Ադրբեջանը ԼՂ-ի հայերին ինտեգրելու ծրագիր չունի. Մարուքյանը դիմել է միջազգային ատյաններին
12:25 19.07.2023 (Թարմացված է: 12:39 19.07.2023)
Հայաստանի հատուկ հանձնարարություններով դեսպան Էդմոն Մարուքյանը. Արխիվային լուսանկար
© Sputnik / Aram Nersesyan
Բաժանորդագրվել
Հայաստանի հատուկ հանձնարարություններով դեսպանն ընդգծում է, որ հակառակ դեպքում 21-րդ դարը նշանավորվելու է մարդու իրավունքների ևս մեկ զանգվածային ոտնահարմամբ, միջազգային քրեական հանցագործությամբ։
ԵՐԵՎԱՆ, 19 հուլիսի – Sputnik. Ադրբեջանն ամեն օր ապացուցում է, որ ի վիճակի չէ անգամ ապահովելու այն նարատիվները, որոնք ձևակերպում է միջազգային հանրության աչքի առաջ։ Այս մասին իր «Twitter»–ի էջում գրել է Հայաստանի հատուկ հանձնարարություններով դեսպան Էդմոն Մարուքյանը։
Նա նշել է, որ չնայած Ադրբեջանը հայտարարել է, որ ցանկանում է ինտեգրել Լեռնային Ղարաբաղի հայերին և որ նրանք իր քաղաքացիներն են, բայց շարունակում է սպանել նրանց՝ կազմակերպելով տարբեր դիվերսիոն գործողություններ, ապա ոչնչացնում քրիստոնեական եկեղեցիներն ու քրիստոնեական ժառանգության հուշարձանները։
On a daily basis Azerbaijan is proving that it is not even capable of ensuring the narratives it's been formulating in front of the eyes of the international community.
— Edmon Marukyan (@edmarukyan) July 19, 2023
For instance, Azerbaijan claimed that they want to integrate the Armenians of Nagorno-Karabakh and that they…
«Հետևաբար Ադրբեջանը քրիստոնյա հայերին ինտեգրելու ծրագիր չունի։ Ավելին, շուրջ 7 ամիս դադարեցրել է գազամատակարարումն ու էլեկտրաէներգիայի մատակարարումը, շրջափակման մեջ է պահում Լեռնային Ղարաբաղի հայ բնակչությանը, արդեն արձանագրվել են սովի պատճառով երեխաների մահանալու դեպքեր»,– գրել է նա։
Մարուքյանը նշում է, որ այս քայլերով Ադրբեջանը կատարում է միջազգային քրեական հանցագործություն՝ ցույց տալով, որ վստահություն ստեղծելու միջոցներ չի ձեռնարկում։ «Դա ցույց է տալիս, որ իրականացվող քաղաքականությունը կոչված է ոչ թե հայ ժողովրդին ինտեգրելու, այլ Լեռնային Ղարաբաղը էթնիկ զտումների ենթարկելու՝ ի վերջո թողնելով մի կտոր հող առանց ժողովրդի»,–գրել է Հայաստանի հատուկ հանձնարարություններով դեսպան։
Դիմելով միջազգային հանրության լիբերալ ժողովրդավարական ինստիտուտներին` Մարուքյանն ասում է, որ նրանք կա՛մ պետք է ընդունեն, որ իրենք կիսում են Լեռնային Ղարաբաղի 120.000 հայերի, այդ թվում՝ 30.000 երեխաների սովի մատնելու, սպանությունների և էթնիկ զտումների քաղաքականությունը, կա՛մ պետք է հստակ քայլեր ձեռնարկեն միջազգային հանրության միջամտության տեսքով՝ դադարեցնելու մարդկության դեմ ուղղված այդ հանցագործությունները։
Մարուքյանն իր խոսքն ավարտում է`նշելով, որ հակառակ դեպքում 21-րդ դարը նշանավորվելու է մարդու իրավունքների ևս մեկ զանգվածային ոտնահարմամբ, ավելի կոնկրետ՝ միջազգային քրեական հանցագործությամբ, որը դեռ հնարավոր է կանխել միջազգային հանրության միջամտությամբ։
2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։
