼՂ–ում հումանիտար ճգնաժամին։ Միրզոյանը շեշտեց, որ այդ բանաձևի շնորհիվ նաև հնարավոր կլիներ կողմերին վերադարձնել բանակցությունների օրակարգ։
Հիշեցնենք, որ Հայաստանը օգոստոսի 11-ին դիմել էր ՄԱԿ-ի Անվտանգության խորհրդին՝ խնդրելով Լեռնային Ղարաբաղի լիակատար շրջափակման հետևանքով հումանիտար իրավիճակի վատթարացման առնչությամբ արտահերթ նիստ գումարել։ ՄԱԿ ԱԽ նիստը կայացել է օգոստոսի 16-ին։
Այդ օրը, սակայն, որևէ փաստաթղթով չարձանագրվեցին նիստին ելույթ ունեցող երկրների դիրքորոշումները։ ԱԳՆ մամուլի խոսնակ Անի Բադալյանն այս մասով հայտնել էր, որ ընթացակարգային առումով ՄԱԿ Անվտանգության խորհրդի հրատապ նիստի ձևաչափը քննարկումն է, այն չի ենթադրում ուղղակիորեն փաստաթղթի (բանաձևի կամ հայտարարության) ընդունում։
Բացի այդ, ՄԱԿ ԱԽ բանաձևերի նախագծեր ներկայացնելու և քվեարկության դնելու նախաձեռնությամբ հանդես գալու իրավունք ունեն ՄԱԿ ԱԽ 15 (մշտական և ոչ մշտական) անդամները. Հայաստանը, չլինելով ՄԱԿ ԱԽ անդամ, նման իրավասություն չունի։
