ԵՐԵՎԱՆ, 22 հունիսի – Sputnik. Վերցնել, թե չվերցնել պատգամավորական մանդատները հարցի վերաբերյալ «Հայաստան» դաշինքում դեռ վերջնական որոշում չեն կայացրել։ Այսօր հրավիրված մամուլի ասուլիսում այս մասին ասաց «Հայաստան» դաշինքի վարչապետի թեկնածու, ՀՀ երկրորդ նախագահ Ռոբերտ Քոչարյանը` փոխարենը հայտնելով իր անձնական կարծիքը։
«Երեկ քննարկում էինք, և Սեյրան Օհանյանը մի հետաքրքիր համեմատություն արեց, ասաց, որ եթե պատերազմի ժամանակ ամբողջական խնդիրը չես լուծում, բայց դու վերցնում ես ինչ–որ խրամատներ, ապա պետք է այդ խրամատները ոչ թե պահես, այլ ամրացնես հետագա գրոհի համար։ Հիմա պատերազմ չէ, բայց քաղաքական պայքար է, ու այդ համեմատությունը միգուցե ավելի մեղմ տերմիններով կարելի է կիրառել նաև այս պարագայում։ Ես, այո՛, համարում եմ, որ մենք ստացել ենք մեր պայքարը շարունակելու շատ լուրջ նոր հնարավորություններ»,– ասաց Քոչարյանը։
Երկրորդ նախագահը նշեց, որ մտադիր են շարունակել թե՛ խորհրդարանական, և թե՛ փողոցային պայքարը։
«Մեր պայքարը շատ ավելի ուժգին է դառնալու և խորհրդարանական լծակները հնարավորություն են տալու շատ ավելի ակտիվ խորանալ մի շարք այլ ուղղություններով։ Առաջինն այդ ամբիոնն է` երկրի համար մեկ ամբիոնը, որը հնարավորություն է տալու վեր հանել ներկա խնդիրները։ Դուք կտեսնեք, թե ինչպիսի կոռուպցիոն գործարքների մեջ է խրված այս իշխանությունը հատապես գնումների գործընթացներում, և մենք լրացուցիչ լծակներ ենք ստանալու քաղաքական պայքարի համար»,– ասաց նա։
Ռոբերտ Քոչարյանը չբացառեց, որ, եթե իշխանությունը շարունակի աշխատել նույն ոճով, ինչ նախորդ 3 տարիներին, դա կարող է հանգեցնել նոր արտահերթ ընտրությունների։
Նոր ճգնաժամ է լինելու. Արա Աբրահամյանը` ԱԺ ընտրությունների արդյունքների մասին
Հիշեցնենք, որ հունիսի 20-ին կայացած խորհրդարանական արտահերթ ընտրություններում անցողիկ շեմը հաղթահարել են ՔՊ-ն (53.92%) ու «Հայաստան» դաշինքը (21.04%)։
«Պատիվ ունեմ» դաշինքն էլ (5.23%) խորհրդարան կանցնի իրավունքի ուժով՝ որպես երրորդ ամենաշատ ձայներ ստացած քաղաքական ուժ։
Շնորհավորելուց մինչև դատարան դիմել. քաղաքական ուժերի արձագանքն ընտրության արդյունքներին
