ԵՐԵՎԱՆ, 29 հունիսի - Sputnik. Բժիշկ-իմունոլոգ Վլադիմիր Բոլիբոկը «Վեչերնյայա Մոսկվա» կայքի թղթակցի հետ զրույցում մեկնաբանել է լուրերը, թե ռուս հայտնի երգչուհի Մաքսիմին (Մարինա Աբրոսիմովա) թոքերի արհեստական օդափոխության սարքից տեղափոխելու են էքստրակորպորալ մեմբրանային օքսիգենացիայի համակարգի։ Նա ասել է, թե ինչպես կարող են զարգանալ իրադարձությունները։
Երգչուհու ներկայացուցիչն արդեն հերքել է այդ տեղեկությունը, բայց նաև ասել է, որ բժիշկները Մաքսիմի վիճակը ծանր են գնահատում։
Բոլիբոկի խոսքով՝ էքստրակորպորալ օքսիգենացիայի համակարգին անցնելը վկայում է շատ ծանր վիճակի մասին։ Նշանակում է, որ թոքերն ամբողջովին դադարել են գործել, և մարդն ինքնուրույն չի շնչում նույնիսկ թոքերի արհեստական օդափոխության սարքի օգնությամբ։
«Էքստրակորպորալ օքսիգենացիայի մեխանիզմի աշխատանքի էությունը հետևյալն է` հիվանդից արյուն են վերցնում, անցկացնում սարքի միջոցով, հագեցնում են թթվածնով ու վերադարձնում։ Փաստացի` արհեստական թոքեր։ Մահվան ելքի հավանականությունն այդ դեպքում 90 տոկոսից բարձր է»,- ասել է նա։
Բոլիբոկն ընդգծել է, որ եթե երգչուհու մասին տեղեկությունը հաստատվի, նշանակում է՝ Մաքսիմի վիճակը ծայրահեղ ծանր է։
«Երբ թոքերի արհեստական օդափոխության սարք են միացնում, ողջ մնալու հավանականությունը երկուսից մեկն է, իսկ էքստրակորպորալ օքսիգենացիայի դեպքում՝ տասից մեկը»,- եզրափակել է նա։
Հիշեցնենք`երգչուհուն հոսպիտալացնելու մասին հայտնի դարձավ հունիսի 16-ին։ Սոցցանցերի իր էջերում նա պատմել էր, որ դեռևս հունիսի 11-ին իրեն վատ է զգացել, սակայն COVID-19-ի թեստը բացասական է եղել: Ավելի ուշ հայտնի դարձավ, որ բժիշկները ստիպված են եղել նրան գցել արհեստական կոմայի մեջ։
