Ալիևը կոպիտ սխալ է թույլ տալիս. ԵԽ ֆրանսիացի պատգամավորը բանավիճել է Ադրբեջանի դեսպանի հետ
12:20 14.01.2022 (Թարմացված է: 12:26 14.01.2022)
Բաժանորդագրվել
Ֆրանսիայում Ադրբեջանի դեսպանը մեջբերել է Ալիևի խոսքերը, ինչն էլ զայրացրել է Եվրոպական խորհրդարանի ֆրանսիացի պատգամավորին։
ԵՐԵՎԱՆ, 14 հունվարի – Sputnik. Եվրոպական խորհրդարանի ֆրանսիացի պատգամավոր, արտաքին հարաբերությունների հանձնաժողովի անվտանգության և պաշտպանության ենթահանձնաժողովի նախագահ Նատալի Լուազոն Twitter-ի իր էջում բանավեճի մեջ է մտել Ֆրանսիայում Ադրբեջանի դեսպան Ռահման Մուստաֆաևի հետ:
Մասնավորապես, Մուստաֆաևն Ադրբեջանի նախագահ Իլհամ Ալիևի հարցազրույցից մի հատված է հրապարակել Twitter-ի իր էջում։
Նշենք, որ Ալիևը հայտարարել էր, թե ԵԱՀԿ Մինսկի խումբը չպետք է զբաղվի Ղարաբաղյան հակամարտությամբ, քանի որ Ադրբեջանն արդեն կարգավորել է այն։ Ալիևը շեշտել էր` Մինսկի խումբը չի զբաղվելու այդ հարցով, քանի որ Ադրբեջանը թույլ չի տա։ Հենց այս խոսքերն էլ թվիթերյան իր էջում տեղադրել էր Մուստաֆաևը։
Ի պատասխան Լուազոն գրել է, թե առաջին հերթին դիվանագետը պետք է հարգի երկիրը, որտեղ աշխատելու պատիվ ունի։
«Ֆրանսիան ԵԱՀԿ Մինսկի խմբի համանախագահն է, իսկ դուք անում եք հնարավոր ամեն ինչ, որպեսզի խափանեք աշխատանքները։ Լեռնային Ղարաբաղի հակամարտությունը կարգավորված չէ, հրադադարը չի պահպանվում։ Հայաստանում երեկ 3 զինվոր է զոհվել»,–գրել է Լուազոն։
Monsieur l’Ambassadeur, la diplomatie consiste d’abord à respecter le pays où l’on a l’honneur de servir. La 🇫🇷 copréside le groupe de Minsk et vous faites mine de la désavouer. Le conflit du Haut-Karabakh n’est pas réglé et le cessez-le-feu mal respecté. 3 victimes 🇦🇲 hier. https://t.co/dvFqfOQ2zr
— Nathalie Loiseau (@NathalieLoiseau) January 13, 2022
Նա ևս մեկ թվիթ է կատարել` առանձին անդրադառնալով Ալիևի խոսքերին. Լուազոն գրել է, որ Ալիևը կոպիտ սխալ է թույլ տալիս, եթե կարծում է, որ ֆրանսիացիներին հետ կպահի հայ ժողովրդին համերաշխություն հայտնելուց։
Les mots du président Aliev sur @vpecresse me rappellent le courrier que j’avais reçu après mon voyage au Haut-Karabakh. Il commet une erreur grossière s’il pense qu’il dissuadera les Français d’exprimer leur solidarité avec le peuple arménien.🇫🇷🇦🇲 https://t.co/meGWptfxnp
— Nathalie Loiseau (@NathalieLoiseau) January 13, 2022
