ԵՐԵՎԱՆ, 29 հունիսի - Sputnik. «Հայաստան» դաշինքի նախագահ, ՀՀ երկրորդ նախագահ Ռոբերտ Քոչարյանը կասկածելի է համարում արտահերթ խորհրդարանական ընտրություններում մոտ 200.000 ձայն։ Նա նման հայտարարություն արեց դաշինքի համագումարի ժամանակ ու ընդգծեց, որ դիմելու են ՍԴ։
Երկրորդ նախագահն ընդգծել է, որ իր համար ընտրությունների արդյունքներն անակնկալ էին, քանի որ հարցումները բոլորովին այլ պատկեր էին ցույց տալիս։ Նրա կարծիքով ՝ դրան կարող է երկու բացատրություն լինել. կամ մարդիկ ճիշտ չեն պատասխանել հարցումների ժամանակ, կամ ընտրությունների ժամանակ գործել է ընտրակեղծիքների մեքենան։ Նրա խոսքով ՝ կամ հասարակությունը զրկված է ինքնապահպանման և հայրենասիրության բնազդից, կամ էլ շարունակում է մնալ մոլորության մեջ։ Նա հակված է կարծելու, որ գործում է երկրորդ գործոնը։
Խոսելով այս ընտրությունների յուրահատկությունների մասին, Քոչարյանն ընդգծեց, որ եթե 2018 թվականին մարդիկ քվեարկում էին հեղափոխության օգտին, որովհետև ապագայի հանդեպ մեծ հույս ունեին, որ կլինեն փոփոխություններ, որ երկիրը վերելք կապրի և այդ վերելքի շահառուները կլինեն իրենք, ապա այս ընտրություններին լրիվ հակառակ պատկերն էր։
«Այս ընտրությունների ընթացքում չկար հույս, հավատ ապագայի նկատմամբ։ Հետազոտությունները ցույց են տալիս, որ մենք ունենք դեպրեսիվ հասարակություն։ Մարդիկ չէին կարողանում բացատրել, թե ինչի համար էին ընտրում այս իշխանությունը։ Դա իռացիոնալ քվեարկություն էր, որը պետք է բացատրեն սոցիոլոգները։ Պետք է հասկանալ, թե ինչ է տեղի ունեցել և ինչ մոտիվացիա է ունեցել իշխող թիմի օգտին քվեարկող քաղաքացին»,- ասաց նա։
Գագիկ Ծառուկյանին «շաքարակալած» սուտ են մատուցել. Զոհրաբյանը` ԲՀԿ-ի անհաջողության մասին
Նշենք, որ դաշինքի անդամ, իրավաբան Արամ Վարդևանյանը նշել էր, որ Սահմանադրական դատարան հայցը գրեթե պատրաստ է։ Նրա խոսքով ՝ ընտրությունների ընթացքում դաշինքի բացահայտած խախտումները, որոնք վերաբերում են շուրջ 200 հազար ձայնի, վկայում են այն մասին, որ հրապարակված քվեարկության արդյունքները չեն արտացոլում իրական պատկերը:
