Զբոսաշրջային ոլորտը Հայաստանում աստիճանաբար սկսում է ուշքի գալ, սակայն զբոսաշրջիկների հոսքն առայժմ մեծ չէ։ Sputnik Արմենիայի թղթակցի հետ զրույցում այս մասին պատմեց Տուրիզմի հայկական ֆեդերացիայի նախագահ Մեխակ Ապրեսյանը։
Էկոնոմիկայի նախարարության տվյալներով՝ 2021 թ․-ի առաջին եռամսյակում Հայաստան է ժամանել 86,5 հազար այցելու։ Նրանցից 31 հազարը Ռուսաստանից են, 9– հազարականը՝ Իրանից ու Վրաստանից, 2-հազարականը ՝ Ուկրաինայից ու ԱՄՆ-ից։ 2020 թ․-ի համեմատ այդ ցուցանիշը նվազել է 72 տոկոսով։ Անցյալ տարվա առաջին եռամսյակում (խմբ.՝ մինչև համավարակի սկսելը) Հայաստան այցելել է շուրջ 307 հազար մարդ։
Նա նշեց, որ ընթացիկ տարվա առաջին եռամսյակի ցուցանիշները ոլորտի վերականգնման հույս են ներշնչում, սակայն հսկայական աշխատանք է անհրաժեշը միջազգային շուկայում մեր տեղն ամրապնդելու համար:
Միաժամանակ Ապրեսյանը նկատեց, որ երկար դադարից հետո հայկական զբոսաշրջային շուկայում հայտնվել են բազմաթիվ հետաքրքիր, ժամանցային, գաստրոնոմիկ և նույնիսկ էքստրեմալ տուրեր: Փորձագետը նշեց, որ զբոսաշրջիկների հիմնական հոսքը գալիս է Ռուսաստանից, Իրանից, Վրաստանից, ԱՄՆ-ից և Ուկրաինայից: Սակայն նկատվում է զբոսաշրջային հոսքերի ակտիվացում Հնդկաստանից, Պարսից ծոցի երկրներից։
Հայկական գինի էին խմում նաև «արքաներն» ու զբոսաշրջիկները. փառատոնը` լուսանկարներով
«Զբոսաշրջիկները հետաքրքրված են և գալիս են, բայց առայժմ դա այն թիվը չէ, որը կօգնի ոլոտի լիարժեք վերականգնմանը»,-նշեց փորձագետը։
Ապրեսյանը նկատեց նաև, որ չնայած երկար դադարին՝ Հայաստանում տուր-փաթեթների գների բարձրացում չի նկատվում, թեև միջազգային շուկայում սակագների աճ եղել է։ Նրա խոսքով՝ մրցունակ գներ են հաստատված, ծառայությունների որակը բարձր է, իսկ սպասարկումը «կորոնավիրուսային արձակուրդից» հետո ավելի լավն է դարձել։
«Պակաս կարևոր չէ այն փաստը, որ Հայաստանը զբոսաշրջիկների իրավունքները հարգելու քաղաքականություն է վարում և երկիր մուտք գործելու միանգամից երկու այլընտրանքային տարբերակ է առաջարկում։ Զբոսաշրջիկները կարող են ընտրել՝ սահմանն անցնել Covid–ի բացասական թեստով կամ պատվաստվել, ընդ որում՝ պատվաստանյութերի միջև խտրականություն չկա։ Մենք զբոսաշրջիկներին որևէ բան չենք ստիպում»,-ընդգծեց նա։
Նա հավելեց նաև, որ Հայաստանի համար հավանական շուկա հանդիսացող շատ երկրներում կորոնավիրուսի և երկրի ներսում անվտանգության իրավիճակի մասին տեղեկատվության պակաս կա: Սա այս պահին լուրջ խոչընդոտ է զբոսաշրջիկների ներգրավման համար։ Հետևաբար, անհրաժեշտ է ավելի ակտիվ իրականացնել գովազդային քաղաքականություն և մարքեթինգային ծրագրեր:
«Եթե մենք կարողանանք Հայաստանում միջազգային ազդեցիկ միջոցառում անցկացնել, դա էապես կօգնի երկրի անվտանգության մասին տեղեկատվության տարածմանը և կակտիվացնի զբոսաշրջային հոսքերը»,-նշեց փորձագետը։
Նա կարևորեց նաև տարբեր փառատոնների անցկացումը, որոնք ոչ միայն կարող են Հայաստանի այցեքարտը դառնալ, այլև երկրում գտնվող զբոսաշրջիկներին գրավելու միջոցով լրացուցիչ հնարավորություններ են ընձեռում սոցցանցերում և մեկը մյուսին փոխանցելու միջոցով գովազդի համար, բնականաբար՝ առանց ավելորդ ծախսերի:
Էկոտուրիզմը Խոսրովի անտառում. արգելոցն իր դռներն է բացում զբոսաշրջիկների առաջ
Մենք զանգահարեցինք մի քանի զբոսաշրջային գործակալություն, որպեսզի պարզենք Հայաստան ժամանող զբոսաշրջիկների շրջանում ամենապահանջված ուղղությունները։ Պատկերը նախորդ տարիների համեմատ գրեթե չի փոխվել։ Ամռանը ժամանողների մեծ մասը ցանկանում է կանգ առնել Երևանում և հիմնականում այցելում են մայրաքաղաքին մոտ գտնվող տեսարժան վայրեր՝ Գառնու հեթանոսական տաճար, Գեղարդ և Խոր Վիրապ։ Երկրորդ ամենապահանջվածը հանգստի վայրը Սևանա լիճն է, իսկ եռյակը եզրափակում են Ծաղկաձորը և Գյումրին։ Քիչ չեն նաև Լոռու և Տավուշի մարզերում տարբեր տեսարժան վայրեր այցելել ցանկացողները։
