ԵՐԵՎԱՆ, 1 հունիսի - Sputnik, Խաչիկ Չախոյան. Խորվաթիա-Հայաստան խաղում խաղի ընկերական բնույթը արտահայտվեց վերջնական հաշվի միջոցով։ Կողմերը մեկական գնդակ փոխանակեցին ու բավարարվեցին ոչ-ոքի՝ 1։1 արդյունքով։
Չեմ կարծում, որ այս հանդիպումը արդարացրեց շատերի սպասելիքները։ Նրանք, ովքեր սպասում էին տեսնել արագ ֆուտբոլ, պայքար գնդակի և դիրք զբաղեցնելու համար խաղադաշտի յուրաքանչյուր հատվածում, շատ շուտ հասկացան, որ խաղը իրոք ընկերական է։ Խաղի հենց սկզբից չկար տեմպ, և դաշտի տերերը անհամեմատ շատ տիրելով գնդակին՝ չէին էլ ցանկանում արագություն հաղորդել խաղին։ Իսկ մերոնք խաղում էին երևի թե այնքան, ինչքան որ կարող էին։ Հայաստանի հավաքականի մեկնարկային կազմում իրենց դեբյուտը նշեցին Էդուարդ Սպերցյանն ու Դավիթ Տերտերյանը։ Իրոք, մեր շատ ֆուտբոլիստների համար նման կարգի մրցակցի հետ խաղալը շատ դժվար էր։
Խորվաթիայի հավաքականի գլխավոր մարզիչ Զլատկո Դալիչը 45 րոպե տրամադրեց իր թիմի առջատար ու առանցքային ֆուտբոլիստներից շատերին խաղն անցկացնելու համար։ Մինչև ընդմիջում խորվաթները մեկ անգամ հասան իրենց նպատակին Իվան Պերիշիչի հարվածից հետո։ Նույն Պերիշիչը կարող էր ևս մեկ անգամ հասնել հաջողության, բայց վրիպեց մոտ տարածությունից։
Մեր թիմի մասին խոսելով՝ հիշարժան է միայն Էդգար Բաբայանի հարվածը, որը դիպուկ չստացվեց։ Խաղի վիճակագրությունն էլ խոսում էր այն մասին, որ խորվաթներն ունեին տարածքային ահռելի առավելություն։ Եղավ մի պահ, երբ դաշտի տերերը գնդակին տիրել էին 80 տոկոս։ Այսինքն մեր թիմին խորվաթները զրկել էին գնդակով խաղալու հնարավորությունից, ու Հայաստանի հավաքականը հիմնականում ստիպված էր պաշտպանվել։
Ինչ պետք է անել ուժեղ մրցակիցների հետ խաղից առաջ. Մինասյանը`սպասվող հանդիպումների մասին
Ինչպես և սպասվում էր, ընդմիջմանը երկու կողմերի մարզիչներն էլ շատ փոփոխություններ կատարեցին, բայց վստահ կարելի է ասել, որ Խորվաթիայի հավաքականն այս խաղում եթե ինչ-որ բան փորձարկում էր, ապա դա արեց իր ոչ հիմնական կազմի ֆուտբոլիստների համար։ Որովհետև Մոդրիչը, Վրսալկոն, Վլաշիչը և Վիդան խաղացին մեկ խաղակես։ Իսկ Պերիշիչը խաղաց մեկ ժամ։ Սակայն մյուս կողմից էլ այնպես չէ, որ խորվաթների մյուս ֆուտբոլիստները բարձր խաղամակարդակ չունեին։ Բայց, ինչպես ասում են, դա խորվաթների խնդիրն է, որոնք կարգով, մեղմ ասած, գերազանցում էին մեր թիմին, և իրենք էլ շատ շուտ գիտակցեցին դա։ Բայց նաև պատժվեցին մեր թիմին թերագնահատելու համար։
Խոակին Կապառոսն էլ իր հերթին փորձարկումներ էր կատարում ու գտավ որ երկրորդ կեսում պետք է կազմը փոխել, չնայած այնպես չէ, որ մեր ընտրանին խաղում էր մարտական կազմով։ Թե ինչ հետևություններ արեց Կապառոսը Հյուսիսային Մակեդոնիայի հետ պաշտոնական խաղից առաջ՝ գիտի միայն մարզիչը։ Ուղղակի չմոռանանք, որ այդ խաղին որակազրկման պատճառով բացակայելու են Տիգրան Բարսեղյանը, Վարազդատ Հարոյանը և Խորեն Բայրամյանը։ Բացի Հարոյանից, որ վնասվածքի պատճառով չխաղաց, Բարսեղյանն ու Բայրամյանը խաղադաշտում էին։ Այստեղ էլ տեղին է ասել՝ պատճառը գիտի միայն մարզիչը։ Միգուցե այս ֆուտբոլիստները խաղադաշտում էին, որ իրենց երիտասարդ խաղընկերներին օրինակ ծառայեին ու ոգևորեին։ Համենայնդեպս երբ խորվաթներին թվաց, որ իրենք շատ հանգիստ հաղթելու են, հետևեց Վբեյմարի կրակոցն ու մեր ընտրանու դիպուկ առաջին հարվածը գոլային էր։
Ինչպես և պաշտոնական վերջին խաղերում, մեր ընտրանին անհամեմատ լավ խաղաց երկրորդ կեսում, և դա կարծես թե դառնում է մեր թիմի համար սովորական։ Չնայած խորվաթները խաղի ընթացքում սխալվեցին՝ կարծելով, որ «մեկ ոտքով» հաղթելու են։ Իրոք մրցակիցը գոլային շատ պահեր ունեցավ, բայց դժվար թե Զլատկո Դալիչը գոհ մնաց իր թիմի և խաղից, և խաղի արդյունքից։
Անկախ արդյունքից, սա մեր թիմի լավագույն խաղը չէր և երևի չէր էլ կարող լինել, որովհետև մեր թիմի մարտական կազմը չէր։ Մյուս կողմից էլ նման կարգի թիմերի հետ խաղում դրական հետևություններ էլ անպայման կլինեն, մասնավորապես, թե ինչու էին մրցակցի ֆուտբոլիստները հանգիստ տնօրինում «երկրորդ հարկում» ստանդարտների ժամանակ։ Եվ նորից՝ դա գիտի բոլորից լավ մարզիչը։
Հունիսի 5-ին մեր հավաքականը մրցակցի հարկի տակ ընկերական ևս մեկ հանդիպում է անցկացնելու։ Ստոկհոլմում մենք հյուրընկալվելու ենք Շվեդիայի հավաքականին։
