Լավրովը Միրզոյանի հետ քննարկել է Երևանի և Բաքվի միջև խաղաղության պայմանագրի հեռանկարները
15:11 15.04.2022 (Թարմացված է: 16:26 15.04.2022)
ՀՀ և ՌԴ արտգործնախարարներ Արարատ Միրզոյանն ու Սերգեյ Լավրովը հանդիպման արդյունքների վերաբերյալ համատեղ մամուլի ասուլիսից առաջ (8 ապրիլի, 2022թ)․ Մոսկվա. Արխիվային լուսանկար
© Sputnik / пресс-служба МИД РФ
Բաժանորդագրվել
Զրույցի ընթացքում շեշտը դրվել է տարածաշրջանում տրանսպորտային հաղորդակցությունների ապաշրջափակման և հայ-ադրբեջանական սահմանի սահմանազատման հետագա քայլերի վրա։
ԵՐԵՎԱՆ, 15 ապրիլի – Sputnik. Հայաստանի և Ռուսաստանի արտգործնախարարներ Արարատ Միրզոյանն ու Սերգեյ Լավրովն այսօր կայացած հեռախոսազրույցի ընթացքում քննարկել են Մոսկվայի աջակցությամբ Հայաստանի և Ադրբեջանի միջև խաղաղության պայմանագրի համաձայնեցման հեռանկարները, հայտնում են ՌԴ ԱԳՆ մամուլի ծառայությունից:
«Նախարարները մտքեր են փոխանակել 2020 թվականի նոյեմբերի 9-ին, և 2021 թվականի հունվարի 11-ին ու նոյեմբերի 26-ին Հայաստանի, Ռուսաստանի և Ադրբեջանի ղեկավարների միջև ձեռք բերված պայմանավորվածությունների կատարման ընթացքի վերաբերյալ` շեշտը դնելով տարածաշրջանում տրանսպորտային հաղորդակցությունների ապաշրջափակման և հայ-ադրբեջանական սահմանի սահմանազատման հետագա քայլերի վրա։ Անդրադարձ է կատարվել նաև Երևանի և Բաքվի միջև ռուսական աջակցությամբ խաղաղ պայմանագրի դրույթների համաձայնեցման հեռանկարներին», - ասված Է ՌԴ ԱԳՆ-ի տարածած հաղորդագրության մեջ:
Արարատ Միրզոյանն ընդգծել է ՌԴ միջնորդական ջանքերի կարևորությունը, այդ թվում՝ որպես ԵԱՀԿ Մինսկի խմբի համանախագահող պետություն։
Նշենք, որ երեկ ՌԴ ԱԳՆ պաշտոնական ներկայացուցիչ Մարիա Զախարովան հայտնել էր, որ ԵԱՀԿ Մինսկի խմբի ՌԴ համանախագահ Իգոր Խովաևը Հայաստանի և Ադրբեջանի միջև հարաբերությունների կարգավորմանը նպաստելու հարցում հանդես կգա որպես ՌԴ ԱԳ նախարարի հատուկ ներկայացուցիչ։
Հիշեցնենք, որ ապրիլի 11-ին հեռախոսազրույց է կայացել նաև Հայաստանի և Ադրբեջանի ԱԳ նախարարներ Արարատ Միզոյանի և Ջեյհուն Բայրամովի միջև։
Բայրամովն ավելի վաղ հայտնել էր, որ իրենք հարաբերությունների կարգավորման 5 կետից բաղկացած առաջարկ են արել Հայաստանին։ Նշվում էր, որ ադրբեջանական կողմը պատրաստ է Հայաստանի հետ խաղաղության պայմանագիր կնքելու բանակցություններին, եթե պաշտոնական Երևանն ընդունի այդ 5 կետերը։
Հայաստանի և Ադրբեջանի հանրապետությունների միջև խաղաղության պայմանագրի կնքման նպատակով բանակցություններ կազմակերպելու համար ՀՀ-ն դիմել է ԵԱՀԿ ՄԽ համանախագահությանը։
