ԵՐԵՎԱՆ, 17 հունիսի - Sputnik. Ազգային ժողովն այս շաբաթվա հերթական քառօրյա նիստերում ի թիվս այլ օրենսդրական նախագծերի պետք է հաստատեր նաև 2020 թվականի պետական բյուջեի կատարման տարեկան հաշվետվությունը։ Բայց շուրջ 1 ամիս խորհրդարանի մշտական հանձնաժողովներում ներկայացվելուց ու քննարկվելուց հետո անցյալ տարվա գլխավոր ֆինանսական փաստաթուղթն այդպես էլ հաստատման չարժանացավ։
Պատճառը մեկն է` ԱԺ–ի նիստերը 3 օր շարունակ տեղի չունեցան քվորումի բացակայության պատճառով։ Այլ կերպ ասած` պատգամավորները 3 օր շարունակ ԱԺ գալու ժամանակ չգտան։
Խոսքն, իհարկե, ոչ բոլորի մասին է։ Հանուն ճշմարտության նշենք, որ նրանցից 1-2 տասնյակն, այնուամենայնիվ, այդ նիստերին ներկայանում էր, բայց քվորում ապահովելու համար այդ թիվը բավարար չէր։
Նշենք, որ անկախ Հայաստանի 30-ամյա պատմության մեջ նման իրավիճակ երբևէ չի գրանցվել, որ խորհրդարանը բյուջեի կատարողականը չհաստատեր։
«Կառավարարությունը օրենքով սահմանված կարգով ու ժամկետներում 2020 թվականի պետական բյուջեի կատարման տարեկան հաշվետվությունը ներկայացրել է խորհրդարան։ Այն քննարկվել է հանձնաժողովներում, ապա ներառվել հերթական նիստերի օրակարգ»,–Sputnik Արմենիային հայտնեցին ՀՀ ֆինանսների նախարարությունից։
Այսինքն` բյուջեի կատարողականի հետագա ճակատագրի միակ պատասխանատուն այս դեպքում մնում է Ազգային ժողովը։
Ի դեպ, ԱԺ կանոնակարգ օրենքի 118–րդ հոդվածի 4-րդ կետի համաձայն` պետական բյուջեի կատարման մասին տարեկան հաշվետվության մասին որոշման ընդունման դեպքում հաշվետվությունը համարվում է հաստատված, իսկ չընդունման դեպքում՝ մերժված:
Պարզ ասած` բյուջեի կատարման տարեկան հաշվետվությունը չընդունելը որևէ իրավական հետևանք չի առաջացնում։
Հիշեցնենք` 2020 թվականի պետական բյուջեի կատարման տարեկան հաշվետվությունը կռավարությունը հաստատել էր դեռ շուրջ 2 ամիս առաջ` ապրիլի 22-ին։ Հունիսի 1-ից այն քննարկման դրվեց ԱԺ մշտական հանձնաժողովներում։ Իսկ հունիսի 15-ից արդեն պիտի ներառվեր ԱԺ հերթական նիստերի օրակարգ։
Բայց հենց հունիսի 14-ին ԱԺ խորհրդի նիստը, որի ընթացքում պետք է հաստատվեր հունիսի 15-17-ի նիստերի օրակարգը (որի հարցերից մեկն էլ 2020թ–ի բյուջեի կատարողականն էր) չկայացավ քվորումի բացակայության պատճառով։ Հետո, իհարկե, ԱԺ խորհուրդը շտկեց սխալը` օրվա ընթացքում երկրորդ նիստը գումարելով և հաստատելով օրակարգը։
Վճռաբեկ դատարանում կստեղծվի առանձին վարչական պալատ. բյուջեի ծախսը կավելանա 34.9 մլն դրամով
Բյուջեն այդպես էլ խորհրդարանի հաստատմանը չարժանացավ։ Հունիսի 15-17–ին խորհրդարանում այդպես էլ անհրաժեշտ նվազագույն թվով պատգամավորներ չհավաքվեցին։
Այսպես. 15-ի առավոտյան նիստին ներկա էր ընդամենը 12, իսկ 4 ժամ անց` 24 պատգամավոր, հունիսի 16-ին` նախ 10, 4 ժամ անց` 17 պատգամավոր, իսկ այսօր` հունիսի 17-ին` նախ 7, ապա 20 պատգամավոր։
Ճգնաժամային տարվա բյուջեն 89 %-ով ապահովել են ՀՀ հարկատուները
