ԵՐԵՎԱՆ, 7 հուլիսի – Sputnik. Ողբերգական դեպք է տեղի ունեցել Արմավիրի մարզում։ Ինչպես հայտնում է shamshyan.com կայքը, հուլիսի 6-ին, ժամը 16։00-ի սահմաններում, ոստիկանություն ահազանգ է ստացվել, որ Արգինայի ջրատարի մեջ երեխա է ընկել։
Դեպքի վայր ժամանած ոստիկաններն ու քննիչները պարզել են, որ նույն օրը, ժամը 13։45-ի սահմաններում, Արմավիրի մարզի 3 պատանիներ Արտենի գյուղի տարածքում բերքահավաք կատարելիս որոշել են լողալ հարևանությամբ հոսող ջրատարի մեջ։ Նրանցից երկուսը սկսել են խեղդվել, 16-ամյա Նարեկ Խ-ն օգնության է հասել ընկերներին ու նրանց ջրից դուրս հանելուց հետո ինքը սուզվել է։
Արգինա գյուղի բնակիչները նրա դին ջրից դուրս են բերել պատահարի վայրից շուրջ 4.5 -5 կմ հեռավորության վրա։
Փաստի առթիվ Արմավիրի մարզային քննչական վարչությունում նյութեր են նախապատրաստվում, քննիչի որոշմամբ նշանակվել է դատաբժշկական փորձաքննություն։
