ԵՐԵՎԱՆ, 28 հունիսի - Sputnik. «Իզմիրլյան» ԲԿ տնօրեն Արմեն Չարչյանի առողջական վիճակում վատթարացում կա։ Հատուկ քննչական ծառայության շենքի մոտ՝ ի պաշտպանություն պրոֆեսորի ակցիայի ժամանակ, լրագրողների հետ զրույցում հայտնեց բժիշկներից մեկը։
«Շաքարը չի իջնում, գլյուկոզան նորմալ թվերի վրա չի կանգնում, ճնշումը չի նորմալանում։ Որքան էլ Չարչյանին թվա, որ այս ամենն իր կողքով է անցնում, մարդու օրգանիզմն ունի իր օրենքները, ու ոչ ոք դրա դեմ ոչինչ չի կարող անել»,- հայտնեց նա։
Նա նաև տեղեկացրեց, որ ՀՀ գլխավոր դատախազությունից և Մարդու իրավունքների պաշտպանից դեռևս պատասխան չեն ստացել։ Բայց իրենք սպիտակ խալաթներով այս ակցիայի արդյունքում ոչ թե պարզապես պատասխան են ակնկալում, այլ որ իրենց խոսքը տեղ հասնի, ու պրոֆեսորը գործընկերների կողքին՝ ազատության մեջ լինի։
«Երաշխավորում ենք, որ նա չի փախչի ոչ մի բանից, երաշխավորում ենք, որ նա չի խանգարի գործընթացին։ Չեմ էլ պատկերացնում, թե էդ առողջական վիճակով ուր պիտի գնա, որ նկուղում պիտի թաքնվի կամ ինչի համար»,- նշեց բժիշկը։
Նշենք, որ այսօր` աշխատանքային օրվա ավարտին, մի քանի տասնյակ բժիշկներ սպիտակ համազգեստներով ակցիա էին անցկացնում ՀՔԾ-ի մոտ` ի պաշպանություն պրոֆեսոր Արմեն Չարչյանի։ Բժիշկները պահանջում են, որ փոխվի պրոֆեսորի խափանման միջոց կալանավորումը, և Չարչյանն ազատության մեջ լինի։
Բժիշկները նաև բաց նամակ փոխանցեցին ՀՔԾ պետին։
«Մենք վերջին ճիգերն ենք գործադրում՝ կատարելու մեր նվիրական գործը՝ սրտով, սիրով ու հոգով բուժել հիվանդին, կռիվ տալ հիվանդության դեմ։ Բայց մեր ուժերը լքում են մեզ։ Հիվանդության դեմ պայքարում մենք չենք ուզում պարտվել, մենք չենք կարող պարտվել, պարոն Խաչատրյան, խնդրում, հորդորում, պահանջում ենք, արեք ամեն ինչ, որ պրոֆեսոր Չարչյանը լինի ազատության մեջ, որ հիվանդության մեջ հաղթողը լինենք մենք»,- ասված է նամակում։
Նամակում նշված է, որ պրոֆեսոր Չարչյանի կալանավորման վերաբերյալ բժշկական հանրությանն են դիմում ու իրենց զորակցությունը հայտնում արտասահմանի գործընկերները, այն հիվանդները, որոնց փրկել է հայտնի վնասվածքաբանը։
Հիշեցնենք՝ հունիսի 18-ին համացանցում հրապարակվեց մի ձայնագրություն, որում Չարչյանն իր աշխատակիցներին ասում էր, որ տնօրինությունը շատ կոշտ վերաբերմունք է ցուցաբերելու նրանց նկատմամբ, ովքեր ընտրություններին չեն մասնակցի։ Նույն օրը հայտնի դարձավ, որ Չարչյանը ձերբակալվել է իր ղեկավարած կենտրոնի աշխատակիցներին ԱԺ արտահերթ ընտրություններին մասնակցելուն առերևույթ հարկադրելու դեպքի առթիվ ՀՔԾ-ում քննվող քրեական գործի շրջանակում։
Արմեն Չարչյանի փաստաբանները դիմել են գլխավոր դատախազին և 50 մլն դրամ գրավ առաջարկել
Հունիսի 21-ին ԿԸՀ–ն թույլատրեց Արմեն Չարչյանին քրեական հետապնդման ենթարկել։ Քննիչը Չարչյանի նկատմամբ կալանավորումը որպես խափանման միջոց ընտրելու վերաբերյալ միջնորդություն ներկայացրեց։ Հունիսի 23-ին դատարանը նրան կալանավորելու որոշում կայացրեց։ Նույն օրը հայտնի դարձավ, որ Չարչյանին շտապօգնության մեքենայով տեղափոխել են հիվանդանոց։
Ի դեպ, Չարչյանը երկրորդ նախագահ Ռոբերտ Քոչարյանի գլխավորած «Հայաստան» դաշինքի անդամ ու պատգամավորության թեկնածու է։
