Ինտերնետ շահումով խաղերի և տոտալիզատորի գովազդին առնչվող և վաղուց քննարկվող սահմանափակումներն իրականում շատ հրատապ են դարձել, որովհետև այդ գովազդն արդեն խթանում էր խաղամոլությունը մեր հասարակությունում, հասել էր բավականին լայն, նույնիսկ աղետալի մասշտաբների` դառնալով անգամ ընտանեկան դրամաների, ընտանիքների քայքայման պատճառ։ Sputnik Արմենիայի հետ զրույցում նման կարծիք հայտնեց Խոսքի ազատության պաշտպանության կոմիտեի նախագահ Աշոտ Մելիքյանը։
«Պետք է հասկանանք, որ այն պարագայում, երբ արգելվում է, օրինակ` ծխախոտի գովազդը, սահմանափակվում է ալկոհոլային խմիչքների գովազդը, ապա հաշվի է առնվում սոցիալական գործոնը, մինչդեռ շահումով խաղերը, տոտալիզատորներն ավելի մեծ վնաս են հասցնում հասարակությանը։ Հասկանում եմ նաև լրատվամիջոցների մտահոգությունը, քանի որ նրանք կկրեն ֆինանսական կորուստներ, բայց կարծում եմ, որ լրագրողական համայնքը պետք է հասկանա, որ տոտալիզատորներն ու ինտերնետ շահումով խաղերն արդեն իսկապես մեծ վտանգ էին ներկայացնում»,– ասաց Մելիքյանը։
Նրա կարծիքով` եթե ամեն ինչ հանգեցնենք ֆինանսական շահերին ու հետաքրքրություններին, ապա մարիխուանայի և կոկաինի գովազդը շատ ավելի մեծ օգուտ կարող է բերել գովազդ հրապարակողներին։ Սակայն իսկապես չի կարելի հասարակության առողջությունը, բարեկեցությունը, բարոյական կեցվածքը ստորադասել ֆինանսական շահերին ու հետաքրքրություններին։ Եթե հարցը դիտարկվում է այս տրամաբանությամբ, ապա վերոնշյալ սահմանափակումներն, ըստ Մելիքյանի, ողջամիտ են։
ԶԼՄ–ները պետք է հաշվի առնեն, որ շահումով խաղերի գովազդն ընտանիքներ է քանդում. Մելիքյան
Խոսքի ազատության պաշտպանության կոմիտեի նախագահը բուքմեյքերական ընկերություններին խորհուրդ տվեց փորձել սեփական տարածքներում օրենքով թույլատրելի ձևերով իրենց գովազդն անել, իսկ դրանից ավելին մեր հասարակության համար ուղղակի աղետալի կլինի։ Նրա խոսքով` լրատվամիջոցներն ըմբռնումով պետք է մոտենան ու հասկանան, որ խաղամոլությունը չի կարելի խթանել` այն դարձնելով հասարակության կենսակերպ։ Ի վերջո լրատվամիջոցները, Մելիքյանի համոզմամբ, կոչված են հասարակության մեջ բարոյական արժեքներ տարածել, այլ ոչ թե մարդկանց ստորին բնազդները զարգացնել։
Անվճար պոնչիկ, շահումով կով, թատրոնի տոմս. ուրիշ ինչե՞ր են խոստանում պատվաստվողներին
Նշենք, որ ՀՀ կառավարությունը հուլիսի 29-ի նիստում հավանություն տվեց «Գովազդի մասին» օրենքում փոփոխություններին, որով արգելվում է տոտալիզատորների գովազդը հեռուստատեսությամբ, ռադիոյով կամ համացանցով:
Հավելենք, որ օրենքի նախագծով առաջարկվում է օրենքի 15-րդ հոդվածում կատարել համապատասխան փոփոխություն և լրացումներ, որի արդյունքում ինտերնետ շահումով խաղերի և տոտալիզատորի գովազդների հանդեպ կկիրառվեն նույն սահմանափակումները, որոնք կիրառվում են շահումով խաղերի և խաղատների գովազդների նկատմամբ:
