Մեկ էլեկտրամոբիլ` 2 ավտոմեքենայի փոխարեն. ԿԲ–ն թարմացնում է ավտոպարկն ու կրճատում ծախսերը
13:20 31.10.2022 (Թարմացված է: 13:27 31.10.2022)
Բաժանորդագրվել
ԿԲ–ի ծառայողական ավտոմեքենաների սպասարկման ծախսերը 2023թ–ի բյուջեով 8 տոկոսով աճել են։
ԵՐԵՎԱՆ, 31 հոկտեմբերի – Sputnik. Մեկ էլեկտրոմոբիլի ծախսը բյուջեի վրա հավասար է հեղուկ վառելիքով աշխատող երկու մեքենաների ծախսին։
Այս մասին այսօր ԱԺ–ում 2023թ–ի բյուջեի նախագծի ներկայացման ժամանակ հայտնեց ՀՀ ԿԲ նախագահ Մարտին Գալստյանը` նշելով, որ 2022թ–ին ԿԲ–ն հին ծառայողական ավտոմեքենաների փոխարեն ձեռք է բերել 7 էլեկտամեքենա։ Գործընթացը շարունակվելու է նաև 2023թ–ին։
Այդուհանդերձ, ԿԲ–ի ծառայողական ավտոմեքենաների սպասարկման ծախսերը 2023թ–ի բյուջեով ոչ միայն չեն նվազել, այլև 8 տոկոսով աճել են։
Այս փաստը չվրիպեց նաև պագամավորների ուշադրությունից։ ԿԲ նախագահը պարզաբանեց, որ ծախսի ավելացումը պայմանավորված է հիմնականում վառելիքի գների աճով։
«2023թ–ին, ծախսը կախված կլինի այն բանից, թե որ ժամանակահատվածում ձեռք կբերվեն նոր էլեկտրամոբիլները։ Եթե տարվա սկզբին ձեռք բերվեն, տարվա ընթացքում խնայողությունները, բնականաբար, ավելի մեծ կլինեն։ Եթե ձեռք բերվեն ավելի ուշ, բնականաբար ավելի քիչ կլինեն։ Բայց հստակ կարող եմ ասել, որ մեր փորձը, էլեկտրամոբիլների ձեռքբերման առումով, բավականին դրական է»,– ասաց Գալստյանը։
ԿԲ նախագահը նաև հավելեց, որ ծախսի կրճատման մեջ ինքը հաշվի է առել բացառապես վառելիքի ծախսի կրճատումը, մինչդեռ նոր ձեռք բերված ավտոմեքենաները խնայողական են նաև սպասարկման ծախսերի տեսանկյունից, քանի որ 3 տարվա երաշխիքային սպասարկում ունեն։
