ԵՐԵՎԱՆ, 13 հունիսի – Sputnik․ Առաջնահերթ պատերազմ չեն ուզում այն մարդիկ, ովքեր պատերազմին մասնակցել են, գիտեն՝ ինչ են պատերազմը։ Այս մասին հայտարարեց գեներալ-գնդապետ Յուրի Խաչատուրովը Նոյեմբերյանում «Հայաստան» դաշինքի՝ ընտրողների հետ հանդիպման ժամանակ։
«Նախ պատերազմ չի սկսվելու, իսկ եթե սկսվելու էլ է, թող սկսվի։ Ովքեր երբեք չեն պատերազմել, անգամ բանակում չեն ծառայել, չգիտեն էլ, թե դա ինչ է, նրանք միայն խոսում են։ Մենք հիմա պետք է մեր մեջ տղամարդկություն գտնենք ու ասենք՝ ոչ մեկի առջև ծնկի չենք գալու, ոչ մեկից ներողություն չենք խնդրելու, մենք ամեն օր ավելի ուժեղ ենք դառնալու և արժանապատիվ ձևով ենք ապրելու այս աշխարհում»,- նշեց Խաչատուրովը։
Նա անդրադարձավ Հայաստանի սահմաններում ստեղծված վիճակին և այն զգուշացումներին, թե մեր կողմից քայլերը կարող են պատերազմի հանգեցնել։ Խաչատուրովի խոսքով՝ պատերազմով մեզ վախեցնում են, բայց այն չի սկսվի, ադրբեջանական բանակն էլ մեծ կորուստներ է կրել Արցախյան պատերազմում, հիմա մեր թշնամու բանակն էլ այդքան ուժեղ չէ։
«1992 թվական, Նոյեմբերյան, մի քանի տասնյակ ավտոմատներ, հսկայական սահման, մենք դեռ Խորհրդային Միությունից չէինք ստացել զենք, Ադրբեջանն արդեն ստացել էր, բայց մենք չտվեցինք այդ բարձունքները, մենք պահեցինք այդ բարձունքները։ Նոյեմբերյանում ամեն բարձունքում արյուն է թափվել, ինչպես կարելի է այս ամենը մոռանալ»,- նշեց Խաչատուրովը։
Անվտանգության ոլորտում Ռուսաստանի հետ հարաբերությունների խորացումն առաջնահերթ է․Փաշինյան
Հավելենք, որ 44-օրյա պատերազմի ավարտից հետո անհանգիստ է դրությունը նաև Հայաստանի սահմանամերձ՝ Սյունիքի և Գեղարքունիքի հատվածներում։ Թշնամին մայիսի 12-ից ներխուժել է ՀՀ ինքնիշխան տարածք և դիրքավորվել։ Շարունակվող բանակցությունները դեռ արդյունք չեն տվել։
