ԵՐԵՎԱՆ, 24 հուլիսի - Sputnik. Ռուսաստանյան հեռուստահաղորդավար և պրոդյուսեր Դմիտրի Դիբրովը, ով մտերիմ հարաբերություններ ուներ նշանավոր դուդուկահար Ջիվան Գասպարյանի հետ և մշտապես նրան անվանում էր «Ջիվան քեռի», վստահ է, որ երաժիշտը մարմնավորել է հայ ժողովրդի գծերի հարուստ ներկապնակը:
«Նրա կյանքի արդյունքը կարելի է նկարագրել այսպես. նա դուդուկը դուրս հանեց գերեզմանոցից Մեծ թատրոնի բեմով ու հասցրեց այն սրահը, որտեղ «Օսկար» են հանձնում։ Ռուս ժողովրդի անունից ուզում եմ խորին շնորհակալություն հայտնել այն բանի համար, որ Ջիվան քեռին ծիրանենու 9–անցքանի կտորի միջոցով մեզ ցույց տվեց, թե ինչ հսկայական ուժ ունի հայկական մշակույթը»,- ասել է Դիբրովը այսօր Երևանում Ջիվան Գասպարյանի վերջին հրաժեշտի արարողության ժամանակ։
Գասպարանի ընկերներն ու գործընկերները ևս կիսվել են նրա մասին հիշողություններով` ևս մեկ անգամ շեշտելով մաեստրոյի ավանդը հայ մշակույթի հանրահռչակման գործում:
Հիշեցնեք՝ «Արամ Խաչատրյան» համերգասրահում տեղի ունեցավ ՀԽՍՀ ժողովրդական արտիստ, դուդուկահար Ջիվան Գասպարյանի վերջին հրաժեշտի արարողությունը:
Արարողությանը ներկա էին ՀՀ վարչապետի պաշտոնակատար Նիկոլ Փաշինյանը, կառավարության անդամներ, բարձրաստիճան պաշտոնյաներ, մշակույթի գործիչներ, ինչպես նաև վարպետի ընկերները, հարազատներն ու բազմաթիվ քաղաքացիներ:
Ջիվան Գասպարյանը մեծ վարպետ էր. Փիթեր Գեբրիելը հուզիչ գրառում է արել
Մեծանուն դուդուկահարին հրաժեշտ տվեցին ծափերի ու նրա սիրելի դուդուկի հնչյունների ներքո։
Ջիվան Գասպարյանի աճյունն ամփոփվելու է Կոմիտասի անվան պանթեոնում։
Հիշեցնենք` մեծանուն արվեստագետի մահվան մասին հայտնի դարձավ հուլիսի 6-ին։
