ԵՐԵՎԱՆ, 29 հունիսի - Sputnik. Ազգային ժողովի արտահերթ ընտրությունների քվեարկության օրը 109 618 քաղաքացու դեպքում անձնագիրը չի «աշխատել»։ «Հայաստան» դաշինքի 1-ին ընդհանուր ժողովում այս մասին հայտարարեց դաշինքի անդամ, փաստաբան Արամ Վարդևանյանը։
«Ընտրություններին մասնակցել է մոտ 1280.000 մարդ, որոնցից 109618–ի անձնագրերը չեն «աշխատել»։ Այդ ժամանակ ի՞նչ է տեղի ունենում. ընտրատեղամասում նստած մասնագետը ստեղնաշարով պարզապես մուտքագրում է տվյալ։ Հարց է առաջանում` իսկ կարո՞ղ է այդ մասնագետը ուղղակի մեկ այն անձի տվյալ է լրացրել, կարող է այդպես բազմաթիվ դեպքերում լրիվ ուրիշ անձանց տվյալներ են լրացվել, ու լրիվ ուրիշ անձինք գնացել, քվեարկել են։ Հնարավոր է` հենց այս մեխանիզմով շրջիկ խմբերի բանաձևը պատշաճ կերպով իրացվել է»,–ասաց նա։
Դաշինքի անդամի խոսքով` այդ թիվը վճռորոշ նշանակություն ունի ընտրություններում։
Ըստ Վարդևանյանի` 23.790 քաղաքացու դեպքում էլ անձնագիրը «աշխատել» է, բայց լուսանկար դուրս չի եկել։
«Հիմա պատկերացրեք` մեզանից մեկը վստահված անձ է ընտրատեղամասում, ինչպե՞ս ենք վերիֆիկացնելու, թե քվեարկությանը մասնակցածը նշված անձն է, թե ոչ։ Այդ անձը եկե՞լ է իր անձնագրով, թե՞ պարզապես գիտի` ընտրատեղամասում ում տվյալը կա, դրանով ներկայացել է։ Այս խնդիրը ինչպե՞ս պետք է լուծվեր։ Մինչև քվեարկության օրը պետությունը, ունենալով պարտականություն, պետք է այդ խնդիրները լուծած լիներ»,–ասաց նա։
Վարդևանյանը նաև ընդգծեց, որ 10993 ընտրողներ ՀՀ զինված ուժերի ներկայացուցիչներ են, որոնց հնարավոր է` ուղղորդել են։
«Զինծառայողների վերաբերյալ ողջ տեղեկատվությունը պահվել է գաղտնի, թե ովքեր են ընդգրկված ցուցակում, որ ընտրատեղամասերում են քվեարկելու»,–ասաց նա։
Բացի այդ, Վարդևանյանի խոսքով, կա ընտրություններին մասնակցողների ստորագրությունների ցուցակ, որը մեկ այլ թիվ է ցույց տալիս, մինչդեռ ԿԸՀ–ն լիովին այլ թիվ է հրապարակում, ահռելի տարբերությամբ (ավելի շատ):
Վարդևանյանը շեշտեց` այս ամենը փաստերով ներկայացնելու են Սահմանադրական դատարան։
Հիշեցնենք`Հայաստանում հունիսի 20-ին ԱԺ արտահերթ ընտրություններ անցկացվեցին, որոնց մասնակցեցին 25 քաղաքական ուժ` 21 կուսակցություն և 4 դաշինք։ Ձայների վերջնահաշվարկի արդյունքում խորհրդարան անցան «Քաղաքացիական պայմանագիր» կուսակցությունը, «Հայաստան» և «Պատիվ ունեմ» դաշինքները։
«Քաղաքացիական պայմանագիր» կուսակցությունը կստանա 71 մանդատ, «Հայաստան» դաշինքը` 29, «Պատիվ ունեմ» դաշինքը` 7։
«Հայաստան» դաշինքը հայտարարել է, որ քվեարկության արդյունքներն անվավեր ճանաչելու պահանջով մինչև հուլիսի 2-ը կդիմի Սահմանադրական դատարան։
