Սպորտը պետք է միավորի ժողովուրդներին. ՀՀ նախագահը` Հայաստան–Թուրքիա խաղի մասին
10:52 26.03.2023 (Թարմացված է: 11:05 26.03.2023)
© Sputnik / Asatur YesayantsՀայաստան–Թուրքիա խաղի ժամանակ
![Հայաստան–Թուրքիա խաղի ժամանակ Հայաստան–Թուրքիա խաղի ժամանակ - Sputnik Արմենիա, 1920, 26.03.2023](https://cdn.am.sputniknews.ru/img/07e7/03/19/57251534_0:73:1067:673_1920x0_80_0_0_b9e3d8f7d1a3693f6cca834213440aa5.jpg)
Հայաստան–Թուրքիա խաղի ժամանակ
© Sputnik / Asatur Yesayants
Բաժանորդագրվել
Թուրքիայի սպորտի նախարար Մեհմեթ Քասափօղլուն էլ իր թվիթերյան էջում գրառում է արել` շնորհավորելով թիմին հաղթանակի առիթով։
ԵՐԵՎԱՆ, 26 մարտի – Sputnik. Սպորտը պետք է միավորի ժողովուրդներին: Թվիթերյան իր էջում գրել է ՀՀ նախագահ Վահագն Խաչատուրյանը` անդրադառնալով երեկ` մարտի 25-ին, կայացած Հայաստան–Թուրքիա ֆուտբոլային հանդիպմանը։
«Սպորտը պետք է միավորի ժողովուրդներին, հաշտեցնի ազգերին և ծառայի խաղաղության գործին»,– գրել է նախագահ Խաչատուրյանը։
Thank you to both 🇦🇲 & 🇹🇷 teams for spectacular and intense ⚽ match full of emotions.
— Vahagn Khachaturyan (@President_Arm) March 25, 2023
Sport must bridge peoples, reconcile nations and serve to the cause of peace. pic.twitter.com/jNNZfXf3Ny
Նա շնորհակալություն է հայտնել երկու թիմերին էլ` դիտարժան և հագեցած, էմոցիաներով լի խաղի համար:
Իր գրառմանը կից նախագահը լուսանկար է տեղադրել, որտեղ Հայաստանի և Թուրքիայի ֆուտբոլիստները ողջունում են միմյանց խաղից առաջ։
Հիշեցնենք` Եվրո-2024-ի ընտրական փուլի մեկնարկային խաղում Հայաստանի հավաքականը սեփական հարկի տակ ընդունեց Թուրքիայի թիմին և 1։2 հաշվով պարտություն կրեց:
Հայաստան-Թուրքիա ֆուտբոլային խաղին հետևելու համար Հայաստան էր ժամանել Թուրքիայի սպորտի նախարար Մեհմեթ Քասափօղլուն։ Ավելի ուշ նա իր թվիթերյան էջում գրառում է արել` շնորհավորելով թիմին հաղթանակի առիթով։
«Շնորհավորում եմ մեր տղաներին, ովքեր Եվրոպայի 2024 թվականի առաջնության ընտրական մրցաշարը սկսեցին Հայաստանի նկատմամբ տարած հաղթանակով»,– գրել է թուրք նախարարը։
2024 Avrupa Şampiyonası Elemeleri’ne Ermenistan galibiyetiyle başlayan #BizimÇocuklar’ı tebrik ediyorum.🇹🇷👏🏼 pic.twitter.com/Q16nlSfKji
— Dr. Mehmet Kasapoğlu (@kasapoglu) March 25, 2023
Հայաստանի և Թուրքիայի ազգային հավաքականները 2008 թվականի սեպտեմբերին առաջին անգա էին հանդիպել Երևանում։ Այն ժամանակ ՀՀ նախագահ Սերժ Սարգսյանը խաղին մարզադաշտում հետևում էր Թուրքիայի նախագահ Աբդուլա Գյուլի հետ։ Դա Թուրքիայի առաջնորդի առաջին այցն էր հանրապետության պատմության մեջ։ Հայաստանի հավաքականը 0։2 հաշվով պարտվեց հյուրերին։
2009 թ․-ի հոկտեմբերի էլ Սերժ Սարգսյանը մեկնեց Թուրքիա՝ Բուրսա։ Կրկին մարզադաշտում Հայաստանի և Թուրքիայի հավաքականներն են, և կրկին թուրքերը հաղթեցին 2։0 հաշվով։
Հավելենք, որ մարտի 28-ին Հայաստանի ազգային հավաքականը ընկերական հանդիպում կանցկացնի Կիպրոսի ազգային հավաքականի հետ։
Հայաստանի հավաքականը հանդես է գալիս D խմբում, որտեղ նրա մրցակիցներն են Խորվաթիայի, Թուրքիայի, Ուելսի և Լատվիայի հավաքականները։