Հսկայական հարված ռազմավարական ոլորտին. ՏՏ ընկերությունները դիմում են կառավարությանը
15:07 02.11.2022 (Թարմացված է: 17:05 02.11.2022)
ՏՏ ոլորտի ընկերությունների ղեկավարների ասուլիսը
© Sputnik / Aram Nersesyan
Բաժանորդագրվել
ԱՏՁՄ ղեկավարը նշեց, որ տեղեկատվական տեխնոլոգիաների ոլորտում գործող որոշ ընկերություններ արտարժույթի արժեզրկման պատճառով փակվել են, մի մասն էլ կրճատումներ է արել։ Նա կոչ արեց գործադիրին առաջիկա նիստում ընդունել ՏՏ ոլորտում առաջացած ռիսկերը մեղմացնող նախագիծը։
ԵՐԵՎԱՆ, 1 նոյեմբերի – Sputnik. ՏՏ ոլորտի ընկերությունների ղեկավարները Հայաստանում արտարժույթի արժեզրկմամբ պայմանավորված պահանջում են ՀՀ կառավարությունից հրատապ քայլեր ձեռնարկել ոլորտին աջակցություն տրամադրելու ուղղությամբ։
Այսօր կայացած ասուլիսին Առաջատար տեխնոլոգիաների ձեռնարկությունների միության (ԱՏՁՄ) նախագահ Հայկ Չոբանյանը նշեց, որ այս տարվա փետրվար ամսից արտարժույթի շուկայում աննախադեպ արագությամբ կտրուկ փոփոխություններ են տեղի ունենում։
Հայկ Չոբանյանը
© Sputnik / Aram Nersesyan
«Գահավիժում են և՛ դոլարի կուրսը, և՛ եվրոյի։ Սա մեր ոլորտի համար շատ լուրջ նշանակություն ունի, քանի որ այն 90 և ավելի տոկոսով համարվում է արտահանող ոլորտ` պատվերները ստացվում են արտարժույթով։ Այն կորուստները, որոնք կրել են ընկերությունները, դրանց մեծ մասը, եթե ոչ ամբողջը, չվերականգնվող են։ Դրա արդյունքում մենք ունենք փակված, կրճատումներ կատարած ընկերություններ։ Սա հսկայական հարված է Հայաստանի համար ռազմավարական նշանակություն ունեցող ոլորտին։ ՀՀ բոլոր ռազմավարական փաստաթղթերում բարձր տեխնոլոգիաների ոլորտի դերակատարումը մինչև 70 %–ի է հասնում»,– նշեց ԱՏՁՄ ղեկավարը։
Չոբանյանը չհստակեցրեց, թե քանիսն են և որոնք են այն ընկերությունները, որոնք արտարժույթի արժեզրկման պատճառով փակվել են։
ՏՏ կազմակերպությունների ղեկավարները ապրիլից սկսած բազմաթիվ հանդիպումներ են ունեցել Կենտրոնական բանկի և բոլոր գերատեսչությունների ղեկավարների հետ, քննարկումներ են եղել։ Հունիս-հուլիս ամիսներին ներկայացվել է ոլորտի աջակցության սուբսիդավորման կառավարության որոշման նախագիծ, շարունակությունը եղել է Էկոնոմիկայի նախարարությունում։
«Սեպտեմբերի 12-ին Էկոնոմիկայի նախարարությունը հանրային քննարկման է դրել նոր նախագիծ («Տեղեկատվական տեխնոլոգիաների ոլորտում գործունեություն իրականացնող առևտրային կազմակերպություններին և անհատ ձեռնարկատերերին պետական աջակցության տրամադրման կարգը հաստատելու մասին» ՀՀ կառավարության որոշման նախագիծ,– խմբ.), որով նախատեսվում է սեպտեմբեր–դեկտեմբեր ամիսների եկամտահարկի վերադարձ։ Սրանով կփոխհատուցվի կրած վնասների առավելագույնը 1/3-րդ մասը։ Այս նախագիծն առ այսօր չի ընդունվել»,– ասաց Չոբանյանը։
Նա ընդգծեց, որ նախագծի վերաբերյալ կառավարությունում որոշակի անհամաձայնություններ կան, իրենք էլ արդեն մի քանի շաբաթ է սպասում են, որպեսզի նախագիծը մտնի ԱԺ։
Ոլորտի մասնագետները պնդում են` կառավարությունը որևէ կերպ պետք է խնդրի լուծում գտնի, քանի որ արտարժույթի արժեզրկումը մեծ ռիսկի տակ է դնում ՏՏ ոլորտի զարգացումը։ ԱՏՁՄ–ն կոչ արեց գործադիրին առաջիկա նիստում ընդունել ՏՏ ոլորտում առաջացած ռիսկերը մեղմացնող նախագիծը։
ՎՕԼՕ ՍՊԸ տնօրեն Արմեն Քոչարյանը շեշտեց` այս ասուլիսի միջոցով ցանկանում են իրենց ձայնն ավելի լսելի դարձնել և արագ հասցնել կառավարությանը, որպեսզի վերջիններս գիտակցեն, թե ինչ է կտարվում։ Քոչարյանի խոսքով` շատ են դիմել պատկան մարմիններին, բայց կարծես թե այնտեղ չեն հասկանում, թե ինչ է կատարվում:
ՎՕԼՕ ՍՊԸ տնօրեն Արմեն Քոչարյանը
© Sputnik / Aram Nersesyan
«Բազմաթիվ ընկերություններ, որոնք տասնյակ տարիներ բնական միջավայրում զարգացել են և փորձել են ստեղծել համակարգեր, ծրագրեր, որոնք բարդ խնդիրներ են լուծում, այսօր կանգնած են քայքայման եզրին։ Արդեն այն վիճակն է, երբ այդ ընկերությունները համապատասխան միջոցներ չունեն այդ ծրագրերն անելու համար, հարցականի տակ է դրվում նաև այդ կազմակերպությունների աշխատավարձային բյուջեն։ Խնդրին շուտափույթ լուծում չտալը, արագ չարձագանքելը կհանգեցնի նրան, որ հետո վերականգնվելը շատ երկար տարիներ կպահանջի»,– ասաց նա։
Տեղեկատվական տեխնոլոգիաների ոլորտում գործող ընկերությունների ղեկավարները վստահեցնում են` հաշվի առնելով ներկայիս իրավիճակը և մարտահրավերները, խիստ անհրաժեշտ է արտարժույթի արժեզրկման հետևանքով առաջացած ռիսկերի մեղմացմանն ուղղված նախագիծը օր առաջ ընդունել։ Սա, ըստ նրանց, հնարավորություն կտա ոչ միայն պահպանել ՏՏ և ԲՏ ոլորտներում գործող ընկերությունների աշխատատեղերը, այլև կնպաստի երկրի տեխնոլոգիական և անվտանգային թիկունքի ապահովմանը։
