11-րդ դասարանի 100 աշակերտ արդեն իսկ գիտեն` ինչ առօրյայով և կարգուկանոնով են ապրում զինվորները բանակում։ Աշակերտները «Նախնական զինվորական պատրաստվածություն» առարկայից ստացած գիտելիքները ԿԳՄՍՆ–ի պիլոտային ծրագրով ռազմամարզական ճամբարում` գործնականում են կիրառում։ Ծրագրի պատասխանատուն Արամ Մանուկյանի անվան ռազմամարզական մասնագիտացված դպրոցն է։
Դպրոցի տնօրեն Արկադի Պետրոսյանը Sputnik Արմենիայի հետ զրույցում նշեց, որ աշակերտների օրն սկսվում է վաղ առավոտյան. վերկացը ժամը 7-ին է։
«Ծրագրին մասնակցում են 86 տղա և 14 աղջիկ։ Ի դեպ, աղջիկները մի քիչ ավելի շուտ հարմարվեցին։ Գրաֆիկում ներառված է ռազմագիտության առարկայի ամբողջ ծրագիրը` մարտավարություն, կրակային պատրաստվածություն, առաջին բուժօգնություն»,–ասաց Պետրոսյանը։
Ի դեպ, աղջիկների առկայությունը տղաներին ավելի պատասխանատու է դարձնում։ Ծրագրին մասնակցող աշակերտներից Էրիկ Շաքարյանը հիշեցնում է` պատերազմի ժամանակ շատ կանայք են մեկնել մարտադաշտ։
«Ինձ թվում է` պետք է աղջիկները ծառայեն, պատրաստ լինեն ամեն ինչին, քանի որ թշնամիներով ենք շրջապատված»,–ասում է նա և հավելում` նման դասընթացներն էլ հնարավորություն կտան պատկերացում կազմել բանակային կյանքի մասին և ճիշտ որոշում կայացնել։
Էրիկի խոսքը հավելում է աշակերտուհի Նելլի Բադալյանը, որն ասում է` եթե հնարավորություն լինի, ինքն էլ է ուզում ծառայության մեկնել։
«Կարծում եմ` աղջիկներն էլ պետք է ծառայեն, բայց կամավորության սկզբունքով պետք է լինի։ Ես, օրինակ, կուզեի բանակ գնալ, մանավանդ, որ այստեղ ծանոթացա բանակային կյանքին ու շատ դուրս եկավ այդ առօրյան»,–ասում է Նելլին։
Նշենք, որ նախարարությունը նախատեսում է հետագայում ռազմամարզական ճամբարը պարտադիր դարձնել։
ՆԶՊ նոր ծրագիրը միտված է նախևառաջ գործնական հմտությունների ձեռքբերմանը. Կարապետյան
